-
2017 оны 11 сарын 08
Хөрөнгийн биржийн өнөөдрийн арилжаагаар I, II, III ангиллын 52 хувьцаат компанийн 174 946 ширхэг хувьцаа арилжсанаас 27 компанийн хувьцааны ханш өссөн байна.
-
2017 оны 11 сарын 08
Нийслэлийн Хот тохижилтын газар болон 9 дүүргийн ТҮК-ууд нийт 10.6 сая м.кв нийтийн эзэмшлийн зам талбайд цэвэрлэгээ үйлчилгээ үзүүлэн ажилладаг. Өнгөрсөн өдрүүдэд үргэлжлэн орсон их хэмжээний цаснаар нийслэл, дүүргүүдийн нийт 920 зам талбайн үйлчлэгч, иргэдийн бүлгийн 400 гаруй хүн, цас цэвэрлэгээний 30 гаруй машин механизм уртасгасан цагаар ажиллалаа.
Улаанбаатар хотын Ерөнхий менежер бөгөөд Захирагчийн ажлын албаны дарга Т.Гантөмөрөөс шуурхай үүрэг өгсний дагуу 2017 оны арваннэгдүгээр сарын 7-ны өдөр ЗАА-ны хэлтсүүд ЭТӨЧ-ний явган хүний зам цас мөсний цэвэрлэгээний ажилд хяналт тавьж, зам дагуух байгууллага, аж ахуйн нэгжүүдийг цэвэрлэгээний ажилд гарган, дүүргүүдээс нэгдсэн зохион байгуулалттайгаар дайчлан ажиллуулж байгаа иргэдийн бүлгийн цэвэрлэгээг газар дээр хяналт тавьж хийлгээд байна.
Энэ онд 1700 орчим тонн бодис, 3000 орчим тонн давс нөөцлөөд байна. Энэ нь өнгөрсөн оны давс бодисын зарцуулалттай харьцуулахад бодис 50 хувиар, давс 2 дахин нэмэгдүүлж нөөцлөөд байгаа гэсэн үг юм. 2017 оны арваннэгдүгээр сарын 6-7-нд орсон цаснаар 225.4 тонн бодис, 115.6 тонн давс зарцуулаад байна гэж Улаанбаатар хотын Захирагчийн ажлын албанаас мэдээллээ.
-
2017 оны 11 сарын 08
Нийслэлийн Засаг даргын тамгын газраас нийслэлийн Эрүүл мэндийн газрын харьяа 11 байгууллагад 200 ширхэг агаар цэвэршүүлэгч төхөөрөмжийг өнөөдөр хүлээлгэн өглөө. Тус арга хэмжээнд Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан, Чингэлтэй дүүргийн Засаг дарга Ж.Эрдэнэбат, Нийслэлийн эрүүл мэндийн газрын дарга Л.Төмөрбаатар болон НЭМГ-ын харьяа эрүүл мэндийн байгууллагын төлөөллүүд оролцов.
Улаанбаатар хотын агаарын бохирдол ургийн өсөлт хөгжил болон 0-5 хүртэлх насны хүүхдийн уушгины хатгалгаа, насанд хүрэгчдэд уушги, зүрх судасны эмгэг үүсэхэд сөргөөр нөлөөлж байгааг судалгаагаар тогтоосон байдаг. Түүнчлэн гадаад орчны агаараас илүү дотоод орчны агаарын бохирдол хүний эрүүл мэндэд сөрөг нөлөө үзүүлдэг тул ХЕПА шүүлтүүр бүхий уг агаар цэвэршүүлэгч нь ихээхэн үр дүнтэй гэдгийг Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан энэ үеэр онцолсон юм.
Дотоод орчны агаарын чанарыг сайжруулах энэхүү төхөөрөмж нь тасалгааны агаар дахь нян, бактери, хөгцийг 99 хувь хүртэл устгаж утаа, тоос тоосонцор, бохирдлыг шүүж цэвэрлэдэг бөгөөд эрчим хүчний зарцуулалт багатай, шөнийн ухаалаг горимоор ажиллах хүчин чадалтай ажээ. Агаарын бохирдол ихтэй, мөн удирлын чанартай Томуу, томуу төст өвчний дэгдэлт эхэлж байгаа энэ үед агаар цэвэршүүлэгч төхөөрөмжтэй болсноор эдгээр эмнэлэгт хэвтэн эмчлүүлж буй нийт 50 мянган хүүхдийн эрүүлжих нөхцөлийг бүрдүүлэх юм байна.
Нийслэлийн Эрүүл мэндийн газрын дарга Л.Төмөрбаатар тус үйл ажиллагааны үеэр “Агаарын бохирдлоос үүдэлтэй амьсгалын замын өвчлөл нэмэгдэх хандлагатай байгаа энэ үед эцэг, эхчүүд маань өөрсдийн болон үр хүүхдийнхээ эрүүл мэндийг хамгаалах нь зайшлгүй шаардлагатай. Ялангуяа гадаад орчны бохирдлоос илүүтэй дотоод орчны агаарын чанарыг сайжруулах асуудалд анхаарлаа хандуулах хэрэгтэй байна. Манай орны нөхцөлд хүйтний улиралд агаарын бохирдол буюу утаа, амьсгалын замын халдвар, Томуу, томуу төст өвчний дэгдэлт ихсэх хандлагатай байдаг. Ханиад томууны хувьд, утаанаас шалтгаалж нэмэгдэж байгаа хэрэг биш юм. Энэ бол вирүсийн гаралтай өвчин. Өвчлөгсдийн 80 орчим хувийг хүүхэд эзэлдэг, хүйтний улиралд хүндрэх эрсдэлтэй учраас бид Нийслэлийн Засаг даргын зөвлөлөөр хэлэлцэж хүүхдийн хэвтэн эмчлүүлж буй эмнэлэг, эрүүл мэндийн төвийн дотоод агаарын чанарыг үе шаттайгаар сайжруулах ажлын хүрээнд агаар цэвэршүүлэгч 200 төхөөрөмжийг тодорхой тасгуудад хуваарилж өглөө. Баянзүрх, Сонгинохайрхан зэрэг агаарын бохирдол ихтэй бүсэд байрладаг дүүргийн эмнэлгүүдийн хувьд энэ нь маш чухал ач холбогдолтой юм. Дотоод орчны агаарын чанарыг сайжруулснаар эрүүл мэндэд эерэг нөлөө үзүүлж, хүүхдийн эмчилгээний үр дүнд сайнаар нөлөөлөх боломж бүрдэж байна. Цаашид энэхүү ажлыг шат дараатай хэрэгжүүлж, эмнэлгийн бусад өрөө тасалгааны дотоод орчны агаарыг сайжруулах тал дээр арга хэмжээ авна. Мөн цаашид агаар цэвэршүүлэгч суурин төхөөрөмжийг хүртэл эмнэлгүүд дээр байрлуулахаар төлөвлөж байгаа” хэмээн ярилаа Дэлхийн банкны санхүүжилтээр хэрэгжиж буй “Улаанбаатар-Цэвэр агаар” төслийн хүрээнд болсон уг арга хэмжээ Чингэлтэй дүүргийн эрүүл мэндийн төвд болов гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
-
2017 оны 11 сарын 08
Цагдаагийн ерөнхий газрын дэд бөгөөд Нийслэлийн цагдаагийн газрын дарга, цагдаагийн хурандаа Д.Ядамдорж, Нийтийн хэв журам хамгаалах, олон нийтийн аюулгүй байдлыг хангах албаны дарга, цагдаагийн хурандаа Ж.Амгалан, Урьдчилан сэргийлэх хэлтсийн дарга, цагдаагийн дэд хурандаа Г.Арсланхуяг нар Мөрдөн байцаах алба, Эрүүгийн цагдаагийн алба, Нийслэлийн цагдаагийн газар, дүүрэг дэх цагдаагийн хэлтсийн гэр бүлийн хүчирхийлэл хүүхдийн эсрэг гэмт хэргээс урьдчилан сэргийлэх болон урьдчилан сэргийлэх ажил хариуцсан ахлах мэргэжилтнүүдийг хүлээн авч уулзан ажлын чиглэл өглөө.
Цаашид гэмт хэрэг, зөрчлийн шалтгаан нөхцөлийг тогтоон дүн шинжилгээ хийж, нийслэл хотын хэмжээнд гэмт хэргээс урьдчилан сэргийлэх ажлыг бүсчилсэн, обьектолсон хэлбэрээр нэгдсэн удирдлагатай багийн системээр зохион байгуулж, урьдчилан сэргийлэх ажилд идэвх, санаачлага өрнүүлэн ажиллаж буй байгууллага, аж ахуй нэгж, хороо, иргэдийн санал санаачлага, сайн туршлагыг түгээн дэлгэрүүлэх, сурталчлах ажлыг зохион байгуулна.
Мөн дүүрэг дэх цагдаагийн хэлтэс, хороо хариуцсан хэсгийн байцаагч нарт заавар, зөвлөмж өгч тэдний ажилд дэмжлэг туслалцаа үзүүлж, тухайн нутаг дэвсгэрт гэмт хэрэг, зөрчил үйлдэгдсэн, үйлдэгдэж болзошгүй шалтгаан нөхцөлийг газар дээр нь очиж танилцан, иргэд олон нийтэд мэдээлэлж, түүнийг арилгах, бууруулах чиглэлээр төлөвлөгөө, зураглал гарган хамтран ажиллана.
-
2017 оны 11 сарын 08
”Эх орны манаа” сонины 2017 оны 10 сар №30
Бүсгүйчүүддээ зориулсан энэ удаагийн эрүүл мэндийн булангаараа умайн хүзүүний хорт хавдар гэгч юу болох, түүнээс хэрхэн урьдчилан сэргийлэх, өвдсөн тохиолдолд ямар эмчилгээ хийгддэг талаар мэдээлэл өгөхөөр ТТАХНЭ-ийн эмэгтэйчүүдийн эмч, анагаах ухааны магистр, ахмад Ш.Наранчимэгтэй уулзлаа.
-Умайн хүзүүний хорт хавдрын талаар мэдээлэл өгөхгүй юу?
-Сүүлийн үеийн судалгаагаар эмэгтэйчүүдэд үүсч буй хорт хавдруудаас умайн хүзүүний хорт хавдар их бүртгэгдэж байна. Умайн хүзүү өвчин мэдэрдэггүй эрхтэн. Тиймээс хожуу үедээ илрэх магадлал өндөртэй. Гэхдээ нөхөн үржихүйн насны эмэгтэйчүүдэд харьцангуй эрт оношлогдох боломж бий. Харин цэвэршилтийн насны эмэгтэйчүүд өөрийгөө цэвэршчихсэн тул эмэгтэйчүүдийн эмчид хандах шаардлагагүй гэж боддог. Энэ үед хавдрыг хожуу олж мэддэг.
Сүүлийн үед монголд умайн хүзүүний хорт хавдрын илрүүлэг шинжилгээг 30 наснаас хойш гурван жилийн үечлэлээр хийж байгаа. Уг шинжилгээнд хамрагдаад явбал умайн хүзүүний хорт хавдраас урьдчилан сэргийлэх боломж бүрэн бий.
-Умайн хүзүүний хорт хавдар эмчлэгдэх магадлал хэр вэ?
-Эрт оношилж чадвал амь насанд аюулгүй. Хорт хавдар нь хөхөнцөр вирусээр үүсдэг. Уг вирус нь бэлгийн замаар халдварлана. Бусад өвчин зовиур, өвдөлт ихтэй байдаг тул тухай бүр нь үзүүлж, эмчлүүлдэг. Харин умайн хүзүү нь өвчин мэдэрдэггүй гучуур эдүүдээс бүрдсэн байдаг тул өвчнийг эрт шатанд нь үзүүлж оношлуулалгүй цаг алддаг. Ингэж явж байгаад хавдар задарч цус алдах үед нь мэддэг. Энэ үед хэдийнэ эмчилгээ авахаа больсон байдаг. Тиймээс хагас жилд нэг удаа үзүүлж байх хэрэгтэй. Эрт үед нь оношилвол тэр хэсэгт нь өөлж аваад эмчлэх бүрэн боломжтой.
-Хорт хавдраар өвчлөх магадлалтай ямар хүмүүс байна вэ?
-Олон бэлгийн хавьтагчтай, тамхи их татдаг хүмүүс өвчлөх магадлал өндөр байдаг.
-Умайн хүзүүний хавдраар өвчилсөн хүн эмчилгээ хийлгэснийхээ дараа жирэмсэлж болох уу?
-Туяа болон химийн эмчилгээ хийлгэсний дараа бол жирэмслэх магадлал эрс багасдаг. Харин хавдрын эхэн үедээ эмчилгээ хийлгэсэн байхад жирэмслэхэд асуудал байхгүй. Манай бүсгүйчүүдийн гол алдаа нь өвдөхөөсөө нааш эмэгтэйчүүдийн эмчид ханддаггүй. Ер нь бол эмэгтэй хүнээс ялгарч буй цагаан зүйлийн ялгарал ихэссэн үедээ заавал эмчид хандаж байгаарай.
-Урьдчилан сэргийлэх үзлэгийг хилийн отряд, заставт явуулсан байх. Энэ үеэр өвчлөл илэрсэн үү?
-Миний хувьд энэ онд Хилийн 0257, 0286, 0243, 0101, 0131, 0166, 0165, 0285, 0214 дүгээр ангид ажилласан. Харьцангуй хилчин бүсгүйчүүдийн дунд умайн хүзүүний хорт хавдар илрээгүй. Гэхдээ энэ бол санаа амрах зүйл биш. Байнга л үзүүлж байх хэрэгтэй.
-Хавдрыг хэрхэн илрүүлдэг вэ?
-Умайн хүзүүний хорт хавдар эхо болон дотор үзлэгээр мэдэгдэхгүй. Зөвхөн умайн хүзүүг дурандаж байж мэддэг. Мөн умайн хүзүүний эсийн шинжилгээгээр илэрнэ.
-Хавдрын вирусээр өвчилсөн тохиолдолд эцсийн шат хүртлээ хэр хугацаанд мэдэлгүйгээр явдаг вэ?
-Хүн бүрийн дархлаанаас шалтгаалаад өвчний хүндрэл харилцан адилгүй. Эцсийн шат буюу хавдар задарч цус алдах хүртлээ 5-7 жилийн хугацаанд мэдэлгүй явах тохиолдол бий.
Дэслэгч М.Уранбайгаль
-
2017 оны 11 сарын 08
Хоёр сарын өмнө “Очир” төвийн зочид буудлын өрөөнд 13 настай М охин амиа алдсан
-
2017 оны 11 сарын 08
Баянзүрх дүүргийн 13 дугаар хорооны 172 дугаар цэцэрлэг дэргэдээ гэр бүлэгтэй боллоо. Гэр бүлгийг Баянзүрх дүүргийн Засаг даргын Тамгын газар, НҮБ-ийн Хүүхдийн сан болон ‘’Ариг’’ банк, Нидерланд улсын ‘’ING’’ банкны Монгол дахь суурин төлөөлөгчийн газартай хамтран байгуулж, нээлтээ хийсэн юм.
