Хүнсний аюулгүй байдал улс орны үндэсний аюулгүй байдалтай эн зэрэгцэн оршдог. Эртнээс байгальдаа ногоо тариагаа тарьж, үр шимийг нь хүртэж ирсэн Европын олон арван орны энгийн тариачин иргэд салхиар тарьдаг үрэнд манай гариг идэгдэж хоол хүнсний аюулгүй байдал ноцтой аюулд ороод байгааг дэлхийн удирдагчид, өндөр албан тушаалтнуудад сэрэмжлүүлэлж эхэллээ. Энэ зуунд буу зэвсэг барьж хэн нэгэн рүү халдахаасаа илүү хоол хүнсээр устгах арга ил, далд явж байгаа нь маргашгүй үнэн. Хүнсний бүтээгдэхүүнийхээ дийлэнхи хувийг гаднаас импортлодог манай улсын хувьд “Хүнсний аюулгүй байдал”-даа анхаарах цаг ирсэн гэдгийг саяхан гарсан хэрэг сануулсан юм. Үргүйдэлд хүргэдэг генийн өөрчлөлттэй бүтээгдэхүүнийг Завхан аймгийн Дөрвөлжин суманд солонгосчууд тариалж байжээ. Солонгосчуудыг нууцаар ургамал тарьж буйг нутгийн ард иргэд мэдээлснээр Монголын тал нутагт генийн инженерчлэлд өртсөн ногоо ургаж байсан нь илэрүүлсэн байна.

    Генийн инженерчлэл гэж юу вэ? Генийн инженерчлэл бол генетикийн болон биохимийн аргуудыг ашиглан генүүдийн байгаль дээр угаасаа огт байдаггүй шинэ нэгдлүүдийг тодорхой зорилгоор гарган авахтай холбоотой молекулын биологийн шинжлэх ухааны нэг чиглэл юм. ГӨАБ буюу трансген таримал гэж юу вэ? Энэ бол гербицидууд ба пестицидүүдэд тэсвэртэй болгох, хортон шавьжуудыг эсэргүүцэх чадварыг нь дээшлүүлэх, ургацыг нэмэгдүүлэх гэсэн одоо нэгэнт эргэлзээтэй болох нь тодорхой болсон зорилгуудыг анх тавьж дотоод генийн бүтцэд нь огт өөр биологийн төрөл зүйлийн генүүд /заавал өөр ургамлын төрөл зүйл байх албагүй, бактерууд, вирусууд,шавьж хорхойнууд эсвэл хэвлээр явагчид, загаснууд тэр байтугай хүний ген хүртэл донор нь болдог байна/ оруулж суулгасан “эрлийз” ургамлууд юм.

    Ийм ургамлуудын түүхий эдээр үйлдвэрлэсэн хүнсний бүтээгдэхүүнүүдийг ГӨАБ буюу трансгентэй хүнс гэдэг. Энэ хүнсийг идсэн хүний бие махбодь, генинд нь өөрчлөлт ордог байна.

   Солонгосчууд  чухам юунд хэрэглэх гэж энэ аюулт ургамлыг тарьж байсан нь одоог хүртэл тодорхойгүй байна. Солонгосын “fungu and plants” компани өнгөрсөн оноос генийн өөрчлөлттэй ногоо ургуулж эхэлсэн гэх. Тэд тус аймгийн засаг даргын зөвшөөрлөөр рапс буюу тосны ургамал тарьж байжээ. Хүний үр удамд нөлөөлж мэдэх ургамал тарихдаа зохих байгууллагаас нь зөвшөөрөл аваагүй байна. Гэвч сумын иргэдийн гомдлоор хууль бус ажиллагаа нь илэрч хууль хяналтынхан үйл ажиллагааг нь зогсоосон байна. Энэ хэргийг цагдаа болон мэргэжлийн хяналтынхан шалгаж байна. Тэдний шалгалтын дүнг бид эргэн мэдээлнэ.