Говь-Алтай аймгийн Шарга сумын харъяат Ц.Батдэлгэрт холбогдох анхан шатны шүүх хурал өчигдөр тус аймгийн сум дундын шүүхэд болж, түүнд цаазын ял оноолоо. Түүнийг Эрүүгийн хуулийн тусгай ангийн 126 дугаар зүйлийн 126.2.3, 126.2.4, мөн хуулийн 91 дүгээр зүйлийн 91.2.6, 91.2.12, 91.2.15, 147 дугаар зүйлийн 147.2 дахь хэсгүүдэд зааснаар насанд хүрээгүй охид эмэгтэйчүүдийг хүчиндэж, уг гэмт хэргээ нуун далдлахын тулд онц харгис хэрцгий аргаар М-г санаатайгаар амь насыг нь хохироосон, бусдын эд зүйлийг дээрэмдсэн, хүчиндэж алахыг завдсан гэмт хэргүүдийг тус тус үйлдсэн гэм буруутайд тооцож ялласан байна. Хуралд ерөнхий шүүгчээр Б.Сарантуяа, шүүгчээр Н.Оюунбилэг, Б.Туяа, улсын яллагчаар аймгийн прокурор П.Эрдэнэбат оролцов. Ц.Батдэлгэр нь 2008 оны 12 дугаар сарын 16-ны өглөө 07 цаг 30 минутын үед тус аймгийн Есөнбулаг сумын Баянхайрхан багийн нутаг 40 жилийн өндөрлөг гэх хөшөөний дэргэд насанд хүрээгүй 17 настай Б-д хутга тулган айлган сүрдүүлж хүч хэрэглэн хүчиндсэн, 2009 оны 1 дүгээр сарын 28-наас 29-нд шилжих шөнө тус аймгийн Есөнбулаг сумын Жаргалант багийн нутаг шүтээний өндөрлөг гэх газар насанд хүрээгүй 17 настай М-г бие хамгаалж чадахгүй байдлыг нь далимдуулан давтан хүчиндэж, уг гэмт хэргээ нуун далдлахын тулд онц харгис хэрцгий аргаар санаатай алсан, 2011 оны 2 дугаар сарын 17-ны өглөө 7 цаг 30 минутад тус аймгийн Есөнбулаг сум Баянхайрхан багийн нутаг 40 жилийн өндөрлөг гэх хөшөөний хойд жалганд насанд хүрээгүй 16 настай Л-д хутга тулган айлган сүрдүүлж хүч хэрэглэн давтан хүчиндсэн, 2011 оны 11 дүгээр сарын 25-ны өглөө 7 цаг 30 минутын орчим тус аймгийн Есөнбулаг сумын Баянхайрхан багийн нутагт насанд хүрээгүй 17 настай П-д хутга тулган заналхийлж хүчиндэж алахыг завдсан, 2011 оны 11 дүгээр сарын 29-ны өдөр 7 цагийн орчим 51 настай Ц-д хутга тулган айлган сүрдүүлж, хүч хэрэглэхээр заналхийлж, 10 000 төгрөгийг дээрэмдэн авсан онц хүнд хэргүүдийг үйлджээ.
Б.Чимэг
