Шуурхай мэдээ: Эмээлт дэх махны үйлдвэрийн асуудалтай холбоотойгоор "Махны холбоо"-оос шуурхай мэдээлэл хийж байна.

Махны холбооны Ерөнхийлөгч Н.Очирбат: Монголын махны холбоо гэдэг бол мах бэлтгэн үйлдвэрлэдэг 65 орчим үйлдвэрийг нэгтгэсэн холбоо. Сүүлийн үед хэвлэл мэдээллийн байгууллагаар мах боловсруулахтай холбоотой олон мэдээлэл гарлаа. Иймд тайлбар хийхээр мэргэжлийн хүмүүс ирээд байна.Махыг уусмалд бэлтгэсэн үйлдвэр гээд байгаа газар манай холбоотой хамааралгүй. Тус холбооны харьяат үйлдвэрүүд долоо хоног бүр бүтээгдэхүүний дээжийг лабораторид өгдөг” гэдгийг хэллээ. Мөн “Импортлогч орны хувьд дотооддоо үйлдвэрлэж байгаа бүх төрлийн мах махан бүтээгдэхүүнд тогтмол хяналт тавьж, лабораторийн шинжилгээ хийдэг. Махны экспорт өнгөрсөн жилийн зургадугаар сарын 20-нд хаагдсан. Ингэхдээ махандаа биш гаднах хайрцагт нь ковидын вирус байна” гэсэн үндэслэлээр зогссон. Түүнээс хойш нэг кг мах ч хилээр гараагүй. Экспортод гарч байгаа мах махан бүтээгдэхүүн энэ мэт хатуу шаардлага дор хил давдаг учраас хүний биед хортой, хэрэглэгчдэд аюултай бүтээгдэхүүн гарах боломж бараг байдаггүй" гэв.

"Мах маркет" ХХК-ийн гүйцэтгэх захирал М.Болор: Монгол улсад махны ууган үйлдвэрүүд хэд хэд бий. Тэр олон улсын хүнсний аюулгүй байдлын тогтолцоо, ISO 22000, хүнсний аюулгүй байдлын цогц тогтолцоог олон улсын аудитад шалгуулсан. Бид өдөр бүр түүхий эдээс эхлээд эцсийн бүтээгдэхүүн хүрэх хүртэл дээж авч 100 орчим төрлийн шинжилгээнд оруулдаг учраас эрүүл эргэлзээгүй бүтээгдэхүүнийг хэрэглэгчдэд нийлүүлдэг. Зөвхөн дотоод ч гэлтгүй гадаадад ч хүлээн зөвшөөрөгдсөн. Тиймээс ард түмэндээ хэлэхэд үндэсний үйлдвэрлэсэн бүтээгдэхүүн маань ямар ч эргэлзээгүй, иймээс ганц нэг үйлдвэрийн жишээн дээр туйлширч мах махан бүтээгдэхүүн, хиам хиаман бүтээгдэхүүнийг идэж болохгүй гэж битгий бодоорой. Эдгээр бүтээгдэхүүнийг эрүүл аюулгүй, шинэ махаар хийдэг” гэв.

Т.Мөнхжаргал