УИХ-ын гишүүн Л.Эрдэнэчимэг, М.Батчимэг, З.Баянсэлэнгэ, Ц.Оюунгэрэл, Г.Уянга, Д.Сарангэрэл нар өнөөдөр /2016.06.10/ хэвлэлийн бага хурал хийн, УИХ дахь эмэгтэй гишүүдийн өнгөрсөн дөрвөн жилийн хугацаанд хамтран хийсэн ажлын талаар сэтгүүлчдэд мэдээлэв.

УИХ-ын гишүүн Л.Эрдэнэчимэг, 2012 оны УИХ-ын сонгуулиар парламентад улс төрийн таван намын төлөөлөл бүхий 11 эмэгтэй гишүүн сонгогдож, эмэгтэйчүүд хууль тогтоох, бодлого тодорхойлох, шийдвэр гаргах түвшинд үзэл бодлоо хүргэх, нийгэмд тулгамдсан олон эмзэг асуудлыг шийдвэрлэх боломжтой болсон хэмээн мэдээллийн эхэнд онцолсон. Тэрбээр, парламентад эмэгтэйчүүдийн тоо 11 болж нэмэгдсэн нь сайн үзүүлэлт боловч 76 дотор 11 гэдэг бол дэндүү цөөхөн гээд хэдий тийм ч эмэгтэй гишүүд хамтран болон хувь гишүүнийхээ хувиар олон хууль тогтоолын төслүүдийг өргөн барьж, ажлын хэсгийг ахлан ажиллаж, хууль, тогтоолуудаа батлуулж чадлаа гэж хэлсэн юм.

Өнгөрсөн 4 жилийн хугацаанд эмэгтэй гишүүд Гэр бүлийн хүчирхийлэлтэй тэмцэх тухай, Хүүхэд харах үйлчилгээний тухай, Тамхины хяналтын тухай, Эмнэлгийн тусламж, үйлчилгээний тухай, Эрүүл мэндийн даатгалын тухай, Соёлын тухай, Хог хаягдлын тухай, Хөгжлийн бэрхшээлтэй иргэний эрхийн тухай, Хүүхдийн эрхийн тухай, Хүүхэд хамгааллын тухай, Монгол хэлний тухай, Түрээсийн тухай, Замын хөдөлгөөний аюулгүй байдлын тухай, Тосон бумбын нурууг тусгай хамгаалалтад авах тухай, Органик хүнсний тухай зэрэг хууль, тогтоолын төслүүд дээр хамтран ажилласан талаар УИХ-ын гишүүн Л.Эрдэнэчимэг мэдээлэлдээ дурдсан.

Түүнчлэн эмэгтэй гишүүд дөрвөн жилийн хугацаанд Боловсрол, соёл, шинжлэх ухааны яамтай нягт хамтран ажиллаж, улсын төсөв болон гадаадын урт хугацааны зээл, тусламжаар сургууль, дотуур байрны хөрөнгө оруулалтыг эрс нэмэгдүүлэхэд онцгой анхаарал тавьж ажилласнаар урд жилүүдээс хамаагүй олон тооны сургууль, цэцэрлэг, дотуур байр, хүүхдийн эмнэлгийн асуудлыг шийдсэн гэж тэрбээр хэлсэн. Улсын хэмжээнд нийт 152 цэцэрлэг, цэцэрлэгийн өргөтгөл баригдсан байна.

Бүх хүүхдээ цэцэрлэгт хамруулахын тулд шинээр барих шаардлагатай 800 цэцэрлэгийн хөрөнгө оруулалтад нэг их наяд төгрөг шаардлагатай байгаа бөгөөд энэ нь Монгол Улсын нийт төсвийн 30 гаруй хувийг эзлэх хэмжээний хөрөнгө. Нэгэнт төсвийн хөрөнгөөр нэг дор бүгдийг шийдэх боломжгүй учраас эмэгтэй гишүүд асуудлыг шийдвэрлэх өөр арга зам хайж Хүүхэд харах үйлчилгээний тухай хуулийг санаачлан боловсруулж, УИХ-ын чуулганаар батлуулан өнөөдөр хэрэгжээд явж байгааг мөн дуулгасан.

УИХ дахь эмэгтэй гишүүд нам харгалзалгүй эв нэгдэлтэй ажиллаж чадсан хэмээн дуу нэгтэй хэвлэлийн бага хуралд оролцсон гишүүд мэдэгдсэн бөгөөд санаачилсан хууль, тогтоолын төслүүдийг батлуулахад амар байгаагүй ч хариуцлагатай улс төрийн төлөө, хүн рүү чиглэсэн асуудлыг шийдвэрлэхийн төлөө дуу хоолойгоо нэгтгэсний дүнд амжилтад хүрч чадсан гэж мэдэгдсэн юм.