Нээлтийн арга хэмжээнд дүүргийн Эдийн засаг хөгжлийн асуудал хариуцсан төслийн удирдагч-Засаг даргын орлогч Д.Уламбаяр, Нийгмийн хөгжлийн хэлтсийн дарга С.Сувд-Эрдэнэ, НҮБ-ын Хүүхдийн сан, “Ариг” болон ‘’ING’’ банкны суурин төлөөлөгчид оролцлоо.
Дашрамд мэдээлэхэд, энэ хичээлийн жилд Баянзүрх дүүргийн нийт хүүхдийн 77,8 хувь нь сургуулийн өмнөх боловсролд хамрагдаад байгаа. Харин 172 дугаар цэцэрлэгт 240 хүүхэд суралцаж байгаа бөгөөд гэр бүлэг нээгдсэнээр нэмж 50 хүүхэд суралцах боломжтой боллоо хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.
-
2017 оны 11 сарын 08
Нийслэлийн Тээврийн газраас “Нийслэлийн нутаг дэвсгэрт гадна зар сурталчилгаа байрлуулахад дагаж мөрдөх журам”-ын хэрэгжилтийг хангах зорилгоор нийтийн тээврийн үйлчилгээ эрхлэгч 19 аж ахуй нэгж, байгууллагуудын тээврийн хэрэгсэлд шалгалт явуулжээ.
-
2017 оны 11 сарын 08
Онцгой байдлын байгууллагаас ахмад үеийнхнийхээ туршлага, мэдлэгийг залуу хойч үедээ өвлүүлэх, харилцан туршлага судлах зорилгоор гурван үеийн чуулга уулзалтыг гурван жилдээ нэг удаа зохион байгуулдаг уламжлалттай.
Тэгвэл гурван үеийн гуравдугаар чуулга уулзалт “Онцгой байдлын байгууллагын залгамж чанарыг бэхжүүлье” уриан дор энэ сарын 10, 11-ний өдрүүдэд болох гэж байна.
Чуулга уулзалтад төв, орон нутгийн Онцгой байдлын газар, хэлтэс, анги, байгууллагуудад ажиллаж байсан ахмадууд, одоо ажиллаж байгаа дунд, залуу гурван үеийн төлөөлөл оролцож Онцгой байдлын албаны өнгөрсөн үеийн ажлын туршлага дурсамж, үйл хэрэг, ирээдүйн хөгжлийн талаар санал бодлоо солилцох юм.
Түүнчлэн Онцгой байдлын байгууллагын өнөөгийн хөгжил, цаашдын чиг хандлага, үүрэг гүйцэтгэх чадавхыг дээшлүүлэх, туршлагад суурилсан манлайллыг хэрхэн бий болгох талаар хэлэлцэж, зөвлөмж гаргах юм гэж Онцгой байдлын ерөнхий газраас мэдээллээ.
-
2017 оны 11 сарын 08
Ерөнхий сайд У.Хүрэлсүх тусгай дуут дохиог цэгцлэх үүргийг цагдаагийн байгууллагад өгөөд буй. Энэ дагуу Цагдаагийн ерөнхий газрын дэд даргаар ахлуулсан ажлын хэсэг байгуулагдан, ажиллаж байна.
-
2017 оны 11 сарын 08
Н.Ганбадрал: Алга болсон охиныг хайхад БНХАУ-ын холбогдох байгууллагууд хамтарч ажиллаж байна
-
2017 оны 11 сарын 08
Ерөнхий Боловсролын Сургуулийн сурагчдын амралт энэ сарын 3-наас орон даяар эхэлсэн билээ.
-
2017 оны 11 сарын 08
Хууль зүй, дотоод хэргийн сайдын тушаалаар баталсан “Тээврийн хэрэгсэлд тусгай дуут болон гэрлэн дохио тавьж хэрэглэх журам”-ын хэрэгжилтийг хангах зорилгоор аравдугаар сарын 30-ны өдрөөс эрчимжүүлсэн ажлыг зохион байгуулж эхлээд байна.
-
2017 оны 11 сарын 08
Баянзүрх дүүрэг иргэдээс 278 сая төгрөгийн хандив авсан зөрчил илэрчээ
-
2017 оны 11 сарын 08
Эрүүл мэндийн яамны харъяа Хүүхдийн төв сувилалд гар, хөл, амны халдварт өвчин гарчээ.
-
2017 оны 11 сарын 08
Өнгөрөгч даваа гаригт НИТХ-ын дарга С.Амарсайханыг НИТХ-ын төлөөлөгчдийн 12-р хуралдааныг удирдан зохион байгуулсан билээ.
