Өнгөрсөн лхагва гаригт цагдаагийн экс дарга нарт холбогдох шүүх хурал болсноос хойш нийгэмд багагүй дуулиан дэгдээд байна. Мөн шүүх хурлыг тойрсон хачин, сонирхолтой үйл явдлууд дүүрэн байна. Ингээд хачин сонирхолтой гэх үйл явдлуудаас дурдъя.
1. 2012.02.27-Цагдаагийн экс дарга нарт холбогдох шүүх хурал өнгөрсөн хоёрдугаар сарын 27-ны өдөр товлогдов. Гэвч шүүгдэгч О.Зоригтын өмгөөлөгч эмнэлэгт хэвтсэн. Мөн тухайн үед байсан төрийн өндөрлөгүүдийг гэрчээр дуудаж оруулах ёстой хэмээн шүүх хурлыг хойшлуулсан. Гэвч дараагийн шүүх хуралдаанд дуудсан гэрчүүдийн нэг нь ч ирээгүй боловч тэдний асуудлыг нэг ч сөхсөнгүй. Гэрчүүд л байх ёстой хэмээн шүүх хурлыг хойшлуулчихаад ирээгүй байхад нь тэдний асуудлыг авч хэлэлцээгүй нь олны анхаарлыг татаад байгаа юм.
2. 2012.03.14-Шүүгдэгч Г.Ганбаатарын өмгөөлөгч Д.Оросоо 21 хоногийн хугацаатай БНСУ-д ажлаар яваа учир хуралдаанд ирж чадахгүй гэх шалтгаанаа шүүх хурлын өмнө бичгээр мэдэгдэв. Гэтэл шүүх бүрэлдэхүүн түүний илгээсэн албан бичгийг хангалтгүй хэмээн түүнийг 513 мянган төгрөгөөр торгох шийдвэр гаргав. Шүүх хуралд оролцож чадахгүй гэдгээ хурлын өмнө албан ёсоор мэдэгдсэн өмгөөлөгчийг торгож байгаа нь өмгөөлөгчийн өмгөөллийн тухай хуулиар олгогдсон эрхийг зөрчсөн явдал байв.
3. 2012.03.14-Нэгэнт Д.Оросоо өмгөөлөгч шүүх хуралдаанд оролцож чадахгүй учир шүүгдэгч Г.Ганбаатар шүүх хурлыг саатуулахгүй гэсэн үүднээс нэмж өмгөөлөгч авч, хуралд оролцохыг хүслээ. Гэвч шүүх бүрэлдэхүүн түүний хүсэлтийг хүлээн авалгүй Г.Ганбаатарын хэргийг тусгаарлахаар болов. Шүүх бүрэлдэхүүний гаргасан уг шийдвэрийг шүүгдэгч, хохирогчдын өмгөөлөгч эсэргүүцэн шүүх бүрэлдэхүүнээс татгалзлаа. Шүүгчийн гаргасан шийдвэрийг улсын яллагчаар оролцож буй хяналтын прокурор С.Хишигжаргал хүртэл эсэргүүцэж байв.
4. 2012.03.14-Шүүх бүрэлдэхүүнээс татгалзсан үед шүүх бүрэлдэхүүн ямар нэгэн шийдвэр гаргах эрхгүй байдаг. Гэтэл Ч.Хосбаяр шүүгч шүүгдэгч нарыг цагдан хорих шийдвэр гаргав. Үүнийг шүүгдэгчийн өмгөөлөгч О.Алтангэрэл хууль бус шийдвэр хэмээн Ерөнхий шүүгчид хүсэлт гаргав.
5. 2012.03.14-Шүүх хурлын дараа Ч.Хосбаяр шүүгч Сүхбаатар дүүргийн шүүхийн байрнаас гарч явав. Энэ үед сэтгүүлчид түүнийг бүчин авч тайлбар авахыг хүсэх үеэр Сүхбаатар дүүргийн гадна жагсаж байсан цагдаагийн ар гэрийнхэн шүүгчийг хэд хэд цохин биед нь халдах үйлдэл үзүүлэв. Гэтэл эмх замбараагүй байдал үүсэхээс сэргийлэхээр ирсэн 50-60 цагдаа шүүгчийг хамгаалахад хуруугаа ч хөдөлгөсөнгүй. Ганцхан цагдаа шүүгчийг хамгаалан оруулав. Тэдний уг үйлдэл эмх замбараагүй байдал үүсэхээс хамгаалахаар ирсэн нэрийн дор үнэн чанартаа дарга нараа хамгаалахаар, тэднийг өмөөрч жагсахаар ирснийг гэрчлэв.
