Оросын эмнэлгийн үйлчилгээний тухай Германы “Шпигель” сэтгүүлд гарсан өгүүллийн хэсгээс 24tsag.mn хүргэж байна. Манай эмнэлэгт ийм явдал тохиолддог уу, тохиолдож болох уугэж та өөрөөсөө бас асуугаарай.Өнгөрсөн 2011 оны эцсээр Монголын хилийн ойролцоох Улаан Үд хотод эмнэлгийн байшин дотор эмчийн тусламж авч чадалгүй байсаар жирэмсэн эмэгтэй хорвоог орхижээ. Долоон сартай жирэмсэн, 29 настай Людмила Орловагийн гэдэс хэвлийгээр нь хүчтэй өвдөж, нөхөр нь эмнэлэгт хүргэж ирсэн байна. Пиг хүнтэй эмнэлэг дотор Людмила ухаан алдан унажээ. Эмч эзгүй тул аргаа барсан нөхөр нь эхнэрээ тэврээд хүлээж байв. Арай гэж ухаан ороход бүсгүйн амнаас цус урсаж эхлэжээ. Эмнэлгийнхэн хувин дөхүүлж өгсөн байна.
Бүтэн зургаан цаг өнгөрсний дараа жирэмсэн эмэгтэйд эмнэлгийн ор олджээ. Эмч нар түүнийг сэхээнд шилжүүлэхээр шийдэв. Харамсалтай нь Орлова комд орж, удалгүй амьсгал хураажээ. Ургийг ч аврах боломж гарсангүй. Талийгаачийн ар гэрийнхний ярьж буйгаар бол эмч нар буруугаа хүлээхгүй байгаа гэнэ. Хоёрын хоёр хүүхдийн эх амиа хорлох гэж хүчтэй эм уусан байсан гэж эмч нар өөрсдийгөө өмгөөлж байна.
Бас нэгэн тохиолдол. Нэгдүгээр сарын дундуур Умард Кавказын Нальчик хотын хүүхдийн төв эмнэлэгт гэнэт цахилгаан тасарчээ. Тун удалгүй энд найман нярай эндсэн мэдээ тарав. Тэд бүгд дутуу төрсөн хүүхдүүд байсан бөгөөд цахилгаан тасрах үед хиймэл амьсгалын аппаратад залгаатай байжээ.
Оросын эрүүл мэндийн яам талийгаач хүүхдүүд бүгд төрөлхийн хүнд өвчтэй байсан гэж мэдэгдэв. “Эцэг эхчүүд нь харин ч баярлалаа гэмээр юм. Насан туршдаа хөгжлийн бэрхшээлтэй хүүхэдтэй зууралдах байсан шүү дээ. Харин одоо хэн ч зовохооргүй боллоо.” Нальчикийн эмнэлгийн нэгэн эмчийн хэлсэн энэ үгийг “Комсомольская правда” сонин иш татаж байна.
Орост ялангуяа хөдөөгийн эмнэлгүүдэд ор хүрэлцдэггүй, багаж төхөөрөмж нь хуучирсан. Архидалт, авын осол болон нас баралт, амиа хорлолтын өндөр төвшнөөс гадна эрүүл мэндийн хуучирсан тогтолцооноос болж энэ улсын хүн ам эрс хорогдож байна. Сүүлийн 20 жилд Оросын хүн ам 6 саяар цөөрчээ.
Сэтгэгдэл (3)