Долдугаар сарын 1-ний хэрэгт буруутгагдаад буй цагдаагийн экс дарга нарын шүүх хурал өнгөрсөн лхавга гаригт болж, Ч.Амарболд, Ш.Батсүх, О.Зоригт нарыг цагдан хорих шийдвэр гаргасан. Харин Г.Ганбаатарын өмгөөлөгч ирээгүй гэх шалтгаанаар түүний хэргийг тусгаарласан юм. Түүний өмгөөлөгч Д.Оросоо 21 хоногийн хугацаатай БНСУ-д ажлаар яваа учир шүүх хуралд оролцох боломжгүй гэдгээ албан ёсоор мэдэгдсэн. Өнөөдрийн шүүх хуралд Г.Ганбаатар шинэ өмгөөлөгчтэй оролцов. Харин өмгөөлөгч нь хавтаст хэрэгтэй танилцаж амжаагүй бүрэн танилцах хэрэгтэй гэснээр шүүх хурал хугацаагүйгээр хойшиллоо. Энэ хугацаанд Г.Ганбаатарыг цагдан хорих шийдвэрийг шүүх бүрэлдэхүүн гаргав. Мөн түүний хэргийг буцаад Ч.Амарболд нарын хэрэгтэй хамтран хянахаар боллоо. Хуралд улсын яллагчаар С.Хишигжаргал, ерөнхий шүүгчээр Ч.Хосбаяр, шүүгчээр М.Алдар, С.Оюунчимэг, Г.Ганбаатарын өмгөөлөгчөөр С.Туул, хохирогчдын өмгөөлөгчөөр О.Баасанхүү нар оролцсон юм. Б.Чимэг
