Улаанбаатар хотын нийтийн орон сууц эзэмшигчдийн дунд явуулсан санал асуулгаар Нэгдүгээрт,“Нийтийн эзэмшлийн зам талбайг бий болгож, ногоон байгууламжийг нэмэгдүүлэх”, Хоёрдугаарт, “Орон сууцны хотхонруу орох гарах гарцыг сайжруулах”, Гуравдугаарт, “Орон сууцны хотхоны эргэн тойрны хог хаягдлыг шийдвэрлэх” зэрэг санал хамгийн өндөр хувьтай гарсан юм. 

Дэлхийн хөгжиж байгаа орнуудад нэг хүнд ногдох ногоон талбай бүхий нийтийн эзэмшлийн талбайн хэмжээ 24 м.кв ногддог. Харин Улаанбаатар хотод нэг хүнд ердөө 4 м.кв ногоон байгууламж бүхий нийтийн эзэмшлийн талбай ногдож байна гэсэн статистик бий.  

Улаанбаатар хотод ногоон байгууламж бүхий нийтийн эзэмшлийн талбай дутмаг байгаа хэд хэдэн шалтгаан байгаа гэж иргэд үзэж байна. Нэгдүгээрт, Социализмын үед маш зөв зохион байгуулалт, төлөвлөлттэйгээр байгуулагдсан хороололд хоёр байрны дунд байшин барих зөвшөөрөл олгосон, тоглоомын талбай дээр дахин орон сууц барьсан. Хоёрдугаарт, Шинээр төлөвлөн барьж байгаа баригдсан хороололуудыг барих газрыг олгохдоо ямар ч төлөвлөлтгүйгээр өгсөн. Үүнээс нь үүдэн ногоон байгууламж байтугай машины зогсоолгүй, орох гарах гарцгүй орчинг бий болгосон нь үнэн. 

Монгол Ардын нам 30 дугаар Их хурлаараа “Социал демократ” үзэл баримтлалтай нам гэдгээ тодотгон зарласан. “Социал демократ” үзэл баримтлалын нэг үнэт зүйл нь эв санааны нэгдэл. Хүсэл зорилго, санал бодлоо нэгтгэн иргэд хамтран өөрсдийнхөө байгаа орчноо хамтын хүчээр, эвлэлдэн нэгдэж шийдвэрлэх нь ямар ч эрх мэдлээс илүү. 

Энэ ч утгаар МАН-ын дэргэдэх “Дэвшилтэт Социал демократ клуб” нь Улаанбаатар хотын нийтийн орон сууцны оршин суугчидтай хамтран орон сууц эзэмшигчдэд тулгамдаж буй асуудлаа шийдвэрлэх, өөрсдийн эрх ашгийг хамгаалахаар нэгдэн нийлж “НЭГЭН ДЭЭВЭР ДОР” төслийг хэрэгжүүлж эхлээд байна. 

Өнгөрсөн амралтын өдрүүдэд уг төслийн хүрээнд Хан-Уул дүүргийн 4-р хороонд иргэдээс тусгаарлаж хашаалсан буюу Хүүшийн амны сул газрыг олон нийтийн эзэмшилд авч, улмаар цэцэрлэгт хүрээлэн болгох санаачлагыг иргэдтэй хамтран зохион байгууллаа. 

Мөн Хан-Уул дүүргийн 11-р хороо буюу Зайсангийн аман дахь Дугуй цагаан орчимд байрлах ашиглалтаас гарсан шавар гэрүүдийг буулгаж, оронд нь нийтийн эзэмшлийн зам талбай, тоглоомын талбай, спорт талбай байгуулахыг нийслэлчүүдтэйгээ хамтран илэрхийлж тэдний саналыг сонсох арга хэмжээ зохион байгуулагдлаа. 

Эвлэлдэн нэгдсэн иргэдийн санал, зорилго, тэмүүлэл юу юунаас ч илүү хүчтэй байдаг. Өчигдөр өглөө 09:00 цагт зохион байгуулагдсан арга хэмжээний үр дүн өнөөдөр өглөө гарч Зайсангийн аман дахь Дугуй цагаан орчимд байсан ашиглалтаас гарсан 40 гаруй шавар гэрийг нурааж эхэллээ. Цаашид Дугуй цагаан орчимд ахмадууд салхилах, хүүхдүүд тоглох, залуучууд хөгжилдөх хамгийн тав тухтай, хамгийн аюулгүй, хамгийн эрүүл орчин болно. Энэ бол “Дэвшилтэт Социал демократ клуб”-ийн “НЭГЭН ДЭЭВЭР ДОР” төслийн багийн хамт олноос хүүхдийн эрхийг хамгаалах өдрийн урьд барьж буй нэгэн том бэлэг боллоо. Өнөөдөр залуучууд хэн нэг улс төрч, аль нэгэн улс төрийн хүчний төлөө тэмцсэнгүй. Харин тэд ахмад настан, бяцхан дүү нар, үе тэнгийн найзуудынхаа сайхан орчны төлөө дуугаа нэгтгэсэн нь шууд биелэлээ оллоо. Энэ бол шинэ цагийн залуусын шинэ бөгөөд эрүүл хандлага. 

Дашрамд дурдахад “Дэвшилтэт Социал демократ клуб”-аас санаачлан хэрэгжүүлж байгаа “НЭГЭН ДЭЭВЭР ДОР” төслийн хүрээнд Төв цэнгэлдэх хүрээлэн, Зайсангийн ам, Хүүшийн ам, Үндэсний соёл амралтын хүрээлэн, Сэлбэ голын эрэг, Засгийн газрын ордны арын цэцэрлэг, Сөүлийн гудамж, Баянзүрх дүүрэгт гээд нийт 8 байршилд иргэдтэй хамтран ногоон байгууламж бүхий нийтийн эзэмшлийн талбайн тохижилт хийгдэнэ.