Монголын байгаль орчны иргэний зөвлөлийн Удирдах зөвлөлийн гишүүд цаг үеийн асуудлаар мэдээлэл хийлээ. Монголын байгаль орчны иргэний зөвлөл 13 дахь жилдээ үйл ажиллагаа явуулж байгаа юм байна. Манай улсад байгаль орчны тухай олон асуудал бий. Хамгийн тулгамдаж буй асуудал болох гүний усны талаар тэд мэдээлэл хийсэн юм. Гурван жилийн өмнөх судлагаагаар Оюутолгойн гүний усны нөөцийн түвшин 6.5 метр доошилж, 6.5 жил ашиглах усны нөөцийг ашигласан гэв. Энэ үеэр Монголын байгаль орчны иргэний зөвлөлийн тэргүүн С.Амгаланбаатар хэлэхдээ “Өнөөдөр дэлхий даяар байгалийн нөөцийн хувиарлилтын тухай асуудал, байгалийн нөөцийн хэрэглээний тухай асуудал дэлхийн улс орны удирдагчдын нэн тэргүүнд тавьдаг асуудал болжээ. Улс орнууд эдийн засгийн хөгжил, үйлдэрлэгчдийн бодлогодоо байгаль орчиндоо ээлтэй технологийн дэвшлийг хэрэглэдэг болсон. Гэтэл манай улсад байгаль орчны тухай асуудал айлын шоовдор хүүхэд шиг адгийн байрт байна. Үүнээс шалтгаалан Монгол улсад тун харамсмаар үр дүн гарах болжээ. Тухайлбал, монгол улсад сүүлийн 70 жилд гарсан уур амьсгалын өөрчлөлт нь Антрактидын дараа орох хэмжээнд хурдацтай өөрчлөгдөж байна. Дундаж агаарын хэм 2,1 градуст хүрсэн буюу дэлхийн дунджаас хоёр дахин ихэссэн” хэмээн хэлэв. Харин Монголын байгаль орчны иргэний зөвлөлийн удирдах зөвлөлийн гишүүн Б.Батсайхан “Байгалийн аюул монголыг тойрох боломжгүй болсон. Бид усны гүний нөөцийг бүх гол, мөрөн, нуур ширгэсний дараа хэрэглэх ёстой. Гэтэл нөөцөө эхлээд дуусгаж байна. Газрын доорх мөстлөг аюулд орсоноос усны нөөцийн хомсдол үүсэж байна. Энэ мөстлөг үгүй бол бүх гол мөрөн ширгэнэ. Иймээс Монголын байгаль орчны үндэсний зөвлөл хамгийн түрүүнд  усны эх үүсгэврээ халдлагаас  хамгаалах болно. Мөн ойн сан, усны тухай хуулийг дахин сэргээнэ. Тиймээс бид төр засагтай хамтарч ажиллах боломжтой гэж үзэж байна. Төр засаг тэрбум модны талаар ярьж эхэлж байна. Мөн усны нөөцийн талаар хэлэлцэх олон асуудал байна” гэлээ.

Д.Батчулуун