-
2017 оны 11 сарын 08
-АТГ-т ирүүлсэн өргөдөл, гомдол, мэдээллийн шийдвэрлэлтийн дүр зураглал-
Авлигатай тэмцэх газар иргэд, аж ахуйн нэгж, байгууллагаас өргөдөл, гомдол, мэдээлэл хүлээн авдаг бөгөөд тэдгээрийг хэрхэн шийдвэрлэсэн талаар сар бүр дотооддоо дүн шинжилгээ хийдэг. Ийнхүү дүн шинжилгээ хийх нь энэ чиглэлийн ажлын үр дүнгээ тооцох, цаашид улам сайжруулахад анхаарах асуудлаа тодорхойлоход ач тустай ажээ. Энэ удаа 2017 оны III улиралд хүлээн авсан өргөдөл, гомдол, мэдээллийг хэрхэн шийдвэрлэсэн талаарх дүн шинжилгээний мэдээллийг нэг өгүүлбэрээр танилцуулъя.
2017 оны III улиралд АТГ нийт 181 өргөдөл, гомдол, мэдээлэл хүлээн авчээ.
Өргөдөл, гомдол, мэдээллийн дийлэнхийг буюу 146-г нь иргэд биеэр ирж өгчээ.
Улаанбаатар хотоос 126 өргөдөл, гомдол, мэдээлэл ирүүлсэн нь хамгийн олон байна.
Төв аймгаас 9, Баянхонгор аймгаас 5, Ховд аймгаас 4, Дорнод, Хэнтий, Говьсүмбэр, Сэлэнгэ, Дорноговь, Өмнөговь, Архангай, Говь-Алтай аймгаас тус бүр 3, Сүхбаатар, Дундговь, Орхон, Завхан, Баян-Өлгий аймгаас тус бүр 2, Өвөрхангай, Булган, Хөвсгөл аймгаас тус бүр 1 өргөдөл, гомдол, мэдээлэл ирүүлсэн байв.
Увс, Дархан-Уул аймгаас өргөдөл, гомдол, мэдээлэл ирээгүй байна.
124 өргөдөл, гомдол, мэдээллийн агуулга нь гэмт хэргийн шинжтэй, 54 нь ашиг сонирхлын зөрчил, хөрөнгө, орлогын мэдүүлэгтэй холбоотой байжээ. Төрийн байгууллагын ёс зүй, хүнд суртал, удирдах ажилтны гаргасан шийдвэртэй холбоотой 3 мэдээлэл байв.
Цагдаа, боловсрол, нутгийн удирдлага, барилгын салбар болон байгууллагатай холбоотой өргөдөл, гомдол, мэдээлэл 2017 оны III улиралд давамгайлжээ. Нийт өргөдөл, гомдол, мэдээллийн 48 нь цагдаа, 20 хувь нь боловсролын салбарт хамаарч байна.
Өргөдөл, гомдол, мэдээлэлд холбогдсон албан тушаалтнуудын 29 нь төрийн тусгай албаны, 24 нь төрийн захиргааны, 14 нь төрийн үйлчилгээний, 14 төрийн улс төрийн албан тушаалтан, 4 нь төрийн оролцоотой хуулийн этгээдийн албан хаагч, 3 нь төрийн бус байгууллагын ажилтан зэрэг байна.
Албан тушаалаа урвуулсан, хэтрүүлсэн гэх гомдол 54 буюу хамгийн олон байв.
Авлигатай тэмцэх газар иргэд, аж ахуйн нэгж, байгууллагаас 2017 оны III улиралд хүлээн авсан 181 өргөдөл, гомдол, мэдээллийн 118-ыг нь шийдвэрлэсэн байна.
Гэмт хэргийн шинжтэй 22 гомдолд эрүүгийн хэрэг үүсгэсэн бол 1 өргөдөл, гомдол, мэдээллийн зөрчлийг тогтоож шийдвэрлэжээ. Шийдвэрлэсэн өргөдөл, гомдол, мэдээллийн 9-д нь зөрчил илрээгүй тул хаасан байна.
Дүн шинжилгээг ЭНД ДАРЖ үзнэ үү.
-
2017 оны 11 сарын 08
Энэ удаагийн “Ярилцлагын булан”-нд Чингэлтэй дүүргийн Татварын хэлтсийн Татвар төлөгчтэй харилцах тасгийн дарга Л.Болормаатай и-баримт олголт болон 2017 оны татвар төлөлт, буцаан олголт, хөнгөлөлт, чөлөөлөлтийн ажил хэр явцтай явж байгаа талаар ярилцлаа.
Чингэлтэй дүүргийн татварын хэлтсийн хувьд энэ сард ямар ажлууд хийгдэж байна вэ?
Манай татварын хэлтэс төдийгүй улс орон даяар энэ сарын 01-ээс 25-ыг хүртэлх хугацаанд татвар төлөгчийг тоолох ажлын нэгдсэн удирдамжийн дагуу хэд хэдэн шат дараатай ажлууд хийгдээд явж байна.
Тухайлбал тухайн нутаг дэвсгэрт үйл ажиллагаа эрхэлж буй татварын албанд бүртгэлтэй, бүртгэлгүй татвар ногдох үл хөдлөх эд хөрөнгө эзэмшигч, ашиглагч, түрээслэгч, хувь хүн, хуулийн этгээд, төсөвт болон болон төрийн бус байгууллага, салбар, төлөөлөгчийн газар ,сан, сууц өмчлөгчдийн холбоо, бизнесийн үйл ажиллагаа явуулж төлбөрийн баримт олгох үүрэг бүхий цэгийг тоолох ажил юм. Энэ ажил нь бидний зүгээс анхааран ажиллаж байгаа хамгийн том ажлуудын нэг гэж хэлж болно.
