С.Ганбаатар: Хэрэглэгчдийн эрх ашгийг хамгаалах байгууллага ажлаа хийж чадахгүй бол тамгаа хураалгаад бидэнд ажлаа хүлээлгэж өг

- Хөдөлмөрийн хөлсний доод хэмжээг нэмбэл жижиг үйлдвэр, аж ахуй нэгжүүдэд хүндээр тусах юм биш үү?

-  Үгүй. Бид үүгээрээ нийгэмд шудрага хувиарлалт гэж зүйлийг бий болгох гэж байна. Жижиг үйлдвэр, аж ахуй нэгжүүд ажиллуулдаг хүмүүс олсон ашгаасаа 80 саяыг өөртөө аваад үлдсэн 20 хувийг ажилчиддаа тарааж өгдөг. Ийм зүйл байж болохгүй ээ. Өөрөө том  жийп уначихаад ажилчиддаа зуун хэдхэн мянган төгрөгийн цалин өгдөг шүү дээ. Энэ бол шудрага бус. Үнэхээр цалин мөнгөө нэмж чадахгүй гэж үзвэл ажилчидтайгаа ярилцаад гэрээ байгуулаад санал санаачилга гаргаад хөдлөх хэрэгтэй.

- Монгол хүний хөдөлмөрийн хөлсний доод хэмжээ бусад орнуудынхтай харьцуулахад аль түвшинд явдаг вэ?

- Өнөөдөр Монгол оронд өргөн хэрэглээний бараа бүтээгдэхүүны үнэ Европынхонтой адилхан үнэтэй байна. Тэгсэн мөртлөө цалин орлого нь маш муу байна. Манай хөдөлмөрийн хөлсний доод хэмжээ Америкаас 16.8 дахин бага байна. Харин Оросоос 4 дахин Хятадаас хоёр дахин доогуур байна. Өнөөдөр бид Африкийн хэмжээний л цалинтай байна. Монгол хүний үнэлэмжийг дээшлүүл. Монгол хүнийг үнэл. Тэгэхгүй бол Солонгос руу алдаад дууслаа. Монгол залууст итгэл хүлээлгэ. Хөгжих дэвших боломжийг өг. Бид хөдөлмөрийн хөлсний хэмжээг доод тал нь 192 мянган төгрөгт хүргэе гэж байгаа юм. Одоо 300 мянган төгрөгийн цалин авч байгаа хүмүүс 600 мянга болно.

- Цалинг нэмсэнээр инфляци өсөж, бараа бүтээгдэхүүний үнэ өсөх юм биш үү?

- Үгүй. Харин юмны үнэ хөөрөгдөж инфляци өссөн учраас бид цалингаа нэмүүлэх арга хэмжээ авч байгаа юм. Цалин нэмчихээд дахиад барааны үнээ өсгөх юм бол бид дахин цалингаа өсгөх болно. Тэд нар бараа бүтээгдэхүүний үнээ дураараа өсгөхөд ямар нэгэн байдлаар зогсоодог хөшүүрэг торгууль байх ёстой. Бид үр дүнд хүртлээ тэмцлээ явуулна.

- Мах идэх аргаггүй боллоо. Махны үнийг бууруулах тал дээр ҮЭ-ээс ямар арга хэмжээ авч байна вэ?

- Махны үнэ үнэхээр өсч байна. Мах хэрэглэгч нар энэ тал дээр олигтойхон тэмцээд өгөх хэрэгтэй байна. Хэрэглэгчдийн нийгэмлэгийн эрх ашгийг хамгаалах байгууллагууд ажлаа хийгээч ээ. МҮЭХ-оо энэ асуудал руу ормоор байна. Орох гэхээр эрх зүйн орчин дутаад байгаа юм. Хэрэглэгчдийн эрх ашгийг хамгаалах байгууллага хуультай. ХЭАХ байгууллага ажлаа хийж чадахгүй бол тамга тэмдэгээ хураалгаад бид нарт ажлаа өг. Маш энгийн шүү дээ. Ард иргэдэд долоо хоног мах идэхгүй байхыг уриалаад эсвэл ганцхан захаас нь мах аваад бусдаас нь мах авахгүй байх тал дээр тэмцэл өрнүүлээд өгөө чээ.

Т.Хулан