Өнгөрсөн лхагва гаригт болсон цагдаагийн экс дарга нарын шүүх хурлын үеэр шүүгч Ч.Хосбаярын биед халдсан хэрэг гарсан билээ. Үүнтэй холбоотойгоор Нийслэлийн шүүхийн Тамгын хэлтсийн мэргэжилтэн Д.Отгонбаатар мэдээлэл өгөв.
    Өнгөрсөн лхагва гаригт болсон цагдаагийн экс дарга нарын шүүх хурлын үеэр шүүгч Ч.Хосбаярын биед халдсан хэрэг гарсан билээ. Үүнтэй холбоотойгоор Нийслэлийн шүүхийн Тамгын хэлтсийн мэргэжилтэн Д.Отгонбаатар мэдээлэл өгөв.
    Уг мэдээлэлд, “2012.03.14-ний өдрийн 15 цагийн үед шүүгч Ч.Хосбаяр Сүхбаатар дүүргийн шүүхийн байрнаас гарсан. Гэтэл сэтгүүлч нар мэдээлэл авахаар бүчих үед цагдаагийн ар гэрийнхэн хэл амаар доромжлон дайрч эхэлсэн. Энэ үед хамгаалалтад гарч байсан цагдаа нар шүүгчийн аюулгүй байдлыг хангаагүй, хамгаалалт аваагүй. Харин үл таних согтууруулах ундаа хэрэглэсэн, хар савхин куртиктэй хоёр залуу Ч.Хосбаяр шүүгчийн цээжин тус газар 2-3 удаа цохиж, өшиглөсөн. Тиймээс Нийслэлийн шүүхийн мэргэжилтэн, нарийн бичгийн дарга нар шүүгчийг хамгаалж, шүүхийн байранд буцаан оруулсан. Тухайн үед Нийслэлийн шүүхийн цагдаа Л.Өсөхбаяр шүүгчид тусалсан юм. Гэтэл цагдаа нар Өсөхбаяр холдохгүй юугаа хийгээд байгаа юм гэж эсэргүүцэж байсан.
    Мөн шүүгдэгч нарын биеийн байдал муудсан тул яаралтай түргэн тусламжийн машинаар Сүхбаатар дүүргийн нэгдсэн эмнэлэгт хүргэсэн. Миний бие Сүхбаатар дүүргийн нэгдсэн эмнэлгийн даргад шүүхийн тогтоолыг гардуулахаар түргэний машины араас дагаж тус эмнэлэг дээр очсон. Сүхбаатар дүүргийн нэгдсэн эмнэлэг дээр ирэхэд гадна талын хаалганд дээр зургаан цагдаа хамгаалалтад гарсан байсан. Эмнэлэг рүү орох гэхэд дээрээс дарга нар хэнийг ч битгий оруул гэсэн тушаал өгсөн оруулахгүй гэсэн. Би хоёр удаа орох гэж оролдоод чадаагүй, дараа нь тус эмнэлгийн даргатай уулзана гэж хэлж арай хийн орсон.
    Ороод эмнэлгийн дарга Н.Чимгээтэй уулзаж, шүүгдэгч нарын биеийн байдал, хаана, аль тасагт хэвтэж байгаа мөн тэдгээрийн оношийн талаар асууж, нэр бүхий шүүгдэгч нарын цагдан хорих болсон тухай шүүхийн тогтоолыг эмнэлгийн даргад албан ёсоор гардуулж, хариуг албан бичгээр авах, тэдгээрийг цаашид өөр эмнэлэг болон өөр тасагт шилжих, хөдөлгөөн хийсэн тохиолдолд шүүхэд мэдэгдэх талаар хариуг албан бичгээр авахыг шаардсан.
    Тэгээд шүүгдэгч нарын биеийн байдал ямар байгаа аль тасагт, аль өрөөнд хэвтэн эмчлүүлж байгааг нь шалгах, үнэн эсэхийг тодруулах талаар хүсэлт тавьсны дагуу Н.Чимгээ даргатай хамт сэхээн амьдруулах тасагт ирэхэд шүүгдэгч нар гадуур хувцастай, цагдаагийн 3-4 дарга нартай хамт яриа өрнүүлж байсан юм.
    Дараа нь Чимгээ даргын албан бичгийг Сүхбаатар дүүргийн шүүхийн Ерөнхий шүүгчид гардуулж өгсөн. Шүүхийн тогтоолоор цагдан хоригдсон этгээдийг эмнэлгийн туслалцаа үзүүлэх асуудал нь хууль журмаар зохицуулагддаг.
Үүнд: Сэжигтэн, яллагдагчийг баривчлах, цагдан хорих шийдвэрийг биелүүлэх тухай хуульд болон хоригдсон этгээдэд эмнэлгийн тусламж үзүүлэх, түүнийг эмнэлгийн байгууллагад эмчлэх, хорих байранд эмнэлгийн ажилтан ирж үйлчлэх журмыг Хууль зүй, дотоод хэргийн сайд, Эрүүл мэндийн сайдын хамтарсан тушаалаар баталсан журмаар зохицуулагддаг.
    Гэтэл цагдан хоригдсон этгээдийг дүүргийн эмнэлэгт эмчилж байгаа нь дээрх хууль тогтоомжийг зөрчсөн үйлдэл мөн. Ер нь хууль, шүүхийн өмнө иргэд албан тушаалтан эрх тэгш байх ёстой. Гэтэл албан тушаалтнууд, ялангуяа цагдаагийн өндөр албан тушаалтнууд шүүхийг үл хүндэтгэж байгаа нь хуулийн хүчин төгөлдөр болсон шүүхийн шийдвэрийг санаатай биелүүлээгүй, биелүүлэхэд нь саад учруулсан гэмт хэргийн шинжтэй үйлдэл гэж үзэхээс өөр аргагүйд хүрч байна” гэв.