Цагдаагийн албан хаагч “Парламент телевиз”-ийн сэтгүүлч Г.Гэрэлмаагийн биед халдсан талаар сэтгүүлч Г.Гэрэлмаа мэдээлэл хийлээ. Тэрбээр “Намайг хууль бусаар бичлэг хийсэн гэж цагдаагийн газарт зургаан цаг саатуулсан. Ингэхдээ камер хурааж авч хүнгүй газар 10 гаруй удаа биед халдсан. Нэг ч гэсэн хүн намайг хараасай, сонсоосой гэж зөндөө орилоход миний амыг гараараа таглаад “чи чаддаг юм бол хашхир, уйл хэн ч чамайг сонсохгүй” гээд фургонд ачсан. Ингэхдээ намайг олон удаа цохисон, нэг мэдэхэд би нүүрээрээ фургоны шалан дээр унаж цагдаа нар над дээр гишгэж байсан. Намайг хаашаа авч явж байна гэхэд согтуу авгай минь чамд хамаагүй гэсэн. Цагдаагийн газар очоод драгер үлээлгэсэн 0 бүхэл гарсан. Өнөөдөр 15 цагт Цагдаагийн ерөнхий газраас мэдээлэл хийхдээ шалгалтын ажил үргэлжилж байна, сэтгүүлчээс мэдүүлэг авсан гэсэн. Гