Чех улсын Пильсен хотод болж буй Олон улсын пауэрлифтингийн холбооны хэвтээ шахалтын насанд хүрэгчдийн ДАШТ-ий 105 кг-д Х.Энхболд алтан медаль хүртжээ.

Байгаль орчин, аялал жуучлалын яам байгуулагдсны 30 жилийн ой энэ өдрүүдэд тохиож байна. Эх орныхоо байгаль, ан амьтныг хамгаалах их үйлсэд зүтгэж яваа эх орончдын төлөөлөл болох Ж.Төмөрсүхтэй уулзаж ярилцсан юм. Тэрбээр 31 жил байгаль хамгаалагчаар ажиллаж байгаа бөгөөд өдгөө Улаан тайгын Улсын тусгай хамгаалалттай газрын хамгаалалтын захиргааны даргаар ажиллаж буй. Ингээд түүний ярилцлагыг хүргэе.

-Та МУИС-ийн байгалийн ухааны тэнхмийг 1987 онд төгссөнөөс хойш байгаль хамгаалчаар 31 жил ажиллаж байгаа юм билэээ. Таныг байгаль хамгаалагчаар ажиллаж эхлэх үед хүндрэл бэрхшээлтэй ямар зүйл байв?

-Намайг их сургууль төгсөх жил Хөвсгөлийн тусгай хамгаалалттай газар нутгийн хамгаалалтын захиргааны газар дөнгөж байгуулагдсан. Өмнө нь Хөвсгөл нуурыг хамгаална, хамгаалахгүй гэж олон удаа яригдсны эцэст хамгаалах нь зүйтэй гэж шийдсэн юм билээ. Тэр үед Байгаль орчин, аялал жуучлалын яам байгуулагдаагүй байсан үе. Харин Ойн модны аж үйлдвэрийн яам гэж байлаа. Яамны томилолтоор Хөвсгөл нуурын хамгаалалтын захиргааны газарт ажиллах даалгавар авсан нь энэ. Би амьдралынхаа 25 жилийг Хөвсгөл нуурыг хамгаалахад зориулсан. Байгаль хамгаалагчаас эхлээд мэргэжилтэн, хяналт хариуцсан мэргэжилтэн, байцаагч, даргаар нь ажиллаж байгаад 2012 оноос Улаан тайгын Улсын тусгай хамгаалалттай газрын хамгаалалтын захиргаа буюу Дархадын хотгорын уул, тайгыг хамгаалах газар шинээр байгуулагдах үеэс даргаар нь ажиллаж байна. Хөвсгөл нуурыг хамгаалах шийдвэр гаргасан нь тухайн үеийн хамгийн зөв шийдвэрт тооцогддог. Учир нь, тухайн үед энэ бүс нутагт үйл ажиллагаа явуулдаг үйлдвэрүүд Хөвсгөл нуурын экосистемд сөрөг нөлөө үзүүлдэг байсан юм билээ. Хатгал суман дахь модны үйлдвэрүүдээс гадна ноос угаах үйлдвэрүүд нуур руу бохироо цутгадаг байлаа. Мөн усан онгоцоор нефть, автомашин тээвэрлэнэ. Тэр битгий хэл нуурын баруун эрэгт Уран дөш, Хүрэн хааны орд гээд бордооны орд нээж, төмөр зам тавихаар төлөвлөлт хийгдэж байв. Өөрөөр хэлбэл, биднийг ажлаа авахад Хөвсгөл нуурын баруун эргийн уулыг нураах гэж Орос-Монголын хамтарсан баг ажиллаж байсан. Яг энэ үед Байгаль орчны яам байгуулагдсан. Дээр нь сэтгүүлчид дуу хоолойгоо хүргэж эхэлсэн. Ц.Балдорж сэтгүүлч “Далай ээж цаазын давцанд”, Буриадын алдартай сэтгүүлч, зохиолч хүртэл “Дэлхийд ганцхан Байгаль нуур” гээд алдартай нийтлэлээ бичиж байлаа. Хэдийгээр дээрх ордыг ашиглах нь улс орны хөгжилд тустай ч Хөвсгөл нуурын экосистемд аюултай гэж салбар яамны зүгээс эсэргүүцсэний ачаар 1986-1990 гэхэд Орос-Монголын хамтарсан багийг татан буулгасан. Татан буулгахад хоёр зүйл нөлөөлсөн л дөө. Эхнийх нь сая хэлсэн зүйл. Нөгөөх нь ардчилсан тогтолцоонд шилжих үед томоохон үйлдвэрүүд татан буугдсан. Энэ нь ч бас нөлөөлсөн. Одоогийн Хатгал сум тухайн үед 6000 гаруй хүн амтай тосгон байлаа. Орд хаагдснаар хүн амын олонх нь Мөрөн рүү нүүсэн. Гэтэл иргэд “Хөвсгөл нуурын захиргааг татан буулга, иргэдийн амьдрал хэцүүдлээ” гэж 10 гаруй жил эсэргүүцсэн. Эргээд харахад Хөвсгөлийн тусгай хамгаалалттай газар нутгийн хамгаалалтын захиргааны газрын ажилчид, БОАЖЯ-ны хүчин чармайлтын үр дүнд Хөвсгөл нуур аврагдсан юм болов уу. Энд нэг зүйл нэмж хэлэхэд, НҮБ-ын санхүүжилтээр БОАЖЯ-нд “Алтай саяны төсөл” хэрэгжих үед би хамтарч ажилласан юм. Эндээс Хөвсгөл аймгийн газар нутгийн 50 дугаар өргөрөгөөс хойших газар нутагт уул уурхайн үйл ажиллагаа явуулахыг хориглосон юм. 2009-2014 онд таван жилийн хугацаатай хориглож, орон нутгийн тусгай хэрэгцээнд авсан гэсэн үг. Энэ бол Монголын түүхэнд байгаагүй шийдвэр. Дараа нь 2014 онд хүчинтэй хугацаа дуусах үед манай Улаан тайгын УТХГХЗ-наас хугацааг нь 25 жилээр сунгах хүсэлт гаргахад БОАЖЯ-ны удирдлагууд дэмжсэн. Үүний хүчинд аймгийн ИХТ-аас 25 жилээр сунгах шийдвэр гаргасан юм. Зарим аймгийн нутаг дэвсгэр уул уурхайгаас болж ямархуу хүндрэлтэй байгаа билээ. Гэтэл манай аймаг 57 сая га талбайгаа тусгай хамгаалалтад авсан. Өмнө нь ашиглалт, хайгуулын 44 тусгай зөвшөөрөл олгосон байсан. Эдгээрийг 2009 оны шийдвэрээр хугацааг нь сунгахгүй байсаар одоо нэг ч зөвшөөрөл байхгүй. Гайхалтай байгаа биз. Манай аймаг шиг газар нутгаа орон нутгийн болон Улсын тусгай хамгаалалтад авсан газар байхгүй.

-Байгаль хамгаалагчид үүрээр гараад шөнө дөлөөр гэртээ ирэх энүүхэнд. Заримдаа хулгайн модчин, хууль бус анчидтай нүүр тулгардаг гэхээр эрсдэлтэй, бас хэцүү ажил гэдэг нь ойлгомжтой. Үүнд амьдралынхаа 31 жилийг зориулахад юу нөлөөлсөн бэ?

-Энгийн хүний нүдээр харвал ойлгоход хэцүү л дээ. Юун цагдаа, юун хилийн цэрэг. Маш хэцүү ажил. Энэ ажлыг нэгдүгээрт, дур сонирхолтой хүн, хоёрдугаарт, сэтгэлтэй хүн хийдэг. Байгаль хамгаалагчид байгалиа хамгаалсныгаа цалин авахын төлөө хийлээ гэж боддоггүй. Надаас эхлээд манай хамт олон ингэж боддог. Бидний сарын цалин 400 мянган төгрөг. Гэхдээ бид хэзээ ч цалингаа нэмүүлье гэж жагсаагүй, гомдоллоогүй. Энэ хэмжээний мөнгийг таксинд явахад л хэдхэн хоногийн дотор олчихно. Гэтэл бид бүтэн сар уул, хадаар тэнэж байж ийм хөлс авдаг. Гэхдээ үүндээ сэтгэл хангалуун байдаг. Яагаад гэвэл бид эх орноо, байгаль дэлхийгээ хамгаалж байна. Нөгөөтэйгүүр, байгалийн ажил хүнийг өөртөө маш их дурлуулж, татдаг. Өөрөөр хэлбэл, тэр согоо маань янзаглсан болов уу, хулгайн анчны өгөөш болчихоогүй байгаа гэдгээс эхлээд сэтгэлд үргэлж хадаатай явдаг. Ийм бодол сэтгэлд тээглэж явсаар сүүлдээ үүндээ хүлэгддэг. Өглөө гараад шөнө гэртээ ирнэ гэсэн ойлголт бидэнд байхгүй. Хамгийн багадаа 3-5 өдөр уул, хадаар явна. Би гэхэд залуу байхдаа 290 гаруй хоног ууланд амьдарч байлаа.

-Олон сараар явах үед эхнэр, хүүхэд чинь дургүйцэхгүй юү?

-Эхнэр маань Архангай аймгийн Их тамир сумынх. Айлын эрх танхил охиныг хайрлана, халамжилна гэж авч суусан хэрнээ нус, нулимсыг нь их барсан даа. Олон хоногоор явахаар дөрвөн хүүхдээ эхнэр маань л халамжилна. Бүсгүй хүн уулын мухарт дөрвөн хүүхэдтэй хоцрох юу нь сайхан байх вэ. Бараг 10 сар шахуу явж ирээд хэд хоночихоод буцах гэтэл хүүхдүүд цулбуурнаас зуураад уйлалдчихсан. Тэгэхээр нь цулбуураа шувт татаж аваад эргэж ч харалгүй мод руу орсныхоо дараа эргэж хараад нулимсаа арчиж байлаа. Иймэрхүү зүйл зөндөө тохиолдож байсан. Эхнэр маань эхний хэдэн жил их уурлаж, бухимддаг байлаа. Сүүлдээ “Энэ хүнд яаж ч хэлээд нэмэргүй. Уул руугаа явах нь тодорхой” гэж бодсон байх. “Чи хэзээ явахаа битгий хэл. Чимээгүй л явж бай” гэж хэлсэн юмдаг.

-Нэг талаасаа байгаль хамгаалах нь хувь хүний соёл, ёс суртахуунтай салшгүй холбоотой. Ар гэрээ орхих хэмжээний эрсдэл, зориг гаргаад ажлаа хийх үед арагшаа сэтгэл хорогдоно биз.

-Яг ийм бодол өдөр бүр сэтгэл дотор эргэлддэг байсан. Одоо ч тэр мэдрэмж унтраагүй байна. Явж байгаа зориг нь тэр боловч явснаас хойших сэтгэл хорогдох шалтгаан нь ар гэр шүү дээ. Гэхдээ ийм сэтгэлдээ автах юм бол байгаль хамгаалагчаар ажиллах хэрэггүй. Нэгэнт энэ замыг сонгосон бол ажиллах л хэрэгтэй. Үүний тулд гэртээ байх хугацаандаа түлээ түлшээ хангалттай бэлтгэхээс эхлээд бүхий л шаардлагатай зүйлээр нь хангах хэрэгтэй. Ийм байхад сэтгэл зовних нь арай бага. Олон сар, өдөр яваад гэртээ ирэхдээ их айна аа. Юу болсон бол, яасан бол гээд л. Ядаж харилцаа холбоо хөгжөөгүй байсан үе. Холоос дурандаж дурандаж очно. Очих замдаа “Яаж буцаж явна даа” гэж зүрх алдана. Тиймдээ ч харих замдаа морио аргамжиж үлдээдэг заль хэрэглэдэг болсон. Уул руу буцах үедээ хээрээс морио барьж аваад явна. Тэгэхгүй бол гэрийн гаднаас морьдвол хүүхдүүд уйлалдаад явуулахгүй шүү дээ. Дээр нь дурангаас өөр “зэвсэггүй”. Ууланд олон хоног ажиллах үед үер, усны аюул болно, цасан шуурга шуурна, араантантай нүүр тулна, уул, хаднаас унана, морио алдах гээд олон эрсдэлтэй нүүр тулгардаг. Энэ бүхэнтэй зохицох нь тайгын хууль. Тайгад үүнээс өөр ямар ч хууль хэрэгжихгүй.

-Иргэдийн 20 хувь нь байгаль хамгаалах ажлыг эсэргүүцэж, 80 хувь нь дэмждэг гэж та хэлсэн. Байгаль хамгаалагчдын амь нас, эрүүл мэндэд заналхийлсэн тохиолдол бий юү?

-Өмнө нь хүний ааш араншин сайхан байж. Одоо үед араатан, амьтнаас илүү хүнээс айдаг болж. Ууланд хүний бараа харагдвал сайн ажиглаж, шинжиж байж уулзана. Ямар санаа, бодолтойг мэдэхгүй шүү дээ. Ийм үед бидний амь нас, эрүүл мэнд эрсдэлд орохгүй гэх баталгаагүй. Ядаж хоёулаа эргүүл хийх хэрэгтэй. Харилцаа холбооны төхөөрөмжийг сайжруулах ёстой. Эрсдэлийн хувьд 1994 онд нууранд тавьсан торыг нь хураалаа гэж манай нэг байгаль хамгаалагчийг хутгалсан хэрэг гарсан. Азаар морин чарга нь айлын гадаа очсоноор Батжаргал маань амь аврагдсан. Үүнээс гадна амь насыг нь хороосон, машинаар чирсэн, гар, хөлийг нь хугалсан олон хэрэг гарсан. Даанч энэ бүхэн нь тэгс ингэс гээд дарагдсан даа.

-Байгаль хамгаалагчид хулгайн анчинтай таарвал ямар тактик хэрэглэдэг юм бэ. Үйлдлийг нь баримтжуулж, баривчлах уу. Эсвэл отолт хийж баривчлах уу?

-Аль болох хүчирхийлэлд хүргэхгүй байх арга хэмжээ авна. Үүний тулд нарийн тактик хэрэглэдэг. Эхлээд аль нутгийн, ямар хүн бэ гэдгээс тухайн хулгайн анчинд үнэлэлт өгнө. Тэгж байж очих эсэхээ шийддэг. Очихгүй бол баримтыг нь араас нь цуглуулах, өмнө нь отолт хийх, эсвэл олны өмнө гарч ирэхээр нь баривчлах гээд олон арга бий. Энэ бүхнийг байгаль хамгаалагч өөрөө зохицуулж, ямар тактик хэрэглэхээ шийддэг. Нэг удаа Модотын шанаа гэдэг газарт таван морьтой хүнтэй замд таарсан юм. Сэжиг бүхий санагдахаар нь машинаа түрүүлж явуулаад өөрөө ард нь үлдсэн. Хажуугаар морьтой хүмүүс өнгөрөх үед нь хоёр морьных нь тамгыг тогтоочихлоо. Дараа нь хавь ойрын айлуудад тийм тамгатай морь бий эсэхийг судалсан. Тэгж, тэгж сэжиг бүхий нэг айлд ороод “Ууланд ийм тамгатай хоёр морь уяатай байна. Цулбуурандаа орооцолдсон байхаар нь хазаарыг нь аваад тавьчихлаа” гэж хэлтэл айлын авгай “Хүүе, манай морь байна. Хотоос хүмүүс ирээд анд явсан юм” гэж ам алдсан. Маргааш нь анчдыг харих үед нь отолт хийж баривчлахад бор гөрөөс агнасан байсан. Энэ байтугай юм болно оо.

-Мөр мөшгөх гэж айхтар шинжлэх ухаанд та нар яаж суралцдаг юм бэ?

-Тухайн хүний авьяас л даа. Хэнээсээ сурах вэ дээ. Өөрсдөө сурсан зүйлээ шинэ залуустаа зааж өгнө. Олон жилийн ажлын туршлага юм даа. Манай байгууллагад яггүй сайн мөрч залуу хэд хэд бий. Би ч тэдний тоонд орно. Хулгайн анд явж болзошгүй айлын адууны туурайн мөрийг андахгүй гэвэл чи итгэх үү.

-Бүгдийг нь үү?

-Бараг л бүгдийг нь. Энэ хэдэн өдрийн өмнө, хэдэн цагт гишгэсэн мөр байна гэдгийг нэг хараад л шууд хэлж чадна. Хэдэн сарын дараа ч гэсэн адуун сүргийн дундаас хараад танина. Жишээлбэл, хэрээ мах зуучихсан нисч явахтай манайхан таарсан юм. Хэрэг бишидсэн байна гэж таамаглан мод руу ортол бараг 20-иод хоногийн өмнө алагдсан бугын сэгтэй таарсан юм. Мөр хайлаа. Гэтэл нэг гутлын мөр олдов. Олдох олдохдоо ямар мөр байсан гэхээр гутлынхаа улыг мотоциклын дугуйны олгой хаймераар уллачихсан байж таарсан. Энэ сэжмээр хайсаар дөрвөн өдрийн дараа хулгайн анчинг олсон юм даа. Тэгэхээр байгаль хамгаалагчид зөвхөн байгалиа хамгаалдаг биш хилийн цэрэг, цагдаа, прокурор, гал сөнөөгч гээд маш олон ажил давхар хийдэг болж таарч байгаа биз.

-Зөрчлийн тухай хууль мөрдөгдөөд багагүй хугацаа өнгөрлөө. Энэ хууль байгаль орчныг хамгаалж байгаа та бүхний ажилтай хэр уялдаж байна вэ?

-Байгаль орчны тухай хууль олон удаа өөрчлөгдсөн. Гэхдээ сайжирсан уу гэхээс дордсон зүйл байхгүй. Зөрчлийн тухай хууль салбарын тухай хуультай тэр дундаа бидний ажилтай нэг их уялдаж өгөөгүй юм болов уу. Суурин газарт амьдарч байхад байгаль орчны хууль, тогтоомжийг зөрчсөн үйлдэл гарахгүй. Хаана, хэзээ үйлдэгддэг вэ гэхээр тусгай хамгаалалттай бүс нутаг, эзгүй ууланд л зөрчил гардаг. Манай Улаан тайга гэхэд газарт утасны ямар ч сүлжээ байхгүй. Бид ийм нөхцөлд Хөвсгөлийн гурван тайгын дархан цаазтай газрыг хамгаалдаг. Машин байтугай морь хүртэл хүрч чаддаггүй газар гээд боддоо. Явганаар эсвэл цаагаар очно. Ингэхдээ дөрвөн өдөр явах шаардлагатай. Гэтэл Зөрчлийн тухай хуулиар тухайн зөрчлийг илрүүлснээс хойш 24 цагийн дотор прокурорт мэдэгдэх ёстой. Энэ ямар ч боломжгүй. Ууланд хэн байх вэ. Зөрчил гаргагч этгээд, байгаль хамгаалагч хоёр л байна биз дээ. Гэрч хаанаас олох вэ. Зөрчлийг баримтжуулна гэхээр юугаараа баримтжуулах вэ. Манай 30 гаруй байгаль хамгаалчийн дунд зургаан ширхэг зургийн аппарат бий. Үүнийгээ дамжуулж хэрэглэдэг. Гар утасны камераар зураг авъя гэхээр олонх нь сүлжээ сайн барьдагаар нь Жи-Мобайлын антеннтай утас барьдаг. Энэ мэтчилэн зарим хууль, тогтоомж бодит байдалтайгаа уялдахгүй байна. Байгаль хамгаалах салбарт хууль, эрхзүйн шинэчлэл хийж байгаатай уялуулаад байгалийн гэмт хэргийг хянаж, шалгадаг эрх бүхий прокурорыг тусгай хамгаалалтын захиргааны газруудад ажиллуулах хэрэгтэй. Монголд 33 хамгаалалтын захиргаа, 102 тусгай хамгаалалттай газар бий. Тэнд гарсан зөрчлийг аймгийн ганц нэгхэн прокурор хянан шийдвэрлэхэд хүндрэлтэй.

-Байгаль орчин, аялал жуучлалын яамны 30 жилийн ой тохиож байна. Яам байгуулагдснаар байгаль хамгаалах ажилд эерэгээр нөлөөлж чадсан уу?

-Суурь бодлогыг тодорхойлох яамтай болсноор тогтвортой ажиллах боломж бүрдсэн. Тэр дундаа тусгай хамгаалалтын бүс нутагт авах арга хэмжээг салбар яамны зүгээс эрчимтэй дэмжиж ирсэн. Үүний үр дүнд Монгол Улсын нийт нутаг дэвсгэрийн 18 хувийг тусгай хамгаалалтад авлаа. Цаашид энэ хэмжээг 30 хувьд хүргэхээр зорьж байгаа юм билээ.

-Яамны зүгээс байгаль хамгаалагчдаа дэмжих тал дээр ямар бодлого баримталж ажилладаг вэ. Сэтгэл хангалуун байж чаддаг уу?

-Өмнө нь зөвхөн ой хамгаалагч гэдэг статустай байсан. Харин одоо байгаль хамгаалагч буюу зөвхөн ой хамгаалах бус ан амьтан, нутаг усыг тэр чигт нь хамгаалах чиг үүрэгтэй болсон. Дээр нь хууль сурталчлах, хэрэгжүүлэх, судалгаа мониторинг хийх эрх, үүрэгтэй болсон. Түүнчлэн бидний цалин хөлс, хангамжийн асуудалд шат дараалж анхаарч байна. Өмнө нь төрийн үйлчилгээний албан хаагчаар цалинждаг байсан бол одоо төрийн захиргааны албан хаагчаар цалинжиж байна. энэ мэтчилэн дэвшилттэй зүйл олон бий. Ярианыхаа төгсгөлд Байгаль орчин, аялал жуучлалын яам байгуулагдсны 30 жилийн ойн мэндийг үе үеийн байгаль хамгаалагчид болон салбарын нийт ажилчдадаа хүргэе.

Эх сурвалж: Үндэсний шуудан

МАН ирэх долоо хоногт Их хурлаараа намын даргаа сонгоно

Нийгслэлийн прокурорын газар, Эрүүгийн цагдаагийн газрын Хар тамхитай тэмцэх газар хамтарсан шалгалт хийж БНХАУ-аас мансууруулах бодис хууль бусаар улсын хил нэвтрүүлсэн байж болзошгүй этгээдүүдийг илрүүлэн баривчилжээ.

Ц.Даваасүрэн: Б.Хурц ”Үргэлжлүүлэх үү?” гээд байна лээ, үргэлжлүүлье л дээ, юунаас нь айдаг юм?

Антибиотикийн буруу хэрэглээ нь аюулыг бий болгож байна

Монгол Улсын Их Хурлын дарга М.Энхболдод өнөөдөр (2017.11.17) Төв банкны тухай хуульд нэмэлт, өөрчлөлт оруулах тухай хуулийн төслийг УИХ-ын гишүүн, Засгийн газрын гишүүн, Шадар сайд Ө.Энхтүвшин өргөн мэдүүллээ.



Аливаа улсын төв банкны бие даасан, хараат бус байдлыг үнэлэх олон улсад хүлээн зөвшөөрөгдсөн, индекс аргачлал болон манай улсын дотоодын эрдэмтэн судлаачдын үнэлгээгээр Монголбанкны бие даасан, хараат бус байдал нь “хангалтгүй” буюу 0-1 оноогоор тооцсноор 0.5-0.6 орчим хувьтай байна. Энэхүү хангалтгүй байдал инфляцийн өндөр хэлбэлзэл, гадаад валютын улсын нөөцийн хомсдол, Монголбанкны өөрийн хөрөнгийн алдагдал зэрэг макро эдийн засгийн тоон үзүүлэлтээс харагдаж байна. Иймд Төв банкны бие даасан, тогтвортой байдал нь үнийн түвшний тогтвортой байдалтай удаан хугацаанд шууд хамааралтай байдаг талаар тогтоосон судалгааны ололтод тулгуурлан Монголбанкны бие даасан, хараат бус байдлыг дээшлүүлснээр эдийн засагт үүсч буй бэрхшээл, асуудлыг шийдвэрлэх нь хуулийн төсөл боловсруулах шаардлага, зорилго болсон гэж Шадар сайд Ө.Энхтүвшин хэллээ.



Төв банк (Монголбанк)-ны тухай хуульд нэмэлт, өөрчлөлт оруулах тухай хуулийн төсөлд Төв бие даасан, хараат бус байдлын үзүүлэлтийг тооцсон индексийн үзүүлэлтийг нэмэгдүүлэх үүднээс Монголбанкны үндсэн зорилтыг дэлхийн нийтийн түгээмэл, чиг хандлага болсон “Үнийн тогтвортой байдал” болгон өөрчлөх, мөнгөний бодлогыг боловсруулах, УИХ зөвхөн хуульд заасан “мөнгөний бодлогын зорилт”-ыг баталж, энэ дагуу Монголбанкнаас хэрэгжүүлдэг болох, Монголбанкны удирдлага буюу Монголбанкны Ерөнхийлөгч, Тэргүүн дэд ерөнхийлөгч, Дэд ерөнхийлөгч нарыг албан тушаалд томилох шалгуур, чөлөөлөх үндэслэл журмыг нарийвчлан тогтоох, Монголбанкнаас баримтлах мөнгөний бодлогын зорилтын төслийг хэлэлцдэг, мөнгөний бодлогыг хэрэгжүүлэх шийдвэр гаргадаг “Мөнгөний бодлогын зөвлөл”, банкны хяналт шалгалтын шийдвэрийг гаргах “Банкны хяналт шалгалтын хороо”, Монголбанкны бусад үйл ажиллагаа, төсөв санхүүтэй холбоотой шийдвэрийг гаргах “Удирдах зөвлөл” байгуулахаар тусгаж, төсвийн шинж чанартай санхүүжилт- хөтөлбөрийг Монголбанкнаас санхүүжүүлж, мөнгөний бодлогын зорилт үр нөлөөг алдагдуулдаг байдлыг арилгах зорилгоор Засгийн газарт зээл олгох, Засгийн газрын үнэт цаасыг худалдан авах Монголбанкны үйл ажиллагааг тодорхой зааж, хязгаарлалтыг тусгажээ хэмээн УИХ-ын Хэвлэл мэдээлэл, олон нийттэй харилцах хэлтсээс мэдээлэв.

Нийслэлийн засаг дарга бөгөөд Улаанбаатар хотын захирагч С. Батболд НИТХ-ын дарга С.Амарсайханд 2018 оны нийслэлийн төсвийн төслийг өргөн барилаа. С.Амарсайхан хэлэхдээ энэ сарын 24-нд НИТХ-ын 12-р ээлжит хуралдаан болно. Энэ хурлаар нийслэлийн төсвийн төслийн асуудлыг хэлэлцэх болно гэж НИТХ-ын хэвлэлийн албанаас мэдээллээ.

УБТЗ-ын Зүүнхараа дахь ачааны вагон засварын депогийн хамт олон олон улсын чанарын менежментийн тогтолцоо ISO 9001:2015 / MNS ISO 9001:2016 стандартыг нэвтрүүлсэн гэрчилгээ авлаа. УБТЗ-ын хэмжээнд анх удаа олон улсын чанарын ISO 9001:2015 / MNS ISO 9001:2016 стандартыг нэвтрүүлснээр тус депогийн засвар угсралтын ажлын чанар стандарт олон улсын хэмжээнд хүлээн зөвшөөрөгдөж байгаа юм. Ингэснээр өөрийн төдийгүй ОХУ, БНХАУ-ын оператор компаниудын ачааны вагонуудын засвар үйлчилгээг олон улсын чанарын түвшинд хийдэг болох юм.. Зүүнхараагийн ачааны вагон засварын депо нь жилдээ 2400 ачааны вагон засварладаг бөгөөд тус депогийн өргөтгөлийн ажил хийгдэж дууссанаар хүчин чадал нь 45 орчим хувиар нэмэгдэж жилд 3800 орчим вагон засварладаг болно. Одоо тус депо нь УБТЗ-ын өөрийн ачааны вагонуудаас гадна БТЕГ, МТЗ компаниудын вагонуудыг засварлаж байна. Цаашдаа тус депо нь засвар үйлчилгээ хийхээс гадна дотооддоо вагон угсардаг болох бөгөөд энэ жил туршилтаар 5 вагон угсарч тээвэрт амжилттай оролцож байна.

Б.Хурц УИХ-ын гишүүн Ж.Батзандангийн амь насанд заналхийлсэн талаар бид мэдээлсэн билээ.

Өнөө шөнө баруун аймгуудын нутгийн зүүн хэсэг, төвийн аймгуудын нутгаар, маргааш өдөр төв,

Нийслэлийн Баянзүрх дүүргийн ’’Мандала’’ хотхонд баригдаж байгаа барилгын суурийн давхарын

Нийслэлийн Газрын албанаас жил бүр газрын төлбөрөөр тодорхой хэмжээний мөнгийг улсын төсөвт төвлөрүүлдэг. Энэ жилийн хувьд хэдэн төгрөг төвлөрүүлэх, биелэлт ямар байгаа, иргэн аж ахуйн нэгжүүд газрын төлбөрөө төлөхдөө юу анхаарах ёстой зэргийг нийслэлийн Газрын албаны Газрын үнэлгээ, төлбөрийн хэлтсийн мэргэжилтэн Д.Амарбаясгалангаас тодрууллаа.

-Газрын төлбөр гэж юуг хэлж байгааг та эхлээд тайлбарлаад өгөхгүй юу?

-Монгол улсын Үндсэн хуульд “Монгол Улсын иргэнд өмчлүүлснээс бусад газар төрийн өмч мөн” гэж заасан байдаг. Тэгэхээр нэг ёсондоо төр иргэн, аж ахуйн нэгж, байгууллагад өмчөө эзэмшүүлж, ашиглуулсны төлөө авч буй төлбөр юм.

-Газар эзэмших, ашиглах эрхтэй иргэн, аж ахуйн нэгж байгууллагууд газрын төлбөрийг жилд хэдэн удаа төлөх ёстой байдаг вэ?

-Газрын төлбөрийн тухай хуулийн 9 дүгээр зүйлийн 2 дахь хэсэгт зааснаар жилийн төлбөрийг тэнцүү хувааж улирал бүрийн эхний сарын 25-ны өдрийн дотор төлнө. Тухайлбал 1-р сарын 25, 4-р сарын 25, 7-р сарын 25, 10-р сарын 25-ны дотор төлөх ёстой. Газрын төлбөрийн онцлог нь тухайн улирлынхаа эхэнд төлөгддөг гэдгийг газар эзэмшигч, ашиглагч тэр бүр анзаардаггүй.

-Хэрвээ заасан хугацаандаа төлөөгүй бол ямар арга хэмжээ авдаг вэ?

-Газрын төлбөрөө хугацаанд нь төлөөгүй иргэн, аж ахуйн нэгжид хугацаатай мэдэгдэл өгч, заасан хугацаанд газрын төлбөрийн үлдэгдлээ төлөөгүй тохиолдолд төлбөр барагдуулахаар шүүхэд нэхэмжлэл гаргадаг. Мөн удаа дараа Газрын албанаас тавьсан шаардлагыг хэрэгжүүлэлгүй газрын төлбөрөө төлөхгүй байгаа газар эзэмшигч, ашиглагчийн газрын эрхийг Газрын тухай хуулийн 40 дүгээр зүйл 40.1.1, 40.1.5 дахь заалтуудыг үндэслэн хүчингүй болгох хүртэл арга хэмжээ авдаг.

-Газрын төлбөрөө удаан хугацаагаар төлөөгүй тохиолдолд иргэд мэдэгддэг үү?

-Нийслэл, дүүргийн Газрын алба иргэн, аж ахуйн нэгжүүдэд бүгдэд нь газрын төлбөрөө төлөх талаар утас, мессеж, факс, цахим хаяг зэргээр холбогдож, газрын төлбөрийг нэхэмжлэн ажилладаг. Гэхдээ иргэн, аж ахуйн нэгж, байгууллага газрын гэрээ байгуулахдаа манай байгууллагад бүртгүүлсэн хаяг, утсаа өөрчилсөн тохиолдолд холбогдох боломжгүй байдаг. Тэгэхээр газар эзэмшигч, ашиглагч нар холбогдох хаяг, утас зэргээ өөрчилсөн тохиолдолд ирж мэдээллээ шинэчлүүлэх хэрэгтэй.

-Энэ жилийн хувьд газрын төлбөрөөс хэдэн төгрөгийг төвлөрүүлэхээр тусгагдсан байгаа вэ. Биелэлт нь хэдэн хувьтай байна?

-2017 онд нийслэлийн төсөвт Газрын төлбөрөөс 30.5 тэрбум төгрөг төвлөрүүлэх төлөвлөгөөтэй ажиллаж байна. Өнөөдрийн байдлаар 27.2 тэрбум төгрөг төвлөрүүлэн биелэлт 89 хувьтай байна.

-Ирэх онд газрын төлбөрөөс хэдэн төгрөг төвлөрүүлэх вэ?

- 2018 онд Нийслэлийн төсөвт газрын төлбөрөөс 30.5 тэрбум төгрөг төвлөрүүлнэ.

-Иргэд газрын төлбөрийн талаар мэдээлэл авахыг хүсвэл хаана хандах ёстой вэ?

-Газрын төлбөртэй холбоотой мэдээлэл авахыг хүсвэл Нийслэлийн газрын албаны Газрын үнэлгээ, төлбөрийн хэлтэс болон харьяа дүүргийн Газрын албаны төлбөрийн байцаагч нарт хандаж болно. Мөн Нийслэлийн газрын албаны Gazar.ub.gov.mn хаягаар орж холбогдох мэдээлэлтэй танилцаж болно.

-Газрын төлбөрийг яаж тооцдог вэ?

-Газрын төлбөрийг дүүргийн Иргэдийн Төлөөлөгчдийн Хурлаар батлагдсан “Газрын төлбөрийн итгэлцүүрийг хэрэглэх газрын зааг, хязгаар, итгэлцүүрийн тоон утгыг тогтоох тухай” тогтоолд үндэслэн эзэмшиж, ашиглаж буй нийт газрын хэмжээгээр тооцон боддог. Одоогоор мөрдөгдөж буй дүүргийн Иргэдийн Төлөөлөгчдийн Хурлын тогтоолууд нь газрын үнэлгээний 5 бүс, газар ашиглах 15 зориулалтаар 1 м.кв газрын төлбөрийг тогтоосон байдаг.

Жишээ нь, хотын төвд 700 м.кв газрыг үйлчилгээний зориулалттай эзэмшдэг гэж бодъё. Газрын төлбөрийн бүсийг 1 гэж үзвэл 1 дүгээр бүсэд үйлчилгээний зориулалттай газар 1 м.кв-д 440 төгрөгөөр бодогддог. Тэгэхээр жилийн газрын төлбөр нь 700 м.кв * 440 төгрөг = 308’000 төгрөг болж байна. Үүнийгээ 4 улиралд хувааж төлнө гэсэн үг.

УИХ-ын чуулганы нэгдсэн хуралдааны эхэнд Банкны тухай хуульд нэмэлт, өөрчлөлт оруулах

Их эзэн Чингис хааны мэндэлсний 855 жилийн ой, “Монгол бахархлын өдөр” тахиа жилийн өвлийн тэргүүн сарын шинийн нэгэн буюу арваннэгдүгээр сарын 19-ний Ням гарагт тохионо.

Улаанбаатар хотыг ногоон байгууламжгүй хэмээн ихэд шүүмжилдэг. Тэр хэрээр иргэд байгууллагууд урин цагт мод тарьж, ногоон байгууламжаа нэмэгдүүлэхийг хичээдэг ч зарим нэг хүмүүс

Нийслэлийн Статистикийн газраас энэ долоо хоногийн өргөн хэрэглээний бараа бүтээгдэхүүний үнийн судалгааг гаргажээ.

Нийслэлийн удирдах ажилтны ээлжит шуурхай зөвлөгөөн өнөөдөр боллоо. Хуралдааны эхэнд өнгөрсөн зөвлөгөөнөөр нийслэлийн Засаг даргын өгсөн үүрэг даалгавар болон түүний биелэлтийн талаар НЗДТГ-ын Хяналт шинжилгээ, үнэлгээний хэлтсийн дарга Х.Гантулга танилцууллаа.

Нийслэлийн цагдаагийн газрын дарга, цагдаагийн хурандаа Д.Ядамдорж “Өнгөрсөн 14 хоногийн хугацаанд гэмт хэрэг, зөрчил, зам тээврийн ослын шинжтэй 25574 дуудлага, мэдээлэл хүлээн авсан нь өмнөх 14 хоногтой харьцуулахад 2.8 хувиар, гэмт хэргийн шинжтэй 1000 үйлдэл бүртгэгдсэн нь 2.1 хувиар тус тус буурсан үзүүлэлттэй байна. Гэр оронгүй, тэнэмэл иргэд болон хараа хяналтгүй хүүхдүүдийг илрүүлэх, бүртгэл судалгаанд авах, эмнэлгийн үзлэгт хамруулах, эцэг эх, асран хамгаалагчийг нь олж тогтоох, нийгэмшүүлэх, нийгмийн хамгааллын төв болон халамжийн төвд хүлээлгэн өгөх, эрх зүйн тусламж үзүүлэх ажлыг төрийн болон төрийн бус байгууллагатай хамтран хэрэгжүүлэх ажлыг энэ сарын 15-ны өдрөөс эхлүүлээд байна. Арга хэмжээний хүрээнд нийслэлийн хэмжээнд тэнэмэл байдлаар амьдардаг 614 хүнийг олж тогтоон гарын хээг санд бүртгэн эрүүл мэндийн үзлэгт хамруулж, сүрьеэгийн тандалт шинжилгээнд хамруулсан. Мөн амь нас эрүүл мэнд, аюулгүй байдлыг нь хангах зорилгоор архины эмчилгээнд 61 хүн, Нийгмийн хамгааллын тусгай төвд 152 хүн, Хан богд төрийн бус байгууллагад 10 хүн, Шинэ амьдрал төрийн бус байгууллагад 10 хүнийг тус тус хүлээлгэн өгсөн” гэж танилцуулав.

“Замын цагдаагийн албаны Мэдээлэл шуурхай удирдлагын хэлтэст 3381 дуудлага мэдээлэл ирснээс хүн гэмтсэн хэргийн шинжтэй 100, зөрчлийн шинжтэй 922 дуудлаганд очиж хойшлуулшгүй ажиллагаа явуулан, 100 ослыг материалжуулан шалгаж байна. Гудамж замд хийсэн шалгалтаар илэрсэн зөрчил өмнөх оны мөн үетэй харьцуулахад 7.1 хувиар буурсан үзүүлэлттэй байна” гэж Нийслэлийн цагдаагийн газрын Замын хөдөлгөөний хяналтын газрын дарга, дэд хурандаа Б.Эрдэнэбат хэллээ.



Нийслэлийн онцгой байдлын газрын дэд дарга, хурандаа А.Дашням “Өнгөрсөн 14 хоногийн хугацаанд хүйтэрч зарим өдрүүдэд бага зэргийн цастай байлаа. Ойрын өдрүүдэд нийслэл хот орчмоор бага зэргийн цас орж, өдөртөө -17 хэм, шөнөдөө -26 хэм хүртэл хүйтрэх урьдчилсан төлөвтэй байна. Энэ сарын 10-ны өдөр Баянзүрх дүүргийн 5 дугаар хороо, 15 дугаар хорооллын 204 дүгээр байрны 8 давхарын гадна фасатны дулаалга хийж байсан дүүжин шатны түгжээ мултарч 20-26 насны 4 иргэн унаж, 2 иргэн газар дээрээ нас барж, 2 иргэнийг Гэмтэл согог судлалын үндэсний төвд хүргэх замд нас барсан. Налайх дүүргийн 3 дугаар хороонд энэ сарын 14-ны өдөр иргэн Д.Эрдэнэцогтын бичил уурхайн налуу амны 140 метрийн гүнд нуралт үүсч хувиараа нүүрс олборлогч 4 иргэн нүүрсэнд дарагдсан дуудлагаар Уул уурхай аврах ангийн 20 алба хаагч, 3 автомашинтайгаар ажиллаж 30-45 насны 4 иргэнийг эсэн мэнд гарган дүүргийн Эрүүл мэндийн нэгдэлд шилжүүлэн өгсөн. Мөн дүүргийн 3-р хороонд иргэн Д.Батболдын бичил уурхайн налуу амны 125 метрийн гүнд нуралт үүсч хувиараа нүүрс олборлогч 2 иргэн нүүрсэнд дарагдсан дуудлагаар Уул уурхай аврах ангийн 53 алба хаагч, 5 автомашинтайгаар ажиллаж 47, 28 настай 2 осолдогчийг гаргаж харъяа дүүргийн цагдаагийн байгууллагад хүлээлгэн өгсөн. Хүйтний улирал эхэлж, гэр хорооллын айл өрхүүдийн галлагаа нэмэгдэж байгаатай холбогдуулан гал түймрийн аюулаас урьдчилан сэргийлэх арга хэмжээ, хөдөлгөөнт ухуулга, сурталчилгаа, сургалтыг гэр хорооллын айл өрхүүд болон аж ахуйн нэгжүүдэд зохион байгуулж, хяналт, шалгалт явуулж байна” гэж танилцууллаа.



“Зөрчлийн тухай хуулийн зөрчил шалган шийдвэрлэх ажиллагааны дагуу мэргэжлийн хяналтын улсын /ахлах/ байцаагчид 791 зүйл заалтаас 686 зүйл заалтын дагуу хяналт шалгалт хийж байна. Ирсэн өргөдөл, гомдол болон хяналт шалгалтаар илэрсэн зөрчилийн хүрээнд нийт 281.6 сая төгрөгийн торгууль ногдуулсан. “Хот тохижилт, цэвэрлэгээний талаар албан байгууллага, аж ахуйн нэгж, иргэдээс дагаж мөрдөх журам”-ын хэрэгжилтийн хүрээнд 151 улсын /ахлах/ байцаагч Улаанбаатар хотын нутаг дэвсгэрт үйл ажиллагаа явуулж буй иргэн, аж ахуйн нэгж байгууллагын их цэвэрлэгээний ажилд хяналт тавьж ажиллалаа. Нийслэлийн нутаг дэвсгэр дэх 2439 иргэн, аж ахуйн нэгж, байгууллагыг цас мөсний цэвэрлэгээнд хамруулж, 1239 мэдэгдэл тараан зөвөлгөө өгч, нийт 530929 м2 талбайг цэвэрлүүлж, 624 зөрчлийг газар дээр нь арилгуулсан” гэж Нийслэлийн Мэргэжлийн хяналтын газрын дарга Л.Эрдэнэчулуун ярилаа.

Зөвлөгөөний төгсгөлд Нийслэлийн Засаг дарга бөгөөд Улаанбаатар хотын захирагч С.Батболд “Нийслэлийн 2017 оны төсвийн тодотголыг Нийслэлийн иргэдийн Төлөөлөгчдийн Хуралд өргөн барьсантай холбогдуулан НИТХ-ын Дэд хороо, Намын бүлгийн хуралдаанаар хэлэлцэх тул Нийслэлийн нутгийн захиргааны нийт байгууллагуудын удирдлагууд идэвхтэй оролцох нь зүйтэй байна” гээд Нийслэлийн 2018 оны төсвийн төсөл, Өмч хувьчлалын жагсаалт, Газар зохион байгуулалтын төлөвлөгөөний төсөл зэрэг асуудлуудыг боловсруулж дараагийн долоо хоногт багтаан Нийслэлийн Засаг даргын зөвлөлийн хуралд танилцуулах, Нийтийн тээврийн үйлчилгээний оргил цаг, өглөө оройн ачаалал ихтэй үед нийтийн тээврийн үйлчилгээний жигд үйл ажиллагааг тасалдуулахгүй байх, цаашид иргэд, олон нийтэд хүлээлт үүсгэхгүй байх чиглэлээр тодорхой санал боловсруулж танилцуулах, Нийтийн эзэмшилийн гудамж талбай болон авто зам, орон сууц, гэр хороолын дундах авто зам, аж ахуй нэгж байгууллагуудын ойр орчмын 50 метр хүртлэх цас мөс цэвэрлэх үйл ажиллагаанд тавих хяналтыг эрчимжүүлэх, шаардлага биелүүлээгүй аж ахуй нэгж байгууллагад хуулийн дагуу арга хэмжээ авч ажиллахыг холбогдох албан тушаалтнуудад үүрэг болгов гэж нийслэлийн Засаг даргын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

УИХ-ын гишүүн, Байгаль орчин, аялал жуулчлалын сайд Н.Цэрэнбаттай ярилцлаа.

-Та Байгаль орчин, аялал жуулчлалын сайдын ажлыг аваад удаагүй байгаа. Салбарынхаа ажлыг юунаас эхэлье гэж бодож байгаа вэ. Олон салбарыг хамарсан болохоор танай яамны ажил их байдаг гэж дуулсан?

-Намайг ажлаа авахтай зэрэгцээд манай яам Ерөнхийлөгчийн Тамгын газартай хамтарч “Агаарын бохирдлыг бууруулах үндэсний чуулган”-ыг зохион байгуулж таарсан учир агаарын бохирдлыг бууруулах чиглэлд анхаарал хандуулж ажлаа эхлүүлсэн. Байгаль орчны доройтол, цөлжилт, уул уурхайн зохистой бус үйл ажиллагаанаас бий болсон хөрс, ус, агаарын асуудалд салбарын үе үеийн сайд нар анхаарал хандуулж ирсэн. Би ч мөн адил анхаарч ажиллана. Манай Засгийн газар хууль хэрэгжүүлж, хариуцлагыг нэмэгдүүлье гэсэн зарчмын дагуу ажлаа явуулна. БОАЖЯ бодлого боловсруулахаас гадна салбар дундын зохицуулалтыг хангаж ажилладаг. Тэр утгаараа бусад салбар, яамдын алдаа дутагдал манай яамны үйл ажиллагааг алдаатай байгаа мэт харагдуулах нь бий. Үүнийг засч залруулах ёстой. Монгол Улсын Үндсэн хуульд “Монгол Улсын иргэн бүр байгаль орчноо сахин хамгаалах ёстой” гэсэн журамт үүрэг бий. Гэтэл сүүлийн жилүүдэд бид өөрсдийн толгой дээрх бухлыг харахгүй байж бусдын толгой дээрх өвсийг шүүмжлэх болсон. Нүүдэлчин монголчуудын хувьд байгалиа хамгаалах нь хамгийн эрхэм зүйл байсан. Бид энэ их өв соёлоосоо авч үлдсэн нь бага болоод гомдоллодог буруу нийгэм рүү явж байна. Энэ салбарт тулгараад байгаа асуудлыг зөвхөн БОАЖЯ болон салбарын хүмүүсээс гадна бүх хүн оролцож байж шийдэх ёстой. Монголчууд аливаа зүйлийг буруутган шүүмжлэхдээ хэт идэвхитэй буюу хэт чанга дуугардаг болжээ. Алдаа дутагдлыг засч залруулахад дэм болдог байдал дутагдаж байна. Тиймээс байгаль орчиндоо хандаж буй хандлагаа төр, хувийн хэвшил гэлтгүй хамтдаа өөрчилье гэж байгаа юм. Миний баримтлах гол зарчим энэ.

-Бусад яамны алдаатай бодлого ч юм уу буруу хийсэн зүйлс танай яамны алдаа мэт харагддаг гэлээ. Ерөнхийдөө өргөн хүрээг хамарсан болохоор салбар дундын уялдаа холбоог хангах шаардлага гарна. Энэ тал дээр салбар хоорондын уялдааг хэрхэн хангах бол. Хүндрэл ер нь хэр байна вэ?

-Салбар дундын уялдаа холбоо муу гэхээсээ илүүтэй манай салбарт олон талын эрх ашиг, олон талт бизнесүүд үйл ажиллагаа явуулдаг. Харамсалтай нь манайхан өөрсдийн дураар үйл ажиллагаа явуулж албан тушаалтнуудын тавьсан шаардлагыг биелүүлдэггүй. Тухайн биелүүлээгүй алдаа дутагдлаа хаацайлахын тулд олон нийт, нийгмийн сүлжээг ашиглан өөрийгөө зөвтгөх гэсэн зарим аж ахуйн нэгжүүдийн сөрөг хандлага үүнд гол үүрэг гүйцэтгэж байгаа. Тиймээс Засгийн газар хариуцлагатай байхыг мөн хуулийн хүрээнд бүх төрийн албан хаагчдаас шаардаж байгаа л даа.

Манай салбарын гол хүндрэл нь уул уурхайн компаниуд байгалийн дагалдах баялгийг дагаж үүсдэг харилцаанууд. Монгол Улсын эдийн засгийн томоохон тулгуур нь уул уурхай хэдий ч хуулиа мөрддөггүй аж ахуйн нэгжүүдийн өмнө нүдээ аниж, чихээ бөглөнө гэсэн үг биш. Хариуцлагатай хамгийн сүүлийн үеийн дэвшилтэт технологийг хэрэглэн олборлож, нөхөн сэргээж байгаа компаниудыг яамны зүгээс дэмжинэ. Харин дунд нь хийдэл гаргаж, хууль зөрчин уул уурхайн үйл ажиллагаа явуулж буй бүх аж ахуйн нэгжтэй хариуцлага тооцно. Энэ ч утгаараа манай яамнаас Ашигт малтмал, газрын тосны газарт сүүлийн таван жилд гомдол гаргасан аж ахуйн нэгжүүдийн асуудлыш хэрхэн шийдсэн мэдээллийг цуглуулж, удаа дараа хууль зөрчсөн аж ахуйн нэгжүүдийн хар жагсаалтыг гаргахаар ажиллаж байна.

-Ингээд ирэхээр л шүүмжлэл дагуулах байх даа?

-Хэн нэгнийг буруутгахаасаа илүү хууль журмын дагуу тавьсан шаардлагыг биелүүлээгүй байна гэдгийг нь ойлгуулах чухал. Өвлийн улирал эхэлсэн тул уул уурхай бараг зогсчихлоо. Хавар үйл ажиллагаа эхлэхэд нь бүх аж ахуйн нэгжид албан бичиг илгээнэ. Ой, ус, ан амьтан төрийн мэдэлд байдаг нь үнэн л юм бол төр энэ бүгдийг хамгаалахад хатуу байр сууриа хадгална. Сүүлийн үед уул уурхайн олборлолттой холбоотойгоор гол мөрөн бохирдуулсан зэрэг асуудлууд их гарах болсон. Гэтэл ийм асуудал дээр манай яам шүүхэд гомдол гаргаад ялагдаж байх жишээний олон асуудал байдаг юм байна. Үндсэн хуулийн 6.2-т “Монгол Улсын иргэдэд өмчлүүлсэнээс бусад газар, газрын хэвлий, ой, усны нөөц, ан амьтан төрийн өмч мөн” гэж байгаа тул төр эдгээрийг хамгаалах ёстой. Дэлхий нийтээрээ хүлээн зөвшөөрч буй конвенцид “Голын эхэн, дунд, адагт байгаа бүх хүмүүс тэгш эрхтэй” гэж заасан байдаг. Харамсалтай нь манайд голын эхэнд олборлолт хийж ус бохирдуулж дунд, адагт байгаа иргэдийн амьдралд сөрөг нөлөөлж байна. Тиймээс иймэрхүү компаниудыг хуулийн дагуу ажлаа хий. Үгүй бол бид холбогдох байгууллагуудад нь хандаж үйл ажиллагааг нь зогсоолгоно гэж байгаа юм. Техник, технологийн хүчээр маш олон санаанд оромгүй зүйлсийг зохион бүтээж байгаа ч өнөөдөр цэвэр ус үйлдвэрлэсэн тохиолдол гараагүй байна. Тиймээс гадаргын болон гүний усаа зүй зохистой ашиглахыг эрдэмтэн, судлаачид уриалж байгаа.

-Танай салбарын нэг том хэсэг нь аялал жуулчлал. Аялал жуулчлалын салбарт хэр анхаарал хандуулах вэ. Та жилд нэг сая жуулчин хүлээн авч, нэг тэрбум ам.долларын орлого олно гээд хэлж байсан даа?

-Хүмүүс “Цэрэнбатаа, нэг жилд нэг сая жуулчин авах, нэг тэрбум ам.долларын орлого олох боломжгүй. Битгий мэдэхгүй зүйлээ ингэж том ярьж бай” гэж байсан. Харин ч үүнийг бид бүр томоор ярих ёстой гэж би боддог. Монгол Улс нэг жилд нэг сая жуулчин хүлээн авч, нэг тэрбум ам.доллар олох боломжтой. Энэ бидний хийх ёстой ажил болохоос мөрөөдлийн тоо биш. Учир нь өнөөдрийн байдлаар манай улсад жилд 405 мянган жуулчин ирж байна. Миний хүсээд байгаачлан нэг жилд нэг сая жуулчин хүлээж авахын тулд бид үйлчилгээгээ 1.5 дахин сайжруулах хэрэгтэй. Энэ жил бид дөрвөн хүн хүлээж авч чадаж байгаа юм бол ирэх жил яагаад найман хүн хүлээн авч болохгүй гэж. Тэрний дараа жил 10 хүн хүлээж авах хэрэгтэй. Ингэснээр бид нэг сая жуулчин хүлээж авна.

“Манайд ирээрэй, манайд ирээрэй” гэсний зоргоор жуулчид ирдэггүйг бид мэднэ. Аялал жуулчлалын салбар бол хүмүүсийн сэтгэл ханамж, сайн үйлчилгээний нэгдэл. Тиймээс миний хувьд гурван төрлийн стандартыг дээшлүүлэх ёстой гэж үзэж байгаа юм. Нэгдүгээрт, аливаа үйлчилгээний байгууллага хоолныхоо порцны хэмжээг цэсэндээ граммаар нь тусгаж өгөх хэрэгтэй. Мөн тээврийн аюулгүй байдлыг хангах нь нэн тэргүүний асуудал болоод байна. Бид 100 хувь аюулгүй байдлын баталгаа өгч чадахгүй байгаа нь том дутагдал. Жуулчинтай яваа машины өөдөөс хурд хэтрүүлж, дүрэм зөрчиж орж ирэхээс эхлээд монгол аюулгүй орны тоонд багтаж чаддаггүй. Үүнийг өөрчилж засъя гэж байгаа юм. Шийдэх ёстой чухал асуудлуудын нэг нь жуулчны баазын орчин үеийн албан ёсны байгууламж дутаж байгаа. Үүнийгээ шинэ түвшинд гаргаж Монголын хаана ч очсон тав тухтай байх нөхцлийг бүрдүүлбэл нэг том ахиц гэж харж байна. Жуулчид сэжиглэхгүйгээр ариун цэврийн өрөөнд ороод гардаг болгохын төлөө жуулчны баазууд ажиллах ёстой. Үүний төлөө би явна. Энэ бүхнийг хэрэгжүүлэхийн төлөө олон улсын төсөл хөтөлбөр, банкуудтай хамтарч ажиллана. “Саалиа бэлтгэхээр саваа бэлтгэ” гэж үг бий. Эдгээрийг бид жуулчид ирэх цагаас өмнө цэгцэлж чадвал нэг жилд нэг сая жуулчин ирэх бүрэн боломжтой. Ядаж л 1.5 сая иргэн амьдарч байгаа Улаанбаатарт хотод 24 цагаар ажилладаг ахуйн хэрэглээний дэлгүүр алга шүү дээ. Энэ бүх асуудлыг цогцоор нь шийдчихсэн байхад миний хэлээд байгаа тоо хол биш. Аялал жуулчлал жинэхэн утгаараа хөгжиж эхэлбэл жуулчны баазууд дээр зөвлөх эмчээс эхлээд мэргэжлийн сургалтад хамрагдсан харуул хамгаалалтын хүмүүст ажлын байр бий болно. Төр, хувийн хэвшил аль нь ч байсан энэ төлөвлөгөөнд орох хэрэгтэй. Аялал жуулчлалын салбар уул уурхай, дэд бүтцийн салбарыг бодоход хөрөнгө оруулалт бага шаарддаг. Ажлын байр бий болгох бүрэн боломжтой. Уул уурхай, дэд бүтэц шиг нарийн мэргэжлийн хүмүүс аялал жуулчлалд шаардлагагүй. Ажилгүй байгаа дунд насныхнаа сургалтад хамруулаад ажлын байраар хангах боломжтой гэж харж байгаа. Бид эдийн засгаа солонгоруулъя гэж олон жил ярьсан. Нэг өнгө нь аялал жуулчлалын салбар болох ёстой.

-Өөр ямар боломжууд нээгдэх вэ?

-Манайхан малын махаа экспортлоё гэж олон жил ярьж байгаа ч төдийлөн амжилттай болохгүй байгаа. Бид мал эрүүлжүүлж, махаа экспортлож чадахгүй байж болно. Жуулчдын тоо нэмэгдэх тусам бид эх орондоо гадны хэрэглэгчдэд хүнсний бүтээгдэхүүнээ экспортлох боломж илүү нээгдэнэ. Аялал жуулчлалын салбарынхны жилд авчирсан нэг сая жуулчин өдөрт гурван удаа хооллолоо гэхэд мах, гурилаас эхлээд хүнсний бүтээгдэхүүнийг нь хүнс хөдөө аж ахуйн салбарынхан нийлүүлнэ шүү дээ. Ингэснээр аялал жуулчлалын салбар эдийн засгийн тулгуур нэгэн багана болно гэдэгт бат итгэлтэй байна.

-Аялал жуулчлалын салбарт ямар хүндрэл байгаа бол?

-Хүндрэл байлгүй яахав. Өнөөг хүртэл энэ салбар хувийн хэвшлийнхний нуруун дээр л тогтож байна. Хувийн хэвшлийнхэн маань анх оруулсан хөрөнгөө нөхөж олсон нь тун бага. Найдаж, илүү их ашиг олно гэж бодсоны үндсэн дээр л үйл ажиллагаагаа зогсоодоггүй байх. Тиймээс эдгээр байгууллагуудыг дэмжихийн тулд орчин үеийн ариун цэврийн байгууламжаас эхлээд шаардлагатай техник, тоног төхөөрөмжийг нь банкуудтай хамтарч зээлээр олгоё гэж байгаа юм. Ингэж гэмээнэ бид тогтвортой аялал жуулчлалын салбараа хөгжүүлж, ажлын байр бий болгоно. Энэ бүх эхлэлийг тавьж байж өвлийн аялал жуулчлалыг хөгжүүлнэ гэж ярих нь зүйн хэрэг. Бид шидтэн биш учраас энэ бүхэн алга урвуулахын хооронд өөрчлөгдөхгүй нь мэдээж.

Зүүн өмнөд Азийн бүс нутагт аялал жуулчлал өндөр хөгжиж, хөрөнгө оруулалтууд их хэмжээгээр хийгдэж байна. Үүнийг дагасан хүндрэл нь агаарын тээврийн асуудал. Аль болох бид олон маршрут, нислэгийн давтамжийг бий болгох хэрэгтэй. Наад зах нь онгоцноос буусан жуулчин захиалсан зочид буудалдаа очихдоо таксины жолооч нарт хулхидуулдаггүй баймаар байна л даа. Улс даяараа нэг стандарттай болж, нисэх буудлаас зочид буудал руугаа хүрэх нэг үнэтэй болъё. Бид дэлхийтэй хөл нийлүүлэхийн тулд дэлхийн тавьж буй стандартуудад нийцэх ёстой. Түүнээс биш “Монголд ингэдэг юм аа” гээд байвал жуулчдын тоо төдийлөн нэмэгдэхгүй. Энэ бизнес сэтгэл ханамж, цогц үйлчилгээ болохоос тус тусдаа үйлчилгээ биш. Дэлхий нийтэд аялал жуулчлалын салбарт өрсөлдөгч гэж байдаггүй юм байна. Сэтгэл ханамжид суурилсан байдаг учраас тэр л дээ. Бид амжилтанд хүрэх ёстой. Цаг алдах ёсгүй.

-Манай оронд ирж, буцах тийзний үнэ маш өндөр. Яахав ирлээ гэхэд байгаль л үзэхээс биш Гандантэгчинлэн хийд, Цонжинболдогоос өөр үзэх зүйл байхгүй гэдэг шүү дээ. Гэтэл Ордост Чингис хааны ташуураа унагасан газрыг хүртэл хот болгоод жуулчид татаж байх жишээтэй…

-Яг энэ асуудалд Засгийн газар анхаарлаа хандуулж, аялал жуулчлалыг бүсчлэн хөгжүүлэхээр мөрийн хөтөлбөртөө тусгасан байгаа. Тухайлбал, Хэнтий аймагт “Мянганы суут хүн их эзэн Чингис хаан” цогцолборыг байгуулахаар төлөвлөж, тэнд түүхийн аялал жуулчлалыг хөгжүүлэх бүсийг цогцлоохоор ажиллаж байна. Мөн Хөвсгөлийг байгалийн, Улаанбаатар орчмыг соёлын аялал жуулчлалын бүс хэлбэрээр хөгжүүлэхээр хөтөлбөр боловсруулаад ажиллаж байгаа. Аялал жуулчлалын томоохон 4-5 цогцолборыг бий болгохын тулд төр хувийн хэвшил хамтарч ажиллан үр дүнд хүрэх ёстой гэдэг байр суурийг манай яамны зүгээс баримталж байгаа. 2018 оны улсын төсөвт аялал жуулчлалын чиглэлээр гурван том ажил хийхээр санхүүжилтын асуудлыг шийдсэн.

Өнөөдөр бид түүхээ ярьж болох ч түүхийг маань сонирхохоор ирсэн хүмүүст орчин үеийн үйлчилгээ үзүүлж байж аялал жуулчлалыг хөгжүүлэх хэрэгтэй болчихоод байгаа юм. Жуулчид бидний түүхийг нүдээр үзэж, байгалийн сайхныг таашаахын зэрэгцээ орчин үеийн үйлчилгээг авах гэж ирж байгаас биш 12, 13 дугаар зууны амьдралаар хэд хонох гэж ирэхгүй гэдгийг бид ойлгох ёстой.

-Монгол Улсын иргэн эрүүл, аюулгүй орчинд амьдрах эрхтэй гээд Үндсэн хуулиндаа тунхаглачихсан. Гэсэн ч 1.5 сая иргэн амьдарч буй нийслэлийн маань хөрс, ус, агаарын бохирдол хэрээс хэтэрсэн. Одоо бол утааны асуудлыг их ярьж байна. Энэ бүгдэд ямар шийдэл гарган ажиллах вэ?

-Аливаа төв суурин газар өөрийн дүрэм журамтай, улс орон бүр хуультай. Хуулиа мөрдөж байж харилцан сэтгэл хангалуун эрүүл, аюулгүй орчинд амьдрах ёстой юм байна гэдгээ их мөнгө төлж, илүү их цаг хугацаа зарцуулж байж ойлгож байна даа. Нийслэлийн утаа байгаль орчны бохирдол биш. Төлөвлөлт, ажилгүйдлийн бохирдлын утаа гэдэгтэй санал нэг байгаа. Хот төлөвлөлт буруу, шилжин суурьшилтанд хязгаарлалт тавиагүй гэхээсээ илүү хор хохирлыг хэрхэн бууруулах вэ, утааг бууруулах талаар үе үеийн Засгийн газар ямар бодлого барьж ирсэн, алийг нь би үргэлжлүүлэх ёстой вэ гэдэгт дүн шинжилгээ хийж байна. Төлөвлөлт буруугийн дээр ажилгүйдлээс утаа бий болсон гэдгийг дахин хэлье. Гуравдугаарт, түүхий нүүрсний хэрэглээг зөвшөөрснөөс болсон. Гоё зүйлийг бид санаачилдаг ч гүйцэтгэлээ дутуу хаядаг. Цэвэр агаар сан байгуулж жилдээ 30 гаруй тэрбум төгрөг зарцуулж байгаад “Нүүрс” хөтөлбөр хэрэгжүүлэн Багануурын нүүрсийг шуудайлж сайжруулсан түлш хэрэглэх ёстой газрууддаа зараад эхэлсэн. Ингэж л бид өөрсдийн хэм хэмжээг зөрчин түүхий нүүрсний хэмжээг гааруулсан. Өмнөх Засгийн газрууд дулаан байх хэрэгтэй л гээд байснаас биш зохистой хэм хэмжээгээ барьж, сайжруулсан түлшээ хэрэглүүлээгүй. Цэвэр агаар сан татан буугдаад манай яаманд ирсэн. Гэхдээ яам бодлогоо бариад явж байгаа. Техник, технологийн НӨАТ, гаалийг чөлөөлчихье гэж байгаа юм. НЗДТГ-тайгаа хамтран гэр хорооллын цахилгаан эрчим хүчний найдвартай эх үүсвэрийг нэмэгдүүлэхэд Засгийн газар хөрөнгө гаргаж байна. Цахилгааны шөнийн тарифыг тэглэсэн. Хөрсний бохирдол мөн ялгаагүй. Нөгөө талаар бидний байгаа боломж энэ. Нэг нь ажил хийе гэхээр нөгөөх нь хаалт болдог. Гэр хорооллын дахин төлөвлөлт хийе гэхээр нэг хэсэг нь газраа чөлөөлөөд нөгөө хэсэг нь өндөр үнэ хэлээд суучихдаг. Бид хөгжлийн, бодлогын чөдөр тушаа болсоор байгаагаа ойлгох хэрэгтэй. Шийдэл ярьдаггүй, буруутан хайдаг. Монголчууд гурван саяулаа буруутан. Бие биенээ хүндэлдэггүй, мэргэжлийн хүний тавьсан шаардлагыг биелүүлдэггүй. Би ингэх эрхтэй, төв Азийн цээжин дэх хөх толботой монгол гэж онгирдог. Гэтэл дэлхий нийттэй хөл нийлүүлэхийн тулд дүрэм журманд нь нийцэх ёстой. Гэтэл бид өөрсдөө дүрэм, журмаа биелүүлдэггүй хэрнээ бусдыг биелүүлэхийг шаарддаг. Хөрсний бохирдлын асуудлаар Азийн хөгжлийн банктай хамтраад шинэ төсөл хэрэгжүүлээд эхэлсэн. Үр дүн гарах ёстой. Үүнээс аль нь шилдэг технологи вэ гэдгийг хараад ард иргэдийнхээ амьдралд нэвтрүүлнэ. Монголд хэрэгжих төсөл хөтөлбөрүүд үнэ өртөг, цаг хугацаанд хязгаарлуулж байна. Бид хэн нэгнийг өөрчлөх биш бодит байгаа байдал, хандлагаа өөрчлөх хэрэгтэй. Хогны асуудал үүсэхээр манай яамны асуудал болчихдог. Хогоо цэвэрлэ гээд шүүмжилдэг. Хог тарих нь харин өөр хүмүүсийн асуудал. Ний нуугүй хэлэхэд хэн хог тарьж байна вэ гэдгийг хянаж байгаа хүн алга.

-Тэгээд утааг яг яаж бууруулах ёстой юм бэ?