Дүүргийн хэмжээнд манай хэлтэст бүртгэгдээгүй 800 орчим татвар төлөгч байна гэсэн судалгаа гарсан. Тиймээс бид татвар төлөгчийг тоолох ажлын хүрээнд бүртгэгдээгүй, зөрчилтэй ААН-ийг бүртгэнэ .
Мөн Нэмэгдсэн өртгийн албан татварын тухай, нийслэл хотын албан татварын тухай хуулийн хэрэгжилтийг хангаж ажиллаагүй иргэн, ААН-дэд мэдэгдэл, албан шаардлагуудыг хүргүүлсэн. Хуулийг хэрэгжүүлээгүй иргэн, аж ахуйн нэгжүүдэд шинээр батлагдсан зөрчлийн тухай хуулийн дагуу хариуцлага тооцож эхэлнэ.
НӨАТ-ын буцаан олголтоор дамжин давхар тайлан тооцоо гаргадаг явдал багасна гэж ойлгож болох уу?
НӨАТ-ын буцаан олголт гэдэг нь иргэн, аж ахуйн нэгжид зүгээр мөнгө өгөөд байгаа асуудал биш. Иргэн та баримтаа цуглуулаад тухайн ААН-ийг үнэн зөв санхүүгээ тайлагнаж байгааг давхар хянаж байгаа юм. Иргэд энэ хяналтад оролцсоноор нь урамшуулах ажлыг зохион байгуулж байна гэж ойлгож болно. Далд эдийн засгийг арилгах, олон тайлан баланс гаргах боломжгүй болох юм.
Өнөөдөр НӨАТ-ын падааныг цахим хаяг руу оруулдаг маш хялбар системийг ашигладаг болсоноор татвар төлөлт сайжирч, төсвийн орлого нэмэгдэж байна.
Чингэлтэй дүүргийн хэмжээнд татвар төлөлт 2017 оны хувьд хэдэн хувьтай байгаа вэ?
2017 оны 10 сарын байдлаар /өссөн дүнгээр/ улсын төсөв 135,0 хувьтай, нийслэлийн төсөв 97,4 хувьтай, дүүргийн төсөв 106,6 хувьтай явж байна. Нийт төлөвлөгөөний биелэлт 111,5 хувьтай явж байна.
НӨАТ-ын баримт бүртгүүлэхэд ААН илгээхгүй байх тохиолдол их гардаг. ААН-дэд төлбөрийн баримт илгээх тодорхой хугацаа байдаг уу?
Аж ахуйн нэгж 72 цагийн дотор илгээх үүрэгтэй . Гэхдээ илгээгээгүй байна гэсэн төлөв байдаг. Иргэд маань ААН илгээгээгүй гээд гараад ирсэн тохиолдолд баримтаа устгаад дахиад оруулсанаар автоматаар баталгааждаг.
Аж ахуйн нэгж 72 цагийн дотор төлбөрийн баримтаа илгээгээгүй тохиолдолд иргэдийн зүгээс татварын албаны 1800-1288 утсанд болон харъяа татварын албанд хандах боломжтой.
Мөн НӨАТ илгээгдсэн эсэх нь татварын албанд харагддаг учраас баримтаа цаг тухайд нь илгээх шаардлагыг ААН-дэд байнга тавьж ажиллаж байна.
Нийслэлийн татварын газраас хамгийн сүүлд томоохон зах худалдааны төвүүдийг и-баримт олгох арга хэмжээ авч ажиллаж байгаа тухай мэдээлсэн. Чингэлтэй дүүргийн хувьд ямар зах, худалдааны төвүүдэд энэ ажил хэрэгжиж байгаа вэ?
Манай дүүргийн хувьд Хүчит шонхор зах, Тэди гар утас худалдааны төвд нэгдсэн системд холбогдох ажлууд хийгдэж байна. Тэди төвийн хувьд 10 дугаар сарын дундаас зарим павилионуудад олгож эхэлсэн. Энэ ажлын хүрээнд Хүчит шонхор худалдааны төвд үйл ажиллагаа явуулж буй иргэн, ААН-дэд дараагийн долоо хоногоос сургалт хийхээр төлөвлөн ажиллаж байна.
Мөн “Хэрэглэгчийн систем нийлүүлэгчдийн холбоо”-той хамтран кассын посс машин, төхөөрөмжүүдийн талаар мэдлэг, мэдээлэл олгох, зөвлөгөө өгөх арга хэмжээг зохион байгуулаж ажиллахаар төлөвлөгдсөн.
Энэ арга хэмжээ нь хэзээ зохион байгуулагдах вэ?
Одоогоор БГД-ийн Барс худалдааны төв дээр явагдаж байна. Энэ сардаа багтааж Хүчитшонхор захад үзэсгэлэн худалдааг зохион байгуулж, татварын албанаас и-баримттай холбоотой заавар, зөвөлгөө өгөөд, татвар төлөгчөө бүртгэлжүүлж, код олгох үйл ажиллагааг нэгдсэн журмаар хийж эхэлнэ.
