Солонгос улсад хүчирхийлэлд өртсөн монгол охины хэрэг дээр ямар арга хэмжээ авч ажиллаж байгаа талаар Монголын эмэгтэйчүүдийн холбооны ерөнхийлөгч Б.Оюунгэрэлээс зарим зүйлд тайлбар авлаа. Тэрбээр ““Элчин сайдын яам энэ хэрэг дээр арга хэмжээ авах ёстой. Манай холбооны хувьд шүгэл үлээх, шаардлага хүргүүлэх  гэсэн үндсэн чиг үүрэгтэй. Энэ хүрээнд Элчин сайдын яаманд шаардлага хүргүүлсэн бөгөөд бид энэ хэрэг дээр хил хязгаар, нөхцөл байдлаас шалтгаалан ийм л арга хэмжээ авч чадна. Шаардлагын хариу ирэхээр дараагийн шатны арга хэмжээ авна. Харин ямар хариу ирэхийг мэдэхгүй болохоор хэлэх боломжгүй байна.  Энэ ганц хүүхдийн тухай асуудал биш, хоёр улсын дипломат харилцаа, цаашлаад БНСУ-д байгаа 50 мянга орчим иргэдийн эрх ашгийн тухай асуудал учир зөв хөдлөх хэрэгтэй. Гэхдээ дипломат харилцаанаас болж, энэ хэргийг дарагдуулна гэсэн үг биш.

Төрийн бус байгууллага хуулийн хүрээнд урьдчилан сэргийлж, шүгэл үлээж, шаардлага хүргүүлэх л үүрэгтэй. Хаана хүүхэд хүчирхийлүүлж буйг бид мэдэхгүй, мэдэх ч ёсгүй.

Ийм тул Монголын эмэгтэйчүүдийн холбоо чадах зүйлээ хийсэн” хэмээн хэллээ. 

Тэгвэл Монголын эмэгтэйчүүдийн холбооноос БНСУ-ын Элчин сайдын яаманд энэ сарын 3-нд хүргүүлсэн шаардлагадаа хоёр зүйлийг тусгажээ. Тухайлбал, хүүхдийг хохироосон этгээдүүдийг ял завшуулахгүй байх тал дээр дэмжлэг үзүүлэх, хүүхэд дахин ялгаварлан гадуурхалт, хүчирхийлэлд өртөхгүй байх тал дээр онцгойлон анхаарч ажиллахыг шаардаж, албан бичиг өгсөн байна.  

Т.Мөнхжаргал