Ражив Гандийн нэрэмжит Үйлдвэр урлалын политехник коллежийн мэргэжил сурталчлах нээлттэй өдөрлөг зохион байгуулагдаж буй юм. Биднийг очиход ЕБС-ийн сурагчид Политехник коллежийн үйл ажиллагаатай танилцаж байлаа. Коллежийн оюутнууд мэргэжилдээ дурлаж, дуртай зүйлсээ чөлөөтэй сэтгэх боломжийг олгодог гэж энэ үеэр багш нар онцлов. Бид тус коллежийн нэгдүгээр курсийн оюутан Л.Мөнх-Хорвоотой ярилцлаа. Тэрбээр Хэвлэлийн график дизайны ангид суралцаж байгаа бөгөөд биднийг очиход өөрийн комик дүрийн хөргийг буулгаж байв.
Намайг Л.Мөнх-Хорвоо гэдэг. Аравдугаар ангиа төгсөөд орж ирсэн. Манай мэргэжлийн хичээл 50 хувь нь гар зураг, 50 хувь нь компьютерын хичээлээр ордог. Зургийн хичээл дээр уран зураг,хар зураг, комик, өнгө зохимжийн тухай үзээд комьпютерийн хичээл дээр үндсэн програмууд болон хэрэглээний програмууд, зургийн програмууд дээр хэрхэн ажиллах талаар нэмэлтээр үздэг. Одоогоор манай ангийнхан комик дүрээ гаргаад, зургийн ажлаа хийж байна. Мэргэжлээрээ 2.5 жил сураад төгсөнө. Миний хувьд бага байхын зураг зурах сонирхолтой, тиймдээ ч энэхүү мэргэжлийг сонгосон. Нэг давуу тал нь ажлын байрын олдоц сайн, хувьсах чадвар сайтай байдаг. Манай дээд ангийн ах эгч нар маань төгсөхөөсөө өмнө ажлын байраа олчихдог.
Тус сургуулийн Хэвлэлийн график дизайнын 1а ангийн оюутан Г.Золжаргал комик дүрээ зурж дуусгажээ. Түүний бүтээлтэй танилцана уу.
Энэ сургуульд Монгол дархны урлал, арьсан эдлэлийн гар урлал, өгөгдлийн сан, тогооч, гоо засалч гээд маш олон мэргэжлийн анги бий.
Үйлдвэр урлалын политехник коллежийн Веб, мультимедиа зохиогчийн ангийн оюутан О.Энхжин: Анх энэхүү нээлттэй өдөрлөг дээр ирээд сургуультайгаа танилцаж байлаа. Сургуулийн орчин, багш нарын хандлага нь суралцахад таатай орчин бүрдүүлдэг. Мөн манай сургуулийн хүүхдүүд маш авьяастай, хүүхдүүдийн хийсэн бүтээл таалагдсан учир энэхүү сургуульд орохоор шийдсэн. Харин мэргэжлээ сонгохдоо судалгаа хийж, судалж байгаад мэдээллийн технологийн салбар таалагдсан учраас сонгосон. Тухайлбал, ажиллах орчин, цалин зэрэг нь. Сургуулиа төгсөөд веб сайт хөгжүүлдэг компани болон телевизийн салбарт ажиллана гэж бодож байгаа.
Сургуультай танилцах зуур нүд хужирлах олон бүтээлтэй тааралдаа. Оюутнууд өөрсдийн чөлөөт сэтгэлгээний үндсэнд бүтээлээ туурвидаг гэж Орчны дизайны багш Д.Туул онцолж байв. Тэрбээр “Энэ жил манай ангид 13 хүүхэд суралцаж байна. Жил бүр ялгаатай байдаг. Хүүхдүүд маань өөрсдийн хүссэн өнгө, хэлбэрээр чимэглэлийн бүтээлээ керамик урлалын материал, шахмал урлалын материал зэрэг олон төрлийн материалаар хийдэг. Жишээлбэл эдгээр хэрэглээний бүтээгдэхүүн, бэлэг дурсгал зэргийг хийх боломжтой. Бэлэг дурсгал хийхэд үйлдвэрлэлийн чанартай бүтээгдэхүүн болдог шүү. Хүүхдүүд маань эртний урлалаа судлаад Хүннүгийн үеийн ширмэл ширдэг болон тэмцэлдээтэй амьтны дүрсийг гурван хэмжээсээр биет бүтээгдэхүүн болгож хийж байна” гэв.
Үйлдвэр урлалын политехник коллежийн сургалт, үйл ажиллагаа болон уг өдөрлөгийн талаар Сургалтын албаны менежер Б.Мядагбадамтай ярилцлаа.