Бөмбөгөр худалдааны төв дээр и-баримт олгох ажил хийгдэх үү?
Алтжин бөмбөгөр, Содон бөмбөгөр, Юмт бөмбөгөр зэрэг худалдаа үйлчилгээний төвд и-баримтын стандартын шаардлага хангасан програм хангамж болон төхөөрөмжийг нийлүүлэх, татварын сургалт зөвлөгөөг үзүүлэх, иргэдийг худалдан авсан баримтаараа сугалаанд оролцох, урамшуулал авах зэрэг боломжоор ханган ажилласан. Гэвч хамрах хүрээ бага байсан. Ерөнхийдөө Хүчит шонхор төвийг манайхан нэгдсэн системд холбосны дараа бөмбөгөр худалдааны төвийг холбоно гэж төлөвлөсөн. Өнгөрсөн долоо хоногоос бөмбөгөр худалдааны төвд манай байцаагч нар ажиллаж эхэлсэн. Шаардлага, мэдэгдлээ өгч зөрчилтэй эсэхийг бүртгэж, хуулийн шаардлагыг хангаагүй бол албан шаардлагаа тарааж байна.
Өнөөдөр иргэн бүр худалдан авсан барааныхаа баримтыг заавал адваг боллоо. Гэтэл ТҮЦ ажиллуулж буй хувь хүн, жижиглэнгийн худалдаа эрхлэгчид кассын машин байхгүй тул баримт өгдөггүй. Энэ тохиолдолд яах ёстой вэ? Ер нь и-баримт олгох өөр ямар боломжууд байдаг вэ?
Худалдаа бизнес эрхэлж байгаа иргэн, аж ахуй нэгж бүгд ялгаагүй баримт өгөх ёстой . Бидний зүгээс худалдаа эрхэлж буй бүх газруудад албан шаардлагаа өгч байна. И-баримт олгох олон боломжууд байна. Жишээ нь кассын машин, посс машин, интернет орчинд холбогдож мэйлээр илгээх зэрэг олон боломжууд байна. Олгохгүй байгаа газруудыг 1800-1288 дугаарт холбогдож гомдол гаргаж мэдүүлж болно . Тэрнээс ТҮЦ гэхээр баримт олгохоос чөлөөлөгдөнө гэсэн ойлголт байхгүй.
Шинээр байгуулагдсан ААН-дэд и-баримтын талаар сургалт зохион байгуулдаг уу?
Сургалтыг бид байнга зохион байгуулдаг. Аж ахуй нэгжүүд гэрчилгээгээ авснаас хойш 14 хоногийн дотор харьяа татварын хэлтэст бүртгүүлсэн байх ёстой. Хуулиар бүртгүүлсэн газруудад сургалт байнга явагддаг.
Шинээр байгуулагдсан газруудад сард нэгээс хоёр удаа хуваарь гарган, сургалтанд хамрагдах зар тавьж, сургалтаа явуулдаг.
Монгол Улсын иргэн хэчнээн төрлийн татвар төлдөг юм бэ. Мөн эргүүлээд хэчнээн төрлийн хөнгөлөлт эдэлдэг юм бол?
Иргэний хувьд үйл ажиллагаа явуулаад нийт олсон орлогоосоо тухай орлогыг олоход холбогдон гарсан зардалаа хасаж түүнээсээ 10 хувиар бодож ХХОАТ-т төлөх ёстой . Татвараа сар болгон урьдчилгаа хэлбэрээр төлөх боломжтой. Мөн иргэн жилийн эцэст хувь ХХОАТ-ын тайлан гаргаж баталгаажуулах ёстой. Хувь хүний орлогын татварын хөнгөлөлтөнд орон сууцны болон сургалтын төлбөрийн хөнгөлөлтүүдийг эдэлдэг.
Дэлгэрэнгүй ярилцлага өгсөнд баярлалаа.
-
2017 оны 11 сарын 08
Монгол-Оросын хувь нийлүүлсэн “УБТЗ” нийгэмлэг бол Монгол-Оросын найрамдал, хамтын ажиллагааны нандин хэлхээ холбоог залгамжлан авч яваа цорын ганц хамтарсан төрийн өмчит байгууллага юм. Жил бүр тэмдэглэдэг хоёр орны найрамдлын сарын ажилд тус нийгэмлэгийн хамт олон өндөр ач холбогдол өгч ёслол төгөлдөр тэмдэглэн өнгөрүүлдэг уламжлалтай. Тэр тусмаа энэ жил Монгол Улс, ОХУ-ын хооронд дипломат харилцаа тогтоосны 96 жилийн ой, 1917 оны октябрийн хувьсгалын 100 жилийн ой тохиож байгаагаараа онцлог болж байна. Эдгээр тэмдэглэлт өдөр, түүхэн үйл явдлын ойг тохиолдуулан Монгол-Оросын хувь нийлүүлсэн УБТЗ нийгэмлэгийн хамт олон хоёр орны найрамдлын түүх дурсгалыг сэргээн засварлахад ихээхэн ач холбогдол өгч Чойр дахь зөвлөлтийн армийн дайчдын дурсгалд зориулсан цэргийн хөшөөг сэргээн засварлах ажлыг өөрсдийн хүч хөрөнгөөр хийжээ. Энэхүү хөшөөг Чойрт байрлаж байсан зөвлөлтийн цэргийн мотобуудлагын дивизийн цэргүүд аугаа эх орны дайны ялалтын 30 жилийн ойд зориулан 1975 онд барьж босгожээ. Бамбай барьсан 13 метр өндөр орос цэргийн хөшөө нь өндрөөрөө Зайсан толгой дээрх зөвлөлтийн дайчдын хөшөөний дараа орох нүсэр том түүхийн дурсгал юм.
