Улаанбаатарыг гурван жилийн дараа утаагүй болгохын төлөө Э.Бат-Үүл гишүүн дахиж УИХ-д нэр дэвшихгүй гэнэ. Тэрбээр энэ тухайгаа АН-ынханд мэдэгдсэн ч өөдөөс нь “Хувийн эрх ашиг чинь биш намын эрх ашиг шүү, NO” гэж хэлж байгаа аж. Гэсэн ч Ардын баатар маань ард түмнийхээ төлөө зүтгэхэд Ардчилсан нам саад болох шинжтэй тул нэр дэвшихгүй гэх байрнаасаа өчүүхэн ч хөдлөхгүйгээр шийджээ. Иргэдийн газрыг авч, нийтийн орон сууц шахаж буй нь баатарын сэтгэлийг зовоодог гэнэ. Өмнө нь ч үүнийг эсэргүүцэж, битгий гэж хэлж байсан. Харамсалтай нь хүлээж аваагүй, тоож сонсоогүйгээр барахгүй иргэдийн газрыг авах нь үргэлжилсээр, орон сууцны үнэ өссөөр байна. Хүмүүст байгаа хамгийн үнэтэй капиталыг нь авчихаад, хариуд нь ханш өндөр орон сууц шахахын эсрэг байгаа тэрбээр өөр гарцыг санал болгодог. Уг саналаа улс төрд ч хэлж байсан, иргэдэд ч хэлж яваа. Тодруулбал, хашаандаа халуун усны шугам татуулчих, тэгэхээр орон сууцны үнэ унаж, оронд нь хашаанд чинь хаус барьж өгнө гэв.

    Энэ саналыг нь нэгэнт УИХ-д дэмжихгүй болсон тул иргэдэд хэлээд явжээ. Харамсалтай нь хэлсэн үг бүрийг нь хий хоосон болгож, “Сонгууль дөхсөн болохоор чи биднийг ашиглах гэж байна” гээд халгаахгүй байгаа гэнэ. Яг энд Э.Бат-Үүлд хүндхэн сонголт иржээ. Ардчилсан намаа дагах уу, ард түмнээ бодох уу?

   Э.Бат-Үүл ард түмнээ бодохоор шийдсэнээр барахгүй газрын төлөөх хөдөлгөөн, эвслүүдтэй хамтрахаар болсон байна. Үүний үр дүнд гурван жилийн дараа Улаанбаатар утаагүй болох боломжтой гэдгийг тэрбээр хэллээ. Түүнийг УИХ-д нэр дэвшихгүй болвол АН-ын нэг тулгуур багана, найдвартай тойрог замхрах юм. Тус намын сүүлийн үед хийсэн огцом "урвалт" дээр тос нэмсэн хэрэг ч болохыг үгүйсгэхгүй. Үнэндээ сонгогчдын саналаар гарч ирсэн АН-ын гишүүд эрх мэдлийг авчихсан үедээ хэрхэн эргэж чадахыг ч харууллаа гэхэд болно. Ялна гэсэн бат итгэлтэй байсан ч олонх болж чадаагүй АН-ын гишүүд энэ онд ялалтаа хоёр дахин бат итгэлтэй байсан ч иргэдийн итгэл, Э.Бат-үүлээ алдлаа. Нам дотор нь шонхорын "өндөг" хагарч, фракц нэгдлүүд нь хөдөөгүүр тойрон аяллаа хөөгөөд эхэлсэн энэ төлөв байдал хэрхэн өөрчлөгдөхийг харах л үлдлээ.