6. 2012.03.14-Цагдан хорих шийдвэр гарсны дараахан шүүгдэгч Ч.Амарболд, О.Зоригт, Ш.Батсүх нарын биеийн байдал муудаж, Яаралтай түргэн тусламж 103 дуудлаа. Эмч тэдний биеийн байдлыг үзэж, сахарын хэмжээ, мөн даралт нь ихэссэн тул яаралтай эмнэлэгт хэвтүүлэх хэрэгтэй хэмээн шүүгчтэй нь уулзав. Гэвч шүүгч нь цагдан хорихын эмнэлэгт хэвтүүл гэсэн ч цагдаагийн ар гэрийнхний эсэргүүцэлтэй тулгаран Сүхбаатар дүүргийн нэгдсэн эмнэлэгт хэвтүүлэх шийдвэр гаргав. Уг үйлдэлд шүүхийн шийдвэр гарсан л бол биелэгдэх байтал цагдаагийн хурандаа дарга нарт энэ шийдвэр биелэгддэггүй бололтой хэмээн эгдүүцэх иргэд олон байв.
7. 2012.03.19-Ерөнхийлөгч Ц.Элбэгдорж ЦЕГ-ын дарга, хошууч генерал Д.Сандагдоржийг дуудан уулзав. Гэтэл тэрээр зөвхөн нэг талын байр сууриас хандаж байгааг Д.Сандаг-Очир генералд чулуудсан үгнүүдээс илт байв. Зөвхөн цагдаа нарыг буруутган ярьж, зэмлэж байснаас хууль бус шийдвэр гаргасан шүүгч, шүүхийн талаар нэг ч дурссангүй нь түүнийг цагдаагийн хурандаа нарын эсрэг байна гэх хардлагыг олон нийтэд төрүүлэв.
8. 2012.03.19-Ерөнхийлөгчийг Д.Сандаг-Очир генералыг дуудаж уулзав уу үгүй юу эмнэлэгт хэвтэж буй цагдаагийн экс дарга нарыг хорихоор цагдаа нар эмнэлэгт очив. Учир нь Ч.Хосбаяр шүүгч тэднийг цагдан хорих төвийн эмнэлэг рүү авч явах шийдвэр гаргажээ. Сүхбаатар дүүргийн нэгдсэн эмнэлэгт хэвтүүл хэмээн шийдвэрээ цуцлаагүй байж дахин нэг шийдвэр гаргаад авав.
9. 2012.03.20-Цагдан хорих төвийн эмнэлэгт хэвтэхгүй хэмээн эсэргүүцээд байсан шүүгдэгчид гэнэт өөрсдийн хүсэлтээр цагдан хорих төвийн эмнэлэгт явах хүсэлтээ гаргалаа.
10. 2012.03.20-Шүүгдэгч Ч.Амарболдын өмгөөлөгч О.Алтангэрэл Үндсэн хуулийн цэцэд хандан “Цагдаагийн дарга нарт холбогдох эрүүгийн хуулийн 294., 294.2 дэх заалт нь Үндсэн хуулийн 16 дугаар зүйлийн 1, 2 дахь хэсэг дэх заалтыг зөрчсөн эсэхэд дүгнэлт гаргаж өгөх” талаар хүсэлт гаргасан байжээ. Хүсэлтийн дагуу Үндсэн хуулийн Цэцийн Тамгын газраас Сүхбаатар дүүргийн шүүх болоод хүсэлт гаргасан өмгөөлөгч О.Алтангэрэл нарт “Өмгөөлөгч О.Алтангэрэлийн мэдээллийг үндэслэн Үндсэн хуулийн Цэцийн гишүүний тогтоолоор маргаан хянан шийдвэрлэх ажиллагаа үргэлжилж байгаа болно” гэсэн хариу өгсөн байна. Үндсэн хуулийн Цэцэд хэрэг үүсгэсэн зүйл ангийн асуудлаар маргаан үүсгэсэн тохиолдолд хэргийг бүхэлд нь түдгэлзүүлдэг хуулийн заалт бий гэнэ. Тиймээс Сүхбааатар дүүргийн шүүх цагдаагийн экс удирдлагуудад авсан цагдан хорих шийдвэрээ даруй хүчингүй болгох, хэргийг бүхэлд нь түдгэлзүүлэх ёстой аж.
11. 2012.03.20-Гэтэл өчигдөр орой 17.00 цагийн үед цагдаагийн экс дарга нар Сүхбаатар дүүргийн нэгдсэн эмнэлэгт “Хэрэв эрүүл мэндийн байдал муудвал эмнэлэгт хамаагүй. Өөрсдөө хариуцлагаа хүлээнэ” гэх баталгаа гаргаж өгөөд өөрсдийн хүсэлтээр цагдан хорих 461 дүгээр анги руу ачигдлаа.
Б.Золбоо