1945 онд зөвлөлтийн чөлөөлөх арми дэлхийн хоёрдугаар дайны сүүлчийн голомт болж байсан Японы милитаризмыг бут цохиж, дэлхий дахинд энх тайвныг тогтоох шударга ариун дайныг японы эсрэг эхлүүлэхэд армийн генерал И.А.Плиевийн командалсан зөвлөлт-монголын цэргийн ар талын ангиуд Чойр орчимд түр байрлаж байсан гэдэг. Дараа нь “хүйтэн дайны” жилүүдэд зөвлөлтийн Өвөр Байгалын цэргийн тойргийн мотобуудлагын дивизийн анги, салбар Чойрт байрлаж, Монгол Улсын тусгаар тогтнол аюулгүй байдлыг хамгаалж байсан юм. 1980 оны эцсээр зөвлөлтийн цэрэг буцахад энэхүү орос цэргийн хөшөө монголын ард түмнийг хамгаалах мөнхийн манаандаа зогсож үлдсэн юм. Ийм их аугаа түүхийг өөртөө агуулсан уг хөшөөн дээр хааяа нэг энд цэргийн алба хаасан орос хүмүүс ирж залуу насаа дурсан чимээгүйхэн уйлж байгаад буцдаг гэсэн.
Он цагийн уртад эмтэрч муудсан орос цэргийн хөшөөг Монгол-Оросын хувь нийлүүлсэн “УБТЗ” нийгэмлэг Монгол-Оросын найрамдлын сарын өдрүүдээр сэргээн засварлаж хуучин төрхөнд нь оруулж орон нутагт нь хүлээлгэн өглөө. Монгол-Оросын найрамдлын сарын ажлын хүрээнд зохион байгуулж байгаа энэхүү ёслолын арга хэмжээнд Говьсүмбэр аймгийн нутгийн удирдлага, иргэд хөдөлмөрчид, ЗТХЯ, ОХУ-ын ЭСЯ, БХЯ, ЗХЖШ-ын төлөөлөл, УБТЗ-ын удирдлага, орос мэргэжилтнүүд хүрэлцэн ирж оролцлоо. Цаашдаа уг хөшөөг Монгол-Оросын найрамдлын түүхийг харуулсан түүхийн цогцолбор болгох талаар Говьсүмбэр аймгийн орон нутгийн захиргаа төлөвлөж байгаа ажээ.
-
2017 оны 11 сарын 08
Хүйтний улирал эхэлж, цас ихээр орж байгаатай холбогдуулан дүүргийн Нийтлэг үйлчилгээний газрууд хариуцсан хороодын нутаг дэвсгэрийн явган хүний зам талбай, гарцан дээрх халтираа гулгааг цэвэрлэж, иргэдийн эрүүл, аюулгүй орчинд амьдрах нөхцлийг бүрдүүлэн урьдчилан сэргийлэх арга хэмжээ авч байна.
Тухайлбал Нийтлэг Үйлчилгээний Газар-4 хариуцсан бүс буюу Хонхорын зам, Академийн зам, Улаанхуарангийн зам, Жанжин клуб, Улиастайн гүүрнээс Гачууртын эцэс хүртэл 1 тонн бодис, 7 тонн давс цацсан бол Нийтлэг Үйлчилгээний Газар-2 хариуцсан зам талбайдаа 2 тонн давс цацаж иргэдийг халтираа гулгаанаас сэргийлж байна. Харин НҮГ-1 тухайн бүсдээ 1 тонн давс цацсан бол, НҮГ-3 хариуцсан зам талбайдаа 2,5 тонн давс, 1 тонн бодис цацаж ажиллалаа. Өнөөдөр дүүргийн хэмжээнд нийт 12,5 тонн давс, хоёр тонн бодис цацсан байна.
Дашрамд мэдээлэхэд Цаг уур, орчны шинжилгээний газраас ирэх өдрүүдэд төвийн нутгаар цас ихээр орж, цасан шуургатай гэж мэдээлсэн учир иргэдийг аюулгүй байдлаа хангаж, анхаарал болгоомжтой байхыг Баянзүрх дүүргийн Онцгой комиссоос анхаарууллаа хэмээн Баянзүрх дүүргийн ЗДТГ-ын Хэвлэл мэдээллийн албанаас мэдээллээ.
