Жил бүрийн хавар сурагчдынхаа бүтээлээр уран зургийн үзэсгэлэн гаргасаар дөрвөн оныг үджээ, “Улаанбаатар Элит” олон улсын дунд сургууль. Энэ удаагийн “Meraki” уран зургийн үзэсгэлэн “Монгол Арт” галлерейд өнөөдөр нээлтээ хийлээ. Уламжлал болгон зохион байгуулах болсон уг үзэсгэлэнг жил бүр ямар нэгэн сайн үйлст зориулдаг бөгөөд энэ удаагийн үзэсгэлэнд оролцож байгаа бүтээлээс олсон орлогыг Эрдэнэт хотын наймдугаар ангийн сурагч Д.Билгүүн хүүгийн эмчилгээний зардалд хандивлах юм. “Улаанбаатар Элит” сургуулийн сурагчдын бүтээлээр гаргаж байгаа энэ жилийн үзэсгэлэнд 1-9 дүгээр ангийн сурагчдын 380 гаруй бүтээл дэлгэгджээ. Үзэсгэлэнгийн нээлтийн үеэр тус сургуулийн захирал, багш, сурагчидтай ярилцлаа. 

“Улаанбаатар Элит” олон улсын дунд сургуулийн захирал Б.Тамир:

-Танд энэ өдрийн мэнд хүргэе. Meraki үзэсгэлэнгийн тухай танилцуулахгүй юу? Хэд дэх жилдээ зохион байгуулагдаж байна вэ? 

-Энэхүү үзэсгэлэн дөрөв дэх жилдээ уламжлал болгон зохион байгуулагдаж байна. Анх энэ үзэсгэлэнг санаачлаад зохион байгуулж байсан хүүхдүүд маань “Meraki” гэх нэрийг өгсөн. “Meraki” гэдэг үг грек хэлэнд “Уран бүтээлч хүн хийж буй бүтээлдээ зүрх сэтгэлийнхээ нэгээхэн хэсгийг шингээх” гэсэн утгатай юм билээ. Маш сайхан утга төгөлдөр санагдсан. Тиймээс энэхүү нэрээр дүрслэх урлагийн үзэсгэлэнгээ нэрлэж байхаар шийдсэн. Мөн сурагчдын маань олон нийгэмлэг, клубууд бий. Эдгээр клубууд урлагийн нийгэмлэгтэйгээ хамтраад энэ арга хэмжээг зохион байгуулж байна. Эцэг эхчүүд хүүхдүүдийн зурсан зургийг худалдаж авч байгаа. Борлуулалтын мөнгө Д.Билгүүн хүүгийн эмчилгээний зардалд зарцуулагдах учиртай. Яг энэ хэлбэрээр ирэх жилүүдэд зохион байгуулахаар төлөвлөж байна.

-Д.Билгүүн хүүгийн эмчилгээний зардалд зарцуулна гэсэн шүү дээ. Энэ тухай дэлгэрэнгүй хуваалцахгүй юу? Хүүхдийн эмчилгээнд туслах нь хүүхдүүдийн шийдвэр байв уу? 

-Юу юунд зарцуулж болох вэ хэмээн хүүхдүүдтэйгээ санал солилцсон л доо. Үүний үр дүнд хүүхдийн эмчилгээний зардалд зарцуулахаар болсон. Орчин цагт хүүхдүүдийн эрүүл мэнд ихээхэн асуудал болоод байгаа. Мөн бие биенээ дээрэлхэх, гадуурхах зэргээс болоод бие болон сэтгэлийн хувьд хохирч буй хүүхдүүд багагүй байдаг шүү дээ. Үүний эсрэг дэмждэг, тусалдаг, ойлгодог хүүхдүүд бий шүү гэдэг дохио өгөхийг зорьсон. 

-Үзэсгэлэн хэд хоног үргэлжлэх вэ?

-Гурван өдөр үргэлжилнэ. Амралтын хоёр өдөр дэлгэгдээд нэг дэх өдөр бууж байгаа. Дараа жилийн арга хэмжээгээ эртнээс төлөвлөөд урт хугацаанд зохион байгуулах төлөвлөгөөтэй байна.

