Бүдгэрсэн түүхийн үнэнийг үзүүлнэ хэмээх сурталчилгаатай “Долоон бурхан харвадаггүй” уран сайхны киноны нээлтийг өнөөдөр хоёрдахь удаагаа хийнэ. Гуравдугаар сарын эхнээс уг киноны мэдээлэл цацагдаж эхэлсэн бөгөөд хэд хоногийн өмнө нээлтээ хийсэн аж. МАН-ын байранд хийсэн уг нээлтийг улс төрч, намын гишүүдэд үзүүлсэн байна. Харин энгийн иргэд өнөөдрөөс эхлээд улс орон даяар үзэх боломжтой болж байгаа юм. 160 минут үргэлжлэх уг түүхэн киног бүтээгчид дараах байдлаар тодорхойлжээ.
   “1920 он. Нүхтийн аманд долоон эр түүдэг тойрон сууна. Энэ долоон хүн бол эх орноо харийн түрэмгийлэгчидээс чөлөөлөх хүсэл бодлоороо нэгдэж тангараг өргөж буй залуус билээ. Цус асгаруулсан тулаан, ухаан зарсан уран нарийн арга. Монгол залуусын цуцашгүй эр зоригийн тухай энэхүү кинонд өгүүлнэ. 1951 он. Маршал Чойбалсан нисэх онгоцны буудал дээр өөрийгөө үдэж буй комиссарт хамт тэмцэж явсан нөхдийнхөө тухай ярьж өгөөд Москваг зорин ниссэнээр кино дуусдаг. Эрэлхэг долоон Монгол залуугийн тэмцэл хэрхэн өрнөснийг, тэд зорилгоо биелүүлсэн эсэхийг үзэгч та бүхэн хүрэлцэн ирж үзээрэй. Монголын үнэн түүх өнөөгийн бидэнд ухаарал нэмэх болтугай”

    Энэ кино өнөөдөр 17 цагт эх орон даяар нээлтээ хийх бөгөөд нийслэлд Тэнгис, Өргөө, Соёмбо кино театрт гарах юм байна.