Тухайлбал, ахмадын тэтгэвэр нэмэх, одонтой эхчүүдийн мөнгө, малчдын тэтгэврийн нас зэрэг ахмад настны нийгмийн хамгааллын чиглэлээр шийдвэр гаргах түвшинд эмэгтэй гишүүд ахмадын нэрийн өмнөөс байнга дуу хоолой болж Хамтын тэтгэврийн тухай хуулийн гол санаачлагчаар ажиллаж батлуулсан. 2015 оны УИХ-ын намрын чуулганаар Хөгжлийн бэрхшээлтэй иргэний эрхийн тухай мөн Хүүхдийн эрхийн тухай хуулийг батлуулсан хэмээлээ.

2012 оноос эхлэн Гэр бүлийн хүчирхийллийн асуудлыг нийгэмд гаргаж тавин онцгой анхаарал хандуулж, НҮБ болон олон улсын байгууллагуудтай хамтран нийтийн анхаарлыг хандуулж, арав гаруй жил нэг ч удаа хэрэгжиж чадаагүй Гэр бүлийн хүчирхийлэлтэй тэмцэх тухай хуулийн шинэчилсэн найруулгыг батлуулсан талаар гишүүд онцолж байлаа.

2012-2016 оны УИХ-ын бүрэн эрхийн хугацаанд Соёл, спорт, аялал жуулчлалын сайдаар Ц.Оюунгэрэл, Байгаль орчин, ногоон хөгжлийн сайдаар С.Оюун, Д.Оюунхорол, Эрүүл мэндийн сайдаар Н.Удвал, Барилга, хот байгуулалтын сайдаар З.Баянсэлэнгэ, Хүнс, хөдөө аж ахуйн сайдаар Р.Бурмаа, Байгаль орчин, хүнс, хөдөө аж ахуйн байнгын хорооны даргаар Л.Эрдэнэчимэг нар ажиллан, УИХ дахь эмэгтэй гишүүд энэ салбаруудын хууль эрхзүй болон хөрөнгө оруулалтын орчныг сайжруулах чиглэлд дэмжлэг үзүүлж хамтран ажиллаж байгааг мөн дурдсан юм хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

Монгол Улсын иргэдэд эзэмшүүлсэн “Эрдэнэс Тавантолгой” ХК-ийн 1072 ширхэг хувьцааны 30 хувийг худалдаж авах шийдвэрийг өчигдөр Монгол Улсын Засгийн газраас гаргасан. Үүнтэй холбогдуулан Улсын Их Хурлын гишүүн, “Сайн хувьцаа” арга хэмжээг хэрэгжүүлэх тухай Засгийн газрын тогтоолын төслийг боловсруулах ажлын хэсгийн ахлагч Н.Батбаяр өнөөдөр /2016.06.10/ сэтгүүлчдэд мэдээлэл хийлээ.

“Сайн хувьцаа” арга хэмжээг хэрэгжүүлснээр иргэдийн Тавантолгой орд газрын хувь эзэмшил баталгаажиж, гүйлгээнд орон мөнгөжихөөс гадна эдийн засгийн эргэлтийг нэмэгдүүлэх, иргэдийг орлогожуулах, Тавантолгой төслийг эрчимжүүлэх, ард түмний амьжиргаа, аж ахуйн нэгжүүдийн борлуулалтад эерэгээр нөлөөлнө гэсэн зорилготойгоор энэ шийдвэрийг гаргасан гэдгийг тэрбээр мэдээллийн эхэнд онцлов.

Энэ шийдвэр 2012 онд гарсан. Үүний дагуу 2012 оны 4 дүгээр сарын 11-ны өдрөөс өмнө Монгол Улсын иргэний бүртгэлтэй байсан бүх иргэдэд 1 сая төгрөгийн хувьцаа эзэмшүүлсэн. Түүнээс хойш тодорхой тооны иргэдэд буюу ахмад настан, хөгжлийн бэрхшээлтэй иргэд, оюутнуудад энэ мөнгийг санхүүжүүлж олгосон. Үлдсэн 2.4 сая иргэнийх хувьцаа хэлбэрээр байршиж байгаа.

