Ялалтын баярын 77 жилийн ой өчигдөр тохиолоо. Өмнөх 76 жилийн хувьд энэ баярыг оросууд төдийгүй дэлхийн хоёрдугаар дайнд тэдний холбоотон болж оролцож байсан улс орнууд тэмдэглэн өнгөрүүлдэг байсан. Харин ялалтын баярын 77 жилийн ойгоор ОХУ дэлхийн хоёрдугаар дайныг дуусгасан алдар суугаа дэлхийн гуравдугаар дайны эхлэл байж мэдэх хөрш орноо эзлэн түрэмгийлсэн эл үйлдлээрээ үгүйсгэн угтаж байна. Үндэстнийхээ бахархал болсон эл өдрийг нутагтаа байгаа оросуудаас өөр орос үндэстэн тэмдэглэн өнгөрүүлж чадсангүй. Ядаж л ил тодоор. Дэлхий нийтээр оросын эзлэн түрэмгийллийг эсэргүүцэж байгаа учраас тэр.

Харин Монгол Улсад суугаа оросууд л ялалтын баяраар парадад алхан, улсынхаа далбааг өндөрт мандуулан баярлаж чадлаа. Бүр суугаа орныхоо Батлан хамгаалахын салбарын дэмжлэгтэйгээр жагсаж, Үндэсний цорын ганц олон нийтийн телевизээр нь түүнийгээ сурталчилж чадлаа.

Дэлхий нийтээр ОХУ-ын дипломатуудад бойкот үзүүлэн зарим нь бүүр нутаг орноосоо хөөж байхад ОХУ-аас Монгол Улсад суух Онц бөгөөд бүрэн Эрхэт Элчин сайд Искандер Кубарович Азизов л энэ өдөр суугаа орныхоо Үндэснийх нь телевизээр “бахархалт Орос орон”-оо магтан дуулж чадаж байна. 

Өчигдрийн парад уг нь ахмад дайчдад хүндэтгэл үзүүлэх “Мөхөшгүй хороо” нэртэй. Парадад оролцсон Батлан хамгаалах яам, парадын орон даяар шууд дамжуулсан МҮОНТ энэ жагсаалыг ахмад дайчдад хүндэтгэл үзүүлсэн парад хэмээн гөрдөж байгаа. Гэсэн ч эзлэн түрэмгийллээ эхлүүлсэн өдрөө ОХУ тусгаар тогтнолыг нь хүлээн зөвшөөрсөн Донецкийн бүгд найрамдах улсын далбаа, ОХУ-ын эзлэн түрэмгийлэгчдийн бэлгэ тэмдэг болсон “Z” тэмдэглэгээ бүхий туг зэрэг нь энэ парад цаад утгаараа ОХУ-аас Украинд явуулж байгаа эзлэн түрэмгийллийг дэмжээд байгаа л харагдаж байна.

Бучагийн яргалал, Мариуполийн бүслэлтийн дараа “Z” тэмдэглэгээтэй туг далбаа барин парадад жагсах боломжийг олгосон тусгаар улсын Батлан хамгаалахын сайд, бригадын генерал Г.Сайханбаяр, тэр жагсаалыг нь улс орон даяар нэвтрүүлээд Элчин сайдаас ярилцлага авах санаачилга гаргасан МҮОНТ-ийн ерөнхий захирал А.Бүрэнбаатар нар энэ цагт Элчин сайд Искандер Кубарович Азизовоос илүү эгдүү хүргэж байна.

О.Балдан-Очир