-Утааг бууруулахын тулд дэд бүтцээр хангах, гэр хорооллыг орон сууцжуулах хэрэгтэй. Англи, Польшийн түүх ийм л байдаг. Мөн сайжруулсан түлш хэрэглэх ёстой. Бид мөнгө л байвал бүх зүйлийг шийдчихнэ гэж боддог. Асуудлыг шийдэхэд гарт орсон өргөсийг авахын дайны тийм амар биш. Гадныхантай уулзаж байхад “Та нар тэвчээргүй. Байгаа соёлоосоо шал өөр хүмүүс юмаа гэдэг. 26 километр газар хурдан морийг хүүхдээр унуулж наадаж байна. Тэгсэн мөртлөө 1024 бөх барилдуулаад нэгийг нь түрүүлүүлж байгаа нь харгис байна. Тэгсэн мөртлөө бүх хөрөнгө оруулагчдаа жилийн дотор хөрөнгө оруулалтаа нөх. Өнөө маргаашгүй үр дүн гарга гэдэг. Гэтэл технологийн хугацаа гэж байдаг” гэж шүүжилдэг. Үүнийг ойлгож хамтдаа өөрчлөх хэрэгтэй. Утааг арилгахын тулд бид хөдөлмөрлөж, дэд бүтцээ татах ёстой. Харин энэ хугацаа шаардах үед нь сайжруулах түлш хөтөлбөрийг нь үргэлжлүүлье гэж байгаа юм. Манай яам, Агаарын бохирдлыг бууруулах үндэсний хороотой хамтран Барилга мегасторт “Шинэ техник технологийн мэдээллийн төв” гэж нээж байгаа. Байшингаа халаахад ямар давуу технологи байна гэдгийг харж болно. Мөн хөрсний бохирдлыг бууруулах үүднээс цэвэр бохирын систем дээр ямар ололтууд байгааг компаниуд нь танилцуулж байна. Байгальд ээлтэй техник, технологи үйлдвэрлэж буй ахуйн нэгжүүдийг системээр нь дэмжихийн тулд Дэлхийн уур амьсгалын сан буюу Ногоон зээлийн сангаас Монгол Улс зээл авч аж ахуйн нэгжүүдийг дэмжсэнээр тогтвортой хөгжлийн зорилтод хүрэх ёстой. Энэ бүхнийг бодит амьдрал дээр хэрэгжүүлэхийн тулд яамны зүгээс Банкуудын холбоо, Сангийн яамтай хамтран Ногоон зээлийн санг байгуулах ажлыг эхлүүлсэн. Гэхдээ өнөө маргааш шууд үр дүн гарахгүй гэдгийг иргэд ойлгох хэрэгтэй. Утааг бууруулах үе шаттай ажлуудыг төр засгийн зүгээс хийж байна. Иргэд маань харин юу хийж байна вэ гэдгээ бодох ёстой.

-Богдхан уул тусгай хамгаалалттай гэдэг утгаараа танай яамны харьяанд байдаг. Гэтэл тусгай хамгаалалттай газарт байшин барилга маш ихээр баригдаж байна. Хэл ам тасардаггүй. Энэ бүгдийг цэгцлэхгүй юм уу?

-Богд уул орчмын маргаан дагуулдаг газрыг суурьшлын бүс болгоод асуудлыг нэг талдаа шийдье гэсэн зарчмыг баримталж байгаа. Бодит байдал дээрээ Богд уулаа тойроод хүмүүс амьдарч байгаа нь үнэн. Тиймээс маргаантай газрыг суурьшлын бүс болгоод холбогдох газрууд нь хариуцаад явах хэрэгтэй болов уу. Богд уулыг тойрсон маргаантай газрын талаар 20 жил ярьлаа. Тиймээс дэлхий нийтийн туршлагаас судлаад суурьшлын бүс болгох хэрэгтэй гэж бодож байна. Тэгэх юм бол Нийслэлийн Засаг даргын Тамгын газар, тухайн дүүргийн Газрын алба нь асуудлаа цэгцлээд ойлголцоод явчих байх. Одоо бол Богд уулын тусгай хамгаалалттай орчимд газар ашиглах зөвшөөрөл авсан хэрнээ аж ахуйн нэгжүүд маань нийтийн эзэмшлийн зам талбайгаа чөлөөлөх гэж асуудал үүсгэж байх жишээний. Хаагуур замаа тавьж, цэвэр бохирын асуудлаа яаж шийдэх тал дээр яам нэгдсэн тушаал шийдвэр гаргаад явна. Зарим нийтийн эзэмшлийн талбайн газрыг чөлөөлөх ёстой. Бид хотоо өөрсдийн гараар бүтээсэн гэдэг ч өнөөдөр өөрсдийн гараар эвдсэн хот болгох нь ээ. Зайсан, Яармагийн урд хэсэг орон сууцны хороолол боллоо. Зарчмын шийдэл нь суурьшлын бүс болгоно.

-Улсын төсөв батлагдсан. Эдийн засаг хүнд байгаа. Танай салбарын төсөв нэлээд бага дүнтэй батлагдах шиг болсон…

-Нэгдүгээрт, төсөв анх өргөн баригдсанаас хойш Засгийн газрын гишүүд төсвөө задлахгүй явъя гэдэг зарчим барьсан. Энэ дагуу явсан. 2020 он хүртэлх Засгийн газрын төлөвлөгөөний дагуу батлагдсан төсвийнхөө хүрээнд аль болох сайн ажиллана. Их хөгжлийн, их орлогын, их ойлголцлын ажлуудыг би хийнэ. Байгаль орчин, аялал жуулчлалын салбарын үүрэг нь дэлхийн чиг хандлагад нэгдэж байгаа. Томоохон төсөл, хөтөлбөр дээр эрх мэдэл, хариуцлагын түвшин нэмэгдэж байна. Залуу хүний хувьд зайлшгүй хийх ёстой ажлуудаа ирэх жилээс хийж эхэлнэ. Орчин үеийн цахим болон багаж хэрэгслээр байгаль хамгаалагч нараа хангана.

-Саяхан Отгонтэнгэр ууланд авирсан хүмүүс эндсэн. Төрийн тахилгатай, тусгай хамгаалалттай газар уг нь авиралт хийлгэхгүй гэж байгаль хамгаалагч нь хэлээд ч үгийг нь аваагүй гэж байсан л даа. Цаашид энэ мэтчилэн ууланд авирах асуудлуудыг хэрхэн цэгцлэх вэ?

-Бид чөлөөт ардчилсан нийгэмд амьдарч байгаа ч бусдын эрхээр өөрийн эрх хязгаарлагдана гэдгийг ойлгох хэрэгтэй. Дэлхийн хаана ч дүрэм, журмын дагуу ууланд авирдаг. Энэ бүхнийг бид харамсалтай нь олон хүний амь нас эрсдэж байж ойлголоо. Завхан аймгийн Отгон сумын байгаль хамгаалагч Ш.Батмэнд гуай хуулийн дагуу шаардлагаа тавьсан. Байгаль орчин, аялал жуулчлалын сайдын Отгонтэнгэр ууланд авиралт хийхийг хориглосон тушаал бий. Болохгүй гээд байхад манай хэсэг залуу технологийн алдаа гаргасан нь үнэн. Цаашид ийм осол гарлаа гэхэд бидний техникийн боломж, аюулгүй байдлын нөхцөл ямар байна вэ гэдгийг ойлголцох ёстой. Манай яам өндөр ууланд авиралт хийх журмыг батлахаар мэргэжлийн уулчидтай хамтран ажиллаж байна.

Эх сурвалж: Өдрийн сонин

Улаанбаатар хот, Налайх дүүрэг, 3 дугаар хорооны 53 дугаар “Хонхор”-т иргэн Б-гийн сэргээн ашиглагдаж байгаа нүүрсний бичил уурхайн 35 градусын налуу амны 120 метрийн гүнд нурал үүсч хувиараа нүүрс олборлогч хоёр иргэн нүүрсэнд дарагдсан тухай дуудлагаар /2017.11.16-ны өдрийн 04:07 цагт/ ОБЕГ, ОБЕГ-ын харьяа Уул уурхайн аврах анги, нийслэлийн Онцгой байдлын газрын Налайх дүүргийн Онцгой байдлын хэлтсийн Гал түймэр унтраах, аврах 28 дугаар анги, Цагдаа, Мэргэжлийн хяналтын байгууллага, ЗДТГазраас нийт 80 алба хаагч, 12 автомашинтайгаар ослын голомтод ажиллалаа.

35 градусын налуу малталттай, тунелын урт амнаас 140 метрийн гүн, өргөн нь 1.5 метр, зүүн гар тийш эргэсэн мөргөцөг нь 5 метрийн урт, малталтын улнаас тааз хүртэлх өндөр 1.65 метрийн далд уурхайн гүнээс 16:19 цагт эхний осолдогч болох тус дүүргийн харьяат иргэн О /47 настай, эрэгтэй/, 18:14 цагт хоёрдахь осолдогч болох тус дүүргийн харьяат иргэн Э /28 настай, эрэгтэй/ цогцсыг гаргав.

Аврагчид өглөөний 04:00 цагаас эхлэн нийт 14 цагийн турш ажиллаж осолдогчдыг нурлаас гарган тус дүүргийн Эрүүл мэндийн төвд хүлээлгэн өглөө.

Уурхайн гүнд олон удаагийн нуралт үүсч, голомтод ажиллаж буй аврагчид өөрсдөө нурангид даруулах эрсдэлтэй нөхцөлд ажилласан. Аврагчдын ажиллаж байгаа нүүрсний мөргөцөгт маш давчуу, нурсан нүүрсийг зайлуулах газаргүй, мөн гал гарах нөхцөл бүрдэж, уурхайд зөвшөөрөгдөх хэмжээнээс 4 дахин илүү хортой хий (нүүрсхүчлийн дутуу исэл) ялгарч байгаа зэрэг нь аврах ажиллагааг явуулахад хүндрэл үүсгэж байлаа. Аврах ажиллагааг эхлүүлснээс хойш осол болсон энэхүү уурхайн хонгилд 10 орчим удаагийн нуралт болсон юм гэж Онцгой байдлын ерөнхий газраас мэдээллээ.