Монгол Улсын иргэдэд эзэмшүүлсэн “Эрдэнэс Тавантолгой” ХК дахь өөрийн эзэмшлийн хувьцаагаа худалдах хүсэлт гаргасан Монгол Улсын иргэний эзэмшиж байгаа 1 сая төгрөгийн нэрлэсэн үнэтэй 1072 хувьцааны эхний ээлжинд 30 хувьтай тэнцэх хувьцааг 300, 426 төгрөгөөс иргэдээс холбогдох журмын дагуу шууд худалдан авах, цаашид 70 хувьтай тэнцэх хувьцааг Монголын Хөрөнгийн Биржээр дамжуулан худалдан авах зохицуулалтыг Засгийн газар хийлээ. Энэ нь санхүүгийн зах зээлийг хөл дээр нь босгох зорилготой юм. Цаашид Монгол Улсын иргэд бирж дээр байгаа өөрийнхөө дансуудыг цахим хаяг ашиглан идэвхжүүлээд биржийн ажиллагаанд өдөр бүр чөлөөтэй ордог болох тогтолцоог бий болгосны дараа хоёр дахь үе шат буюу 70 хувьтай тэнцэх хувьцааны олголтын ажиллагаа бий болно гэж үзэж байгаа.

Өөрөөр хэлбэл Монгол Улсын Хөрөнгийн Бирж дээр 70 хувьтай тэнцэх хувьцаа нээлттэй арилжаалагдсан, зах зээлийн нөхцөл байдал сайжирсан үед хувьцаагаа худалдсан иргэнд анх худалдсан үнээрээ буцаан худалдан авах эрхтэй байхаар зохицуулалт хийсэн.

Хувьцааг худалдан авах үйл ажиллагаа 2016 оны 6 дугаар сарын 13-ны өдрөөс эхлэн хэрэгжинэ. Иргэдийн ачааллыг хөнгөвчлөх үүднээс хэрэгжилтийг арилжааны банкуудаар дамжуулан хийх юм. Ингэснээр банкууд иргэдийн хүсэлтийг бүртгэн Монголбанкны үндэсний цахим гүйлгээний төвөөр дамжуулан Нийгмийн халамж, үйлчилгээний ерөнхий газарт өдөр бүр хүргүүлнэ.

Хувьцаа худалдан авах үйл ажиллагаанд хувьцаатай иргэд буюу 30 хувиас доошгүй хувьцааны үлдэгдэлтэй, өөрөөр хэлбэл 322 ширхэгээс дээш хувьцаатай иргэд хамрагдана. Харин урьд нь хувьцаагаа зарсан хүмүүс хамрагдахгүй байхаар зохицуулагдсан. Мөн энэ хувьцаанд насанд хүрсэн иргэдийг хамруулахаар шийдвэрлэсэн. 18 нас хүрээгүй иргэд төрөөс өгсөн хувьцаагаа насанд хүрсэн хойноо өөрсдөө захиран зарцуулах эрхийг өгөх нь зүйтэй гэж үзсэн. Тиймээс 6 дугаар сарын 13-наас иргэдийн хүсэлтийг хүлээн авахад 18 нас хүрсэн иргэн хамрагдах боломжтой юм гэлээ.

Мэдээллийн үеэр Улсын Их Хурлын гишүүн, “Сайн хувьцаа” арга хэмжээг хэрэгжүүлэх тухай Засгийн газрын тогтоолын төслийг боловсруулах ажлын хэсгийн ахлагч Н.Батбаяр сэтгүүлчдийн сонирхсон асуултад дэлгэрэнгүй хариулт өглөө хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Улаанбаатар хотын зам засварын ажил үргэлжилж байна. Замын засвар, шинэчлэлтийн ажил хийгдэж байгаатай холбогдуулан Дүнжингарав худалдааны төвийн урд талын замын хөдөлгөөнийг түр хязгаарлана. Тус замын зорчих хэсгийн урд урсгалыг энэ сарын 14-ний 23 цагаас 15-ны өдрийн 23 цаг хүртэл хаана. Харин хойд урсгалыг 15-ны 23 цагаас 17-ны 23 цаг хүртэл бүрэн хаах юм байна.

Тулгар төрийн 2225, Их Монгол Улсын 810, Ардын хувьсгалын 95 жилийн ойн Үндэсний их баяр наадмаар ес хоног амрах ажээ.

Нийтээр тэмдэглэх баярын болон тэмдэглэлт өдрүүдийн тухай хуульд Үндэсний их баяр наадам, Ардын хувьсгалын ойн баяр долдугаар сарын 11, 12, 13, 14, 15-нд байхаар хуульчилж, 2014 онд нэмэлт өөрчлөлт оруулснаар наадмаар үеэр ажлын таван өдөр амардаг болсон.

