Засгийн газраас ирэх оны нэгдүгээр сарын 1-нээс эхлэн сургуулийн өмнөх боловсролын ажилчдыг орон нутагт шилжүүлэх тухай шийдвэр гарсан байдаг. Тэгвэл үүнийг эсэргүйцэж, Монголын үйлдвэрчний эвлэлийн холбоо болон Сургуулийн өмнөх боловсролын үйлдвэрчний хороо мэдээлэл хийлээ. Цэцэрлэгийн хүүхдүүдийн тоо байгаа хүчин чадлаасаа хоёр дахин нэмэгдсэн ч ажилчдын цалин нэмэгдээгүй хэмээн тэд үзэж байна. Харин бүтэц, зохион байгуулалтын шинэчлэл нэрийн дор төсөв нэмэх үйлдлээ зогсоохыг Засгийн газраас шаардаж байна. Тэдний зүгээс нэн тулгамдаж буй бүтэц, зохион байгуулалтыг хэрхэн өөрчлөх талаар тодорхой мэдээлэл өгөхийг шаардаж, шаардлагын албан бичгээ Засгийн газар болон УИХ-д хүргүүлжээ. Шаардлага хүргүүлсэн цэцэрлэгийн ажилтан, албан хаагчдаас сэтгэгдэл авсанаа хүргэж байна.
Сургуулийн өмнөх боловсролын үйлдвэрчний эвлэлийн хорооны дарга Д.Саранцэцэг: Авсан цалин маань амьдралын баталгаа, нийгмийн асуудлаа шийдэхэд хүрэлцэхгүй байна
-Нийслэлд 266 цэцэрлэгт 3399 албан хаагч ажлын байрандаа сэтгэл санааны дарамттай ажиллаж байна. Эдгээрээс ихэнх нь 40-өөс дээш насныхан. Үндсэн цалин нь 470-550 мянган төгрөг байдаг. Авсан цалин маань амьдралын баталгаа, нийгмийн асуудлаа шийдэхэд хүрэлцэхгүй байна. Тухайлбал, Засгийн газар шийдвэр гаргахдаа Үйлдвэрчний эвлэлийн холбоо болон ажилчдын саналыг сонсохгүйгээр шийдвэр гаргасанд харамсаж байна.
199 дугаар цэцэрлэгийн жижүүр Ц.Ганболд: Засгийн газар бидний шаардлагыг хүлээн авч, зөв шийдвэр гаргана гэж найдаж байна
-Засгийн газар хууль бус шийдвэр гаргачихаад үүнийгээ хэрэгжүүлнэ гээд байгаа нь харамсалтай байна. Би гэхэд сардаа 400 мянга орчим төгрөгийн цалин авдаг. Энэ нь амьдарлаа авч явахад хүрэлцдэггүй. Засгийн газар бидний шаардлагыг хүлээн авч, зөв шийдвэр гаргана гэж найдаж байна.
97 дугаар цэцэрлэгийн тогооч Б.Батжаргал: Эцэг, эхчүүд бидний хувьд энэ шийдвэр цаг үеэ олоогүй санагдлаа
-Цэцэрлэгийн насны хүүхэдтэй, төсвийн байгуулагад ажиллаж байгаа эцэг, эхчүүд бидний хувьд энэ шийдвэр цаг үеэ олоогүй санагдлаа. Засгийн газар, УИХ энэ шийдвэрээ эргэн хараасай" хэмээн хэлэв.
Д.Батчулуун
