Хатагтай Нэнси Ли сэжигтэн Ч.Баттуулын зургийг, түүний Монголд ирэхээсээ өмнө нөхрийг нь хуурсныг нотлох баримтыг, хэргийн талаар буруу мэдээлэл цацсан сонингийн талаар мэдээлжээ.

Нэнси Ли монголын ХМХ-үүдээс нөхөрт нь тохиолдсон хэргийн талаар буруу мэдээлэл цацахгүй байхыг хүслээ 
    АНУ-ын 45 настай иргэн, талийгаач Жон Мартин Кийны эхнэр Нэнси Ли “Нөхрийн маань үхлийн талаар монголын зарим сонин буруу мэдээлэл тарааж байна, залруулж өгөөч” гэсэн хүсэлт тавьсан юм.
 
    Хамгийн гол нь монголын хэвлэл мэдээллийн хэрэгслээр буруу мэдээлэл цацагдаж байгаа учраас нөхрийг нь алсан хэрэгт холбогдсон сэжигтэнг байцаахдаа алдаа гаргах вий хэмээн санаа зовж байгаа бололтой.
  
   2012 оны гуравдугаар сарын 16-ны өдөр “Өнөөдөр” сонины 062 /4526/ дугаарт “Америк эрийг хөнөөж, цогцсыг нь шатаасан байжээ” гэсэн гарчигтай мэдээ гарсан байна. Үүнд хэд хэдэн буруу баримт байгааг хатагтай Нэнси Ли олжээ.  

   “Энэ нийтлэлд сэжигтний нэрийг Ж.Баттуул хэмээн бичсэн байна. Түүний овгийг Ж биш Чулуунбаатар гэдэг. Мөн нийтлэлд талийгаач Жон Мартин Кийныг ээжрүүгээ мөнгө шилжүүлээч гэж мэйл явуулснаас хойш сураггүй алга болсон гэсэн байна. Гэтэл Жон Мартин Кийн Монголд ирэнгүүтээ ээж, эхнэрлүүгээ утсаар ярьсан байв. Мөн сэжигтэн Баттуул Америкт сурч, амьдарч байхдаа Жон Мартин Кийнтэй таараагүй. Тэд анх Тайваньд танилцсан гэсэн юм.  
 
  Тайваний худалдаа, эдийн засгийн төлөөлөгчийн газрын Улаанбаатар хот дахь салбараас хатагтай Нэнси Лид нөхөрт нь тохиолдсон хэргийн талаар нийтэлсэн мэдээллүүдийг явуулж байгаа аж. Тэрбээр санхүүгийн боломжгүйн улмаас Монголд ирж чадахгүй байгаа учраас энэ хэрэгт үнэхээр их санаа зовж байгаа бололтой.

Сэжигтэн Ч.Баттуул Монголд ирэхээсээ өмнө Жон Мартин Кийныг хуурчээ

     Талийгаач Жон Мартин Кийн Монголруу нисэхээсээ өмнө сэжигтэн Ч.Баттуулын үлдээсэн мэдээллийг эхнэртээ бичиж өгсөн байна. Ч.Баттуулын Жон Мартинд үлдээсэн мэдээлэл хуурамч байжээ.  

    Ч.Баттуул өөрийн гэрийн хаяг, мэйл хаяг, утасны дугаар, нөхөр Ш.Нямаагын утасны дугаар, ах Баагийгийн утасны дугаар гэсэн мэдээллүүдийг үлдээжээ.

    Гэтэл хатагтай Нэнси Ли нөхөр болон ахынх нь дугаар худал мэдээлэл байсан хэмээн захидалдаа бичжээ. Бид яагаад худлаа гэж үзсэн шалтгааныг нь асуусан боловч хариу ирүүлээгүй байна. Ямартай ч хатагтай Нэнси Ли Ч.Баттуулыг “хамгийн худалч эмэгтэй” хэмээн буруутгасан байлаа.  

   Цагдаагийнхан Ч.Баттуул хэргийг ганцаараа үйлдээгүй байж магадгүй хэмээн сэжиглэж найз залуу Нямдорж, ах Ч.Батсайхан нарыг баривчлаад байгаа юм. Гэтэл Баттуул анхнаасаа хэргийг төлөвлөж хуурамч мэдээлэл үлдээсэн байж болох юм. Гэхдээ хуурамч мэдээлэлд мөн л сэжигтнээр татагдсан хоёр хүний дугаар байгаа учраас хэрэгт оролцоогүй гэж таамаглах боломжгүй байна.

Бид энэ бичигдсэн хаяг, утасны дугааруудыг шалгаж дахин мэдээлэх болно.