МАН-ын Ёс зүйн хорооноос зарим гишүүддээ намын эсрэг, намын нэр хүндэд сөргөөр нөлөөлөх зүйл ярьсан гэж амаа хамхиж явахыг сануулж албан бичиг хүргүүлж, тайлбар шаардсан байна. Харин тэр “ам нь болдоггүй” нөхөд нь намын ажлаа хааяа шүүмжилчихдэг Д.Тэрбишдагва, Д.Балдан-Очир, Р.Раш зэрэг гишүүд аж.   Үнэхээр ч тэд сүүлийн үед чуулганы танхимд намын нөхдөөсөө сондгойрч, хэвлэлийн хуудсанд МАН-ын бодлогыг шүүмжилсэн үг дайх болсон. МАН-ын Ёс зүйн хороо тэднийг “илүү юм” ярьж яваагийнхаа тайлбарыг өнөөдрийн дотор өгөхийг шаардсан юм. Уг бичигт:

   “Төрийн улс төрийн болон намын албан тушаалд сонгогдож томилогдсон МАН-ын гишүүн намын бодлого, үйл ажиллагааг хэрэгжүүлэхдээ намын дүрмийг чанд сахин биелүүлж, аливаа асуудлыг нам дотроо дэвшүүлэн тавьж, олонхи нь дэмжсэн шийдвэрийг дагаж биелүүлэх учиртай.

   МАН УИХ-ын ээлжит сонгуульд амжилттай оролцох бэлтгэл ажлаа хангаж байгаа энэ үед өдөр тутмын хэвлэл мэдээллийн хэрэгслээр удаа дараа таны өгч байгаа ярилцлага, нийтлэлүүд нь намын нэр хүнд, эв эгдэл, намын эх ашигт сөргөөр нөлөөлөх хандлагатай байгаа тул дахин дээрх үйлдэл гаргахгүй байхыг анхааруулан зөвлөж байна.

  Дээрх асуудлаарх тайлбараа Ёс зүйн хороонд 2012 оны 03 дугаар сарын 20-ны дотор бичгээр ирүүлэхийг хүсье.” гэжээ. МАН-ын хуучин гишүүдэд тойрог олдохгүй зовж байгаа энэ үед намынхаа эсрэг байна гэдэг боломжоо алдана гэсэн үг. Тиймээс дээрх гишүүд МАН-ын Ёс зүйн хороонд ямар тайлбар хийх нь сонин байна. Тус намын зарим гишүүд МАН-д орно гэсэн сураг дуулдаад байгаа нь эдгээр гишүүдтэй холбоотой байж мэдэх тухай цөөнгүй эх сурвалж мэдээлж байгаа юм.