- Танд өдрийн мэнд хүргэе. Сургуулийнхаа тухай товч танилцуулахгүй юу?
- Та бүхэнд энэ өдрийн мэндийг хүргэе. Манай сургууль 56 дахь жилдээ үйл ажиллагаа явуулж байна. Монголын мэргэжлийн боловсролын салбарын анхдагч сургуулиудын нэг. Сургуулийн хувьд гурван удаа байгууллагын магадлан итгэмжлэлд орсон, зургаан хөтөлбөрөөр магадлан итгэмжлэлд орсон гээд чанарын баталгаа хангасан сургуулиудын нэг. Одоогийн байдлаар найман салбарын 28 мэргэжлээр 1.5-3 жилийн оюутны болон насанд хүрэгчдийн сургалт явуулдаг.
- Одоогоор нийт хэдэн оюутан суралцаж байна вэ?
- Энэ жилийн хичээлийн жилийг 2100 оюутантай эхэлсэн. Өнгөрсөн нэг сард мэргэжлийн боловсролын 620 төгсөгч төгссөн. Одоогийн байдлаар 1590 оюутан суралцаж байна. Мөн 190 орчим багш ажилчид ажиллаж байна.
- Нээлттэй өдөрлөгийн талаар танилцуулахгүй юу? Нэг өдөр зохион байгуулагдах уу?
- Энэхүү нээлттэй өдөрлөгийг гурван өдөр зохион байгуулна. Эхний өдрийн нээлттэй өдөрлөг ажил олгогчдод чиглэсэн байгаа. Манай сургуультай хамтарч ажилладаг ажил олгогчид ажлын байрыг танилцуулах, эрэлттэй мэргэжлүүд дээр хүүхдүүдийг бүртгэх зэрэг үйл ажиллагааг зохион байгуулсан. Мөн Худалдаа аж үйлдвэрлэлийн тэнхимийн бизнес эмэгтэйчүүдийн клубтэй хамтарч уулзалт зохион байгууллаа. Өчигдрийн байдлаар 300 гаруй хүүхэд багш нарынхаа хамт ирсэн. Тухайлбал, 28, 45,102 дугаар сургуулиудын сурагчид ирж танилцлаа. Өнөөдрийн байдлаар Ерөнхий боловсролын сургуулиудад урилга хүргүүлсэн тул сурагчид маань ирээд танилцахад нээлттэй. Мөн манай сургуулийн хүүхдүүд өөрийнхөө мэргэжлийг найзууддаа танилцуулж байна. Сүүлийн өдрийн нээлттэй өдөрлөгийг эцэг эхчүүддээ зориулж байгаа бөгөөд сургуулийн орчин, сургалтыг нийт эхчүүддээ танилцуулахаар бэлдээд байна.
- Оюутнуудад суралцаж байх хугацаандаа ажиллах боломж бий юу?
- Цар тахлын нөхцөл байдал сургалтын орчин нөхцөлөө өөрчлөх шаардлага гарсан шүү дээ. Үүнтэй холбоотойгоор тогтсон хэв маягаас гаргах хэрэгтэй болж байгаа юм л даа. Тухайлбал, сургууль дээрээ онолын мэдлэгээ эзэмшээд, дадлагын хичээлээ хамтарч ажилладаг нийгмийн түншлэлийн байгууллага дээр эзэмшиж байна. Үүний хүрээнд оёдлын ангийн хүүхдүүд “Цагаан шонхор” ХК дээр долоо хоногт хоёр удаа очиж дадлага хийдэг.
-Суралцагч нарт тэтгэлэг олгодог нь хэвээрээ юу?
- Коллежийн оюутнууд маань сар бүр 200 мянган төгрөгийн тэтгэлэгтэй суралцдаг. Энэ 2022 онд Засгийн газрын шийдвэрээр нэгэн өөрчлөлт орсон нь сар бүр олгодог тэтгэлгийг төгсөхөд нь бөөнд нь олгох буюу сургуулиа төгсөөд гарааны бизнесээ эрхлэхэд нь эхний хөрөнгө оруулалт байдлаар олгох журам батлагдсан. Нэг үгээр хэлбэл төгсөхдөө сургуулиасаа хөрөнгө оруулалт аваад эхний бизнесээ эрхлэх боломжтой болж байна.
Энэ тавдугаар сарын 20-ноос элсэлт, бүртгэлийн үйл ажиллагаа идэвхэжнэ гэж сургуулийн удирдлагууд хэлж байлаа. Сурагч, эцэг эхчүүд та бүхэн өнөөдөр болж байгаа өдөрлөгт оролцон сургуулийн үйл ажиллагаатай танилцах боломжтой.
Т.Мөнхжаргал
