Стриминг үйлчилгээний зах зээл дэх өрсөлдөөн ширүүсэж, хэрэглэгчдийн анхаарлыг татахад тулгарч буй сорилтуудын дунд Netflix компани ажиллах хүчнийхээ зургаан хувийг цомхотгохоор болжээ. Дэлхийн томоохон стриминг үйлчилгээний нэг Netflix компани ойролцоогоор 1000 ажилтнаа цомхотгох шийдвэр гаргасан тухай “Reuters” агентлаг мэдээллээ. Энэ нь тус компанийн 2022 оноос хойших хамгийн том хэмжээний ажлын байрны цомхотгол болж байна.
Цомхотголд бүтээгдэхүүн хөгжүүлэлт, технологи, хууль эрх зүй болон хүний нөөцийн хэлтсийн ажилтнууд голлон өртөх аж. Netflix-ийн хамтран гүйцэтгэх захирлууд Грег Питерс, Тед Сарандос нар ажилтнууддаа илгээсэн дотоод мэдэгдэлдээ компанийн нөөц, ажиллах хүчийг илүү үр ашигтай хуваарилж, цаашдын өсөлт, шинэчлэлд чухал ач холбогдолтой чиглэлүүдэд хөрөнгө оруулах шаардлагатайг онцолжээ.
Тус компани 2025 оны эцсээр ойролцоогоор 16000 үндсэн ажилтантай байсан бөгөөд шинэ цомхотгол нь нийт ажиллах хүчний зургаан хувьтай тэнцэж байна. Netflix-ийн хувьд YouTube зэрэг үнэгүй платформууд болон уламжлалт хэвлэл мэдээллийн компаниудтай өрсөлдөх нь улам ширүүсэж байгаа юм. Үүний зэрэгцээ хэрэглэгчдийн платформ дээр өнгөрүүлэх хугацаа, үзэгчдийн идэвхийг нэмэгдүүлэх асуудал хөрөнгө оруулагчдын анхаарлыг татаж байна.
Тус компани орлогын эх үүсвэрээ төрөлжүүлэх зорилгоор зар сурталчилгаа, шууд дамжуулалт болон видео тоглоомын салбарт үйл ажиллагаагаа өргөжүүлж байгаа ч захиалгын үйлчилгээнээс хамаарах байдлаа бууруулах шаардлагатай тулгарчээ.
Гэсэн хэдий ч компанийн удирдлагууд бизнесийн үйл ажиллагаа тогтвортой, жилийн санхүүгийн зорилтоо биелүүлэх төлөвлөгөө хэвээр байгааг мэдэгдсэн байна. Netflix хамгийн сүүлд 2022 онд захиалагчдын тоо буурсны дараа 450 орчим ажилтнаа цомхотгож байв. Энэ удаагийн шийдвэр нь стримингийн салбар дахь өрсөлдөөн, компанийн цаашдын өсөлтийн стратегитай холбоотой томоохон өөрчлөлт болж байна.
Л.Баяр
