Монголчууд их тайван улс юм. Аливаа асуудал гарахад өөрсдөд нь амь тулж ирэхээс нааш түүнд ач холбогдол өгөх нь битгий хэл, өөр юм яриад суух нь энүүхэнд болжээ. Өнгөрсөн оны 2019 оны арванхоёрдугаар сарын дундуур БНХАУ-ын Хубэй мужид шинэ төрлийн короновирусийн халдвар дэгдлээ. Эл асуудал Монголын тухайн үеийн улс төрийн уур амьсгал, иргэдийн баярын уур амьсгалд дарагдсаар ойрмогхоноос л олон нийтийн ой тоонд орж байх шиг.

Салбар хариуцсан яамнаас халдвартай холбоотой мэдээлэл хийж, зарим зөвлөмжийг гаргах замаар иргэдийг тайвшруулав.

Хүн амын дийлэнх хувь нь тийш байнга зорчдог, хил залгаа хөршид нь гарсан халдварын тохиолдолд манайд гараагүй, түүнээс хэрхэн сэргийлэх талаар салбарын яамнаас зөвлөмж гаргаж, дуугарч эхэлсэн нь сайн хэрэг. Гэхдээ бүхэл бүтэн сар гаруйн өмнө дэгдсэн вирусийн халдвараас хэрхэн сэргийлэх, ямар арга хэмжээ авч буйгаа өнөөдөр ярьж, сэрэмжүүлж байгаа хэтэрхий учир дутагдалтай, арга ядсан үйлдэл биш гэж үү.

Олон улсад гарсан мэдээллээр БНХАУ-ын Хубэй мужийн Ухань хотод гарсан коронавирусийн халдвараар 440 гаруй хүн өвчилж, ес нь нас баржээ. Тус улсын эрүүл мэндийн байгууллагаас уг өвчний гарал үүсэл, эмнэлзүйн аргыг тогтоох, вирусийн тархалтыг зогсоох, урьдчилан сэргийлэх арга хэмжээг тасралтгүй хэрэгжүүлж байгаа ч цар хүрээ нь эрчимтэй нэмэгдэж, Бээжин, Шанхай хот, Гуандун, Сычуан, Юньнань, Шаньдун муж, Гуаншижуаны ӨЗО болон бүр Япон, БНСУ, Тайланд зэрэг улсад хил дамнан вирусийн халдвар бүртгэгдээд байгаа юм. Энэ тоо цаашид өсөн нэмэгдэх хандлагатай буйг ч тус улсын эрүүл мэндийн байгууллагаас анхааруулж байна.

Хүн амын тоо хэмжээ, суурьшлын бүсээсээ хамаараад вирусийн тархалт хаана хүрч, хэзээ намжихыг хэлэхэд мэдээж эрт. Харин хөрш зэргэлдээ улсад нь шинэ төрлийн вирусийн халдвар хурдацтай тархалт гараад байхад бид юу хийгээд сууж байна вэ?. 

Хэвлэл мэдээлэл, сошиал орчинд түгэж, түгээж байгаа сэдвийн агуулга нь нөгөөх л улс төр. Бие биенээ үгүйсгэсэн гүтгэлэг, шүүмжлэл, хардлага тэнд хөвөрч байна. Сүүлдээ УИХ-ын даргын албан томилолтын бүрэлдэхүүнд багтсан гишүүд казино тоглосон эсэх, Н.Номтойбаяр гишүүний бүрэн эрхтэй холбоотой асуудал зэргээр асуудал нь төрөлжсөн болохоос агуулга нь өөрчлөгдсөнгүй.

Энэ хооронд Үндэсний аюулгүй байдлын зөвлөлөөс гаргасан зөвлөмжийн дагуу тэтгэврийн зээлийг нэг удаа тэглэх асуудлыг Засгийн газраас оруулж, УИХ-аас баталсан нь тодорхой жин дарав. Үүнээс өөрөөр урд хөршид гарсан халдварын талаарх тоймтой мэдээ, зөвлөмж манайд явсангүй, гадаад мэдээний төвшинд ойлголттой явсаар ирлээ.

Угтаа бол тэтгэврийн зээл, казино тойрсон асуудал, тулга тойрсон улс төрөөс илүүтэй БНХАУ-аар дамжин Япон, БНСУ, Тайландад бүртгэгдээд байгаа вирусээс урьдчилан сэргийлэх талаар Засгийн газрын төвшинд яаралтай хэлэлцэж, нэн тэргүүнд арга хэмжээ авах нь зүйн хэрэг биш гэж үү. Энэ асуудлыг хуралдаанд оруулж хэлэлцүүлэх нь ч салбарын сайд Д.Сарангэрэлийн үүрэг байлтай.

Эс бөгөөс иргэдийн эрүүл мэндтэй холбоотой асуудлыг хоёр, гуравдугаарт тавих нь Засгийн газар, Эрүүл мэндийн сайдын ажил болчихсон хэрэг үү?. Тийм биш л юм бол БНХАУ-д гарсан шинэ төрлийн вирустээ холбоотой асуудлыг ойрын хугацаанд Засгийн газрын хуралдаанд мэдээлэл хийж, иргэдэд рүү хандсан томоохон ажлыг улс орон даяар өрнүүлэхийг сайд Д.Сарангэрэлээс хүсье. Адаглаад ханиаданд хамгийн өртөмтгий хэсэг болсон цэцэрлэг, сургуулийн хүүхдүүдэд амны хаалт зохион байгуулах, хувийн ариун цэврийг сахих дадлыг эрчимтэй явуулмаар байна. Тэгэхгүйгээр мянга зөвлөмж гаргаад тусыг олохгүй. Тэгээд ч Сар шинийн баяр айлсах болсон энэ цаг үед урд хөршийг зорих иргэдийн хөл хөдөлгөөн олширч таарна. Тэр цагт тэдгээр иргэд халдвар тээгээд ирэхгүй гэсэн баталгаа өнөөдөртөө байхгүй. Төрөөс нийгмийн хэсэгт зориулсан дэмжлэг мэдээж хэрэгтэй. Гэхдээ хүн амын эрүүл мэнд, түнийг сахин хамгаалах нь аль улс орны нэн тэргүүний зорилго зорилт биш гэж үү.

“Сүх далайтал үхэр амар” гэгчээр гэм биш зан болсон энэ байдлаа бид хэзээ халах вэ?!

Г.Эрхэс