-“Meraki” үзэсгэлэн өмнөх гурван жилд дэлгэгдээд олсон орлогоо юунд зарцуулж байсан бэ?

-Эхний жилд хорт хавдартай гэсэн оноштой хүүгийн эмчилгээнд зарцуулагдсан. Мөн тэрхүү хүүгийн эмчилгээнд зориулж, дүрслэх урлагийн багш Ж.Анунаран маань уран бүтээлчдийн дунд үзэсгэлэн худалдаа зохион байгуулж байсан. Тухайн үед нэлээдгүй хандивын мөнгө цугларсан юм. Харин хоёр дахь жилдээ хөгжлийн бэрхшээлтэй хүүхдүүдийн сургалтын төвд дөрвөн удаагийн сургалт зохион байгуулаад, үзэсгэлэнгээ дэлгэж байсан. Хүүхдүүдэд авч байдаг, хэрэглэж байдаг биш сурсан мэдсэн зүйлсээ хуваалцаж, түгээдэг нэгэн болж төлөвшиж байгаад баяртай байна. 

“Улаанбаатар Элит” сургуулийн 4с ангийн сурагт С.Халиун, О.Гэгээнээ:

Бид Улаанбаатар Элит сургуулийн “4С” ангийн сурагчид болох С.Халиун, О.Гэгээнээтэй уулзлаа. Тэд өнөөдрийн үзэсгэлэнд  зориулж модерн Монгол бүжиг бүжиглэсэн юм. С.Халиуны хувьд зураг зурах сонирхолтой бөгөөд бүдэг өнгө сонгож зурах дуртай гэнэ. Харин өнөөдрийн үзэсгэлэнд ирүүлсэн бүтээлээ олон өнгө хоршуулж зурсан байгааг та харж байна. 

Харин О.Гэгээнээ “Тэмүүлэл” нэртэй бүтээлээрээ үзэсгэлэнд оролцож байна. Түүний хувьд шар, ягаан, цэнхэр өнгийг хослуулж зурсан энэхүү бүтээлээрээ “үргэлж урагшаа тэмүүлэх гэсэн санааг илэрхийлэхийг хүссэн” гэв.

“Улаанбаатар Элит” сургуулийн урлагийн багш Ж.Анунаран: 

Урлаг бидний амьдралын бүхий л жижиг орон зайд хүртэл оршиж байдаг. Тийм ч учраас хүүхдийн хүмүүжилд хамгийн чухал. Хүүхдийг багаас нь эхлээд зураг зур гэх биш түүнийг ойлгохоос эхлэх нь чухал байдаг. Урлагийг ойлгож, хүлээж авч,уншиж сурснаар биеэ авч явах байдал, юуг юутай хоршуулах, хувцсаа хэрхэн сонгохоос эхлээд маш хэрэгтэй туршлага бий болдог. Өнөөдрийн үзэсгэлэнд 5-6 дугаар ангийн сурагчид маань хаягдал бүтээгдэхүүн, хуучин эд зүйлсийг нэгтгэж ямар туршилт хийж болох талаар хичээл дээр үзсэн мэдлэгээ бататгаж бүтээлээ хийсэн байгаа.

“Улаанбаатар Элит” сургуулийн есдүгээр ангийн сурагч Т.Анар: 

Энэхүү үзэсгэлэнд дөрвөлжин дүрсийг түлхүү оролцуулж зургаа зурсан. Зургандаа дулаан өнгийг түлхүү оруулж зурсан. Ямар нэг утга санаа байхгүй. Өөрийнхөө юу бодож байгааг зургандаа буулгасан. Миний хувьд зураг зурдаг гэхээсээ илүү сургуулийнхаа үйл ажиллагааг зохион байгуулдаг. Нийт хүүхдүүдийн 380 гаруй бүтээл энэхүү үзэсгэлэнд оролцож байна.

Д.Батчулуун