Таван толгойн орд газрын маргаанаас эхлэн цөөнгүй жил үргэлжилж байгаа “Женко” группыг үүсгэн байгуулагч, УИХ-ын гишүүн Х.Баттулга, "MCS"-ийн Ж.Оджаргал хоёрын зөрчил энэ сонгуулийн жил улам хурцдаж байна. Харин өчигдөр Х.Баттулга гишүүний МҮОНРТ-д өгсөн ярилцлага гал дээр тос нэмж, ээлжит сюрпризээ барьлаа. Тэрбээр Засгийн газрын гишүүдийн 50 орчим хувь нь “Энержи ресурс”-тай холбоотой байдаг тухай “нарийн” мэдээллийг дэлгэв.
    “Энержи ресурс”-ийн эрх ашигт нийцүүлж бодлогоо тодорхойлдог төр байж болохгүй хэмээн мэдэгдэх болсон Х.Баттулга өчигдөр ээлжит сюрпризээ барилаа. Тэрбээр өчигдөр орой МҮОНРТ-ээр ярилцлагад Ухаа худгийн орд газрын ашиглалтыг төрийн мэдлийн Таван толгойн урдуур оруулж эхлүүлсэн нь буруу гэж мэдэгдэв. Энэ үүнээс болж Таван толгойн үйл ажиллагаа удааширч, хөрөнгө оруулалт хүлээгдсэн гэж тайлбарлав.  Х.Баттулга гишүүн “Ц.Нямдорж сайд “Энержи ресурс”-аас өгсөн байранд амьдардаг. Тэр хүн хэдэн саяын, ямар үнэлгээтэй байранд амьдардаг гэдгээ мэдэхгүй байгаа. Засгийн газрын зарим гишүүд “Энержи ресурс”-аас өгсөн байраа зарсан сураг байна лээ. Тиймээс ХЗДХ-ийн сайд Ц.Нямдорж, “Энержи ресурс” болон холбогдох хүмүүсийн талаарх өөрт байгаа мэдээллийг ерөнхийлөгч Ц.Элбэгдорж, Авлигтай тэмцэх газар, прокурорт өгч шалгуулна. Энэ талаарх мэдээллийн үнэн зөвийг би хариуцна” гэж МҮОНРТ-д өгсөн ярилцлагадаа онцоллоо. Ийнхүү олон удаагийн тэмцлийнхээ эцэст Х.Баттулга “Энержи ресурс”-тай холбоотой хүмүүсийг шалгуулахаар боллоо. Удахгүй Х.Баттулга гишүүний авлигатай тэмцэх газар өгсөн мэдээлэл нь дахин шуугиан тарих нь тодорхой болов. Эрхэм гишүүн Монголын 2.7 сая хүний эрх ашиг чухал уу, хориодхон гэр бүлийн эрх ашиг чухал уу гэдэгийг эцсээ хүртэл үзэх гэнэ.   
  
   Удахгүй Х.Баттулга гишүүний гомдол, мэдээллийн дагуу Авлигатай тэмцэх газарт “Энержи ресурс”, ХЗДХ-ийн сайд Ц.Нямдорж, засгийн газрын зарим гишүүдийг тойрсон нэлээд том хавтаст хэрэг шинээр нээгдэх аж. Хамгийн сонирхолтой нь энэхүү өрнөл удахгүй болох сонгуулийн өмнө болж байгаагаараа бүр ч их анхаарал татах биз. Харин ерөнхийлөгч Ц.Элбэгдоржийн байр суурь тун сонирхолтой байх болов уу. Саяхан тэрбээр Өмнийн говийн бүтээн байгуулалттай танилцаж явахдаа Ухаа худгийн бүтээн босголтын биширч байсан. Харин энэ удаа асуудалд яаж хандах нь эргэлзээ төрүүлнэ. Магадгүй асуудлыг шалга гэж үүрэг чиглэл өгвөл 7 сарын 1-ээс дутахгүй том маргаан өрнөж мэдэхээр болоод байна. Х.Баттулга, Ж.Оджаргал тэргүүтэй аваргуудын тулааныг харж ярих, сонирхох юмтай болох нь дээ.