Энэ жилийн тухайд долдугаар сарын 9, 10, 16, 17-нд амралтын өдрүүд таарч байгаа тул долдугаар сарын 8-наас эхлэн амарч, 18-нд ажил цуглах юм байна.

Европын комиссын Дэд Ерөнхийлөгчийг хүлээн авч уулзав

Нийслэлд үйл ажиллагаа явуулж буй музейдын танилцуулга номыг англи хэлээр унших боломжтой боллоо.

Тодруулбал, Монгол Улсад Ази-Европын орнуудын дээд хэмжээний уулзалт болж байгаатай холбогдуулан БСШУЯ-ны Соёлын бодлого зохицуулалтын газраас соёлын байгууллагуудын үйл ажиллагааг дэмжин ажиллаж байна.

Энэ хүрээнд нийслэлд үйл ажиллагаа явуулж буй музейдын танилцуулга номыг англи хэлээр хэвлүүлжээ. Энэ удаа Монголын Үндэсний музей, Богд хааны ордон музей, Чойжин ламын сүм музей, Г.Занабазарын нэрэмжит Дүрслэх урлагийн музей, Үлэг гүрвэлийн музейн танилцуулга номыг БСШУЯ-ны Соёлын бодлого зохицуулатын газрын дарга Д.Гантөмөр музейн удирдлагуудад гардууллаа.

Тус танилцуулга номд музейнүүдийн ерөнхий танилцуулга, мэдээлэл, үзвэрийн танхим, хосгүй үнэт болон үнэт үзмэрийн тайлбар зураг, музейн хаяг, байршил зэргийг багтаажээ.

Монгол Улсын Их Хурлын дарга Зандаахүүгийн Энхболд өнөөдөр /2016.06.10/ Дэлхийн банкны дэд ерөнхийлөгч Викториа Кваква тэргүүтэй төлөөлөгчдийг хүлээн авч уулзав.
Хатагтай Викториа Кваква, Улсын Их Хурлын даргыг цаг, зав гарган хүлээн авч уулзсанд баяртай байгаагаа илэрхийлэв. АСЕМ-ын Дээд түвшний 11 дүгээр уулзалтын хүрээнд энэ сарын 09-10-нд болж буй АСЕМ-ын Сангийн сайд нарын 12 дугаар уулзалтад оролцож байгаагаа дуулгалаа.
Улсын Их Хурлын дарга З.Энхболд, АСЕМ-ын Сангийн сайд нарын уулзалтад Дэлхийн банкны дэд ерөнхийлөгч Викториа Квакваг цаг гарган өөрийн биеэр хүрэлцэн ирсэнд талархал илэрхийлэв. Дэлхийн банк болон бусад олон улсын байгууллагуудтай хамтран ажиллаад 25 жил болсон бөгөөд өнгөрсөн 25 жилийн хугацаанд Монгол Улсын Засгийн газар Дэлхийн банкнаас нийт 816 орчим сая ам.долларын хөнгөлөлттэй зээл, буцалтгүй болон техник туслалцааны төсөл, хөтөлбөрийг хэрэгжүүлэх замаар Монгол Улсын эдийн засгийн бүхий л салбарт бүтцийн өөрчлөлт хийх, эрх зүйн зохицуулалт, институцийг бий болгох, бэхжүүлэх, бусад улс орнуудын шилдэг туршлага, мэргэжлийн экспертизийг нэвтрүүлэх зэрэг мөнгөн болон мөнгөн бус хэлбэрийн дэмжлэгийг үзүүлж ирсэн найдвартай түнш байгууллага болж чадсан болохыг тэмдэглэн хэлсэн юм.

Мөн тэрээр, Монгол Улсын зээлжих зэрэглэл ахиснаар Дэлхийн банкнаас Монгол Улсад олгох санхүүгийн дэмжлэгийн дүн нэмэгдэж, томоохон төсөл, хөтөлбөрүүдийг хэрэгжүүлэх нөхцөл бүрдсэнд таатай байна. Цаашид манай улсын макро эдийн засаг, тогтвортой бөгөөд хүртээмжтэй өсөлтийг дэмжих, эдийн засгийг төрөлжүүлэхэд чиглэн тулгуур салбарууд буюу хөдөө аж ахуй, дэд бүтцийн хөрөнгө оруулалт хийхэд дэмжлэг үзүүлэн ажиллана гэж найдаж байна гэлээ.

Дэлхийн банкны Олон улсын хөгжлийн ассоциациас Монгол Улсад IDA 17-ын хүрээнд нийт тодорхой санхүүжилт хуваарилсан бөгөөд тус хөрөнгөөр санхүү эдийн засаг, xөдөө аж аxуй, нийгэм болон эрчим хүчний салбарт нэн шаардлагатай 5 төсөл хэрэгжүүлэхээр тохироод байгааг мөн дурдаад “Эдгээр төслүүдийн нэг болох “Экспортыг дэмжих төсөл”-ийн зээлийн хэлэлцээрийг Монгол Улсын Засгийн газар, Дэлхийн банктай хийгээд байна. Одоо энэхүү төслийг Дэлхийн банкны Захирлуудын зөвлөлөөр батлах ажиллагаа явагдаж байгаа бөгөөд төслийг дэмжиж гэдэгт найдаж байна” гэв.
Уулзалтын үеэр талууд Дэлхийн банк болон Монгол Улсын хамтын ажиллагааны талаар харилцан ярилцаж, цаг үеийн асуудлаар мэдээлэл солилцсон юм. Монгол Улс эдийн засгийн хэтийн чиг баримжааг экспорт хэмээн тодорхойлж байгааг Улсын Их Хурлын дарга танилцуулав. 2016 оны 06 дугаар сарын 07-ны өдрөөс Япон Монголын эдийн засгийн түншлэлийн хэлэлцээр хэрэгжиж эхэлсэн. Япон Улстай сүүлийн 10 жилийн хугацаанд энэ хэлэлцээрийн талаар яриа, хэлэлцээ явуулсан юм. Энэ хүрээнд манай улс Японы бусад орнуудтай харилцдаг production network, economic connective network-руу нэвтрэх боломж бүрдлээ. Мөн Япон Улсын хувийн компаниуд манай улсад хөрөнгө оруулалт хийх боломж нээлттэй болсон. Монгол Улсад үйлдвэрлэсэн нарны зайгаар Япон Улсад станц байгуулаад ажиллуулж байна. Тус улсад хийсэн ажлын айлчлалынхаа үеэр өөрийн биеэр очиж үзлээ. Мөн манай улсад үйлдвэрлэсэн машины эд анги “Тоёото”, “Ниссан” зэрэг автомашины үйлдвэрүүдэд нийлүүлэгдэж байна. Энэ бол production network-ын бодит жишээ юм. Эдийн засгийн түншлэлийн хэлэлцээр хэрэгжиж эхэлснээр одоо манай улсад хөрөнгө оруулалт хийсэн Японы 10 компанийн тоо 10.000 болж өргөжих боломжтой. Хэлэлцээрийн хүрээнд 8000-9000 нэр төрлийн бараа хоёр улсын хооронд татваргүй болж байна. Мөнгө, технологийн урсгал чөлөөтэй болсон. Ажиллах хүч, мэргэжилтний солилцоог чөлөөтэй болгох талаар ярьж байна. Энэ бүхний үр дүнд Монгол Улс дэлхийд гуравдугаарт бичигдэх том эдийн засагтай холбогдох бүрэн боломжтой болж байна. Ингэснээр Монгол Улсын хувьд 2 тэрбум ам.долларын уул уурхайн бус экспорт бодитой болох юм гэлээ.
Улсын Их Хурлын даргын Дэлхийн банкны дэд ерөнхийлөгч Викториа Кваква тэргүүтэй төлөөлөгчидтэй уулзсан уулзалтад Дэлхийн банкны Монгол дахь суурин төлөөлөгч Жим Андерсон, Улсын Их Хурлын даргын зөвлөх Д.Лхагвасүрэн болон албаны бусад хүмүүс байлцав хэмээн Улсын Их Хурлын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Их Монгол улсын гудамжны 2.3 км авто замын өргөтгөл шинэчлэлтийн ажил үргэлжилж байна.

Уг ажлын хүрээнд тус замын Оргил худалдааны төвөөс Баянмонгол хорооллын уулзвар хүртэлх хэсгийн тээврийн хэрэгслийн хөдөлгөөнийг 2016 оны 06-р сарын 10-ны 23:00 цагаас 06-р сарын 12-ны 23:00 цагийн хооронд түр хааж хучилт хийх болсон байна.

Иймд эрхэм зорчигч, жолооч та бүхэн Зам хаах дээрх хугацаанд өөр бусад чиглэл, замыг сонгон зорчино уу.

