Өнгөрсөн долоо хоногт болж өнгөрсөн онцлох үйл явдлуудаас хүргэж байна.
МОНГОЛ УЛС, АНУ-ЫН ЗАСГИЙН ГАЗАР ХАМТАРСАН МЭДЭГДЭЛ ГАРГАВ
Монгол Улсын Ерөнхий сайд Ухнаагийн Хүрэлсүхийн АНУ-д хийсэн албан ёсны айлчлалын үеэр хоёр орны Засгийн газар Хамтарсан мэдэгдлийг гаргав. Монгол Улс, АНУ хоёр улс дипломат харилцаа тогтоосноос хойших 30 гаруй жилийн хугацаанд гаргасан тууштай хүч чармайлтын үр дүнд Монгол Улс, АНУ-ын улс төр, батлан хамгаалах, эдийн засаг, боловсрол, соёл, иргэд хоорондын харилцаа холбоо гүнзгийрэн хөгжиж ирснийг тэмдэглэж, хоёр талын харилцаа Өргөтгөсөн иж бүрэн түншлэлийн шинэ түвшинд хүрснийг зарлан тунхаглав.
НИЙСЛЭЛИЙН МАН-ЫН ХОРООНЫ ДАРГААР Д.СУМЪЯАБАЗАР СОНГОГДЛОО
Нийслэлийн МАН-ын 34 дүгээр Бага хурал болж даргаараа Д.Сумъяабазарыг сонголоо. Хуралд 369 төлөөлөгч оролцохоор байсны 339 нь оролцож 331 хүчинтэй санал тоологдов. Эдгээр төлөөлөгчийн 80 нь квотоор орж иржээ. МАН-ын Удирдах зөвлөлийн хурлаар Нийслэлийн Засаг дарга намын дарга байх ёстой, ингэж байж сонгуулийн мөрийн хөтөлбөрийг хэрэгжүүлэх боломжтой гэж үзсэн. Тиймээс Удирдах зөвлөлийн хурлаас С.Батболдын нэрийг дэвшүүлсэн юм. Бага хурлын гишүүд үүр цайтал хуралдав. Заалнаас УУХҮ-ийн сайд Д.Сумъяабазар нэр дэвшлээ.
УИХ-ЫН ГИШҮҮН З.НАРАНТУЯА ОЛОН УЛСЫН АЭХ-НЫ УЗ-ИЙН ГИШҮҮНЭЭР СОНГОГДЛОО
УИХ-ын гишүүн З.Нарантуяа “Олон улсын Ардчилсан эмэгтэйчүүдийн холбоо”-ны Удирдах зөвлөлийн гишүүнээр сонгогдлоо. АНУ-ын Лос Анжелес хотноо болж буй “Олон улсын Ардчилалын холбоо”-ны гүйцэтгэх зөвлөлийн хуралд Ардчилсан намаас УИХ-ын гишүүн З.Нарантуяа, Гадаад харилцааны асуудал хариуцсан нарийн бичгийн дарга Ц.Сүхбаатар нар оролцож байна.
МАН-ЫН XXXIV БАГА ХУРАЛ ШИРҮҮН ӨРНӨЛӨӨ
Нийслэлийн МАН-ын XXXIV Бага хурал Монголын хүүхдийн ордонд 09.00 цагт эхэлж, үргэлжилж байна.
Хурлыг Барилга, хот байгуулалтын сайд асан Г.Мөнхбаяр, орлогчоор Эрүүл мэндийн сайд асан А.Цогцэцэг нар даргалж байна.
Намын хурал эхлэхийн өмнө мандатын комиссын илтгэлийг сонссоны дараа Бага хуралд оролцсон гишүүд эсэргүүцэж, мандатын тоо болон бусад мэдээллийг ил болгох, шударга хурал зохион байгуулахыг шаардаж, хурлын танхимд уур амьсгал ширүүхэн болж байна.
350 САЯ АМ.ДОЛЛАРЫН ТУСЛАМЖИЙН ГЭРЭЭНД ГАРЫН ҮСЭГ ЗУРЛАА
Монгол улсын Ерөнхий сайд У.Хүрэлсүх, АНУ-ын Төрийн нарийн бичгийн дарга Майк Помпео нар Мянганы сорилтын сангийн 350 сая доллар буюу 875 тэрбумын төгрөгийн буцалтгүй тусламжийн гэрээг баталгаажуулж гарын үсэг зурлаа.
ДЭЭД ШҮҮХ "ЭРДЭНЭТ"-ИЙН 49 ХУВИЙН ТАЛД ШИЙДВЭР ГАРГАВ
Улсын Дээд шүүхийн Захиргааны хэргийн танхимын хяналтын шатны шүүх хуралдаан өнөөдөр боллоо. Танхимын тэргүүн нь шүүх хуралдааныг даргалсан бөгөөд Дээд шүүхийн Захиргааны хэргийн танхимын хяналтын шатны шүүх хуралдаан “Эрдэнэт” үйлдвэрийн 49 хувийг төрийн мэдэлд авсан Засгийн газрын тогтоол нь хууль зөрчсөн байна гэж үзжээ.
Г.ЗАНДАНШАТАР ШИВЭЭХҮРЭН, СЭХЭЭ БООМТОД АЖИЛЛАЛАА
Монгол Улсын сайд, Засгийн газрын Хэрэг эрхлэх газрын дарга Г.Занданшатар Өмнөговь аймгийн Гурвантэс суманд ажиллах үеэрээ аймаг, сумдын удирдлагуудтай уулзаж, Гашуунсухайт, Шивээхүрэн боомтын үйл ажиллагааг өргөтгөх, нэвтрүүлэх чадлыг нэмэгдүүлэх талаар ярилцаж, санал солилцлоо. Мөн хил орчмын бүс нутгийн аялал жуулчлалыг хөгжүүлэх талаар ярилцсан юм.
МОНГОЛБАНК ДОЛЛАРЫН ХАНШИЙН ӨСӨЛТИЙГ "УЛИРЛЫН ЧАНАРТАЙ" ГЭЖ ТАЙЛБАРЛАЛАА
Сүүлийн өдрүүдэд төгрөгийн ханш суларч, нэг ам.долларын төгрөгтэй харьцах ханш 2500 төгрөгийн босго давлаа. Үүнтэй холбогдуулан Монголбанкнаас мэдээлэл өнөөдөр мэдээлэл өгсөн юм. Монголбанкныхан мэдээлэл өгөхөөсөөө өмнө олон нийт 2500 гэдэг тоонд нь ач холбогдол өгч ам.долларынхан ханш огцом өссөн мэтээр хүлээж аваад байгааг онцолж байлаа. Ам.долларын ханш энэ оны эхнээс гурван хувиар өсчээ.
Б.Лхам