Нийслэлийн Авто Замын Газар

УДБЭТ-ын гоцлол дуучин, МУГЖ Э.Амартүвшин энэ сарын 11-нд Герман улсыг зорино.

Тэрбээр Германд Ж.Вердийн “Риголетто” дуурийн сургуулилт хийхээр явах бөгөөд аялан тоглолт нь ирэх 10 дугаар сард болох юм. Авьяаслаг уран бүтээлч Э.Амартүвшин нийт 15 удаа тус дуурийн гол дүр Риголеттогийн дүрд дуулахаар болжээ. Тэрбээр эх орондоо ирээд удаагүй байгаа бөгөөд энэ сарын эхээр Англи улсын Лондон хотноо тоглолт хийсэн юм.

2016 оны УИХ-ын ээлжит сонгууль зургадугаар сарын 29-ны өдөр болно.

З.Энхболд: Хувьцаагаа худалдах эрх энэ сарын 13-наас нээгдэнэ

Бондын бүтээн байгуулалт” хэлэлцүүлэг өчигдөр Шангрилад боллоо. Засгийн газар олон улсын санхүүгийн зах зээл дээр 1.5 тэрбум ам.долларын бондыг амжилттай арилжаалсан. Бондын мөнгөөр өнгөрсөн хугацаанд ямар бүтээн байгуулалтууд өрнөснийг төсөл хэрэгжүүлэгчид нь тайлагнасан юм.

Сонгуулийн тухайн хуульд заасны дагуу 2016 оны улстөрийн сонгуулийн сурталчилгааны хугацаа маргааш албан ёсоор эхэлнэ.

УИХ-ын дарга З.Энхболд Дэлхийн банкны дэд ерөнхийлөгч Викториа Квакваг хүлээн авч уулзав

Эрчим хүчний сайд, УИХ-ын гишүүн Д.Зоригт оролцлоо

Сүхбаатар дүүрэгт Хараацай, Хандгайт, Маргаашийн хөгжил, Ундраа, Янзага, Сэлбэ зуслан үйл ажиллагаа явуулдаг бөгөөд өнөөдрөөс эхлэн эхний ээлжийн амрагч хүүхдүүдээ хүлээн авах юм байна.

Тулгар төрийн 2225, Их Монгол Улсын 810, Ардын хувьсгалын 95 жилийн ойн баяр наадам ирэх сард зохион байгуулагдана. Тэгвэл энэ жилийн баяр наадамд 2 тэрбум 913 сая төгрөгийг зарцуулахаар төсөвлөөд байгааг албаныхан мэдээллээ. Мөн Хүй долоон худаг, Төв цэнгэлдэх хүрээлэнд 7300 гаруй автомашины зогсоол гаргах бэлтгэл хийгдэж байгаа аж.

Олон жил урлагийн гал тогоонд чанагдаагүй ч гэнэт л ”цойлоод” ирсэн түүнийг сүүлийн үед бүх л найруулагчид кинондоо тоглуулахыг хүсдэг болжээ. Хэцүү амьдрал туулж өдий зэрэгт хүрсэн гэдгээ бусдаас нуудаггүй, харин ч бахархдаг энэ эмэгтэйн амьдралын хуудсыг фото зургаар нь сонирхуулж байна.

УИХ-ын гишүүн Н.Энхболд өөрийн пэйж хуудсаа хаагдсан шалтгааныг шалгуулахаар хууль хяналтын байгууллагад ханджээ. Учир нь түүний хувийн цахим хуудсанд халдаж хаалгах хэмжээнд хүрчээ. Тэрээр сүүлийн үед цахим хуудсаа хамгийн идэвхтэй хөтлөгчдийн нэг байсан юм. Цагдаагийн байгууллагаас хандалтын IP хаяг, байршлыг тогтоох боломжтой бөгөөд санаатайгаар бусдын цахим хаяг руу халдсан үйлдсэн нь тогтоогдвол хариуцлага тооцдог юм байна.

Хан-Уул дүүргийн ИТХ, Засаг даргын Тамгын газраас ахмадын хороодод эрүүл мэндийг дэмжих, чөлөөт цагийг зөв боловсон өнгөрүүлэхэд зориулсан тоног төхөөрөмжийг хүлээлгэн өглөө. Арга хэмжээнд Хан-Уул дүүргийн ИТХ-ын дарга Д.Батбилэг, Засаг даргын орлогч Д.Анхбаяр болон холбогдох албаны хүмүүс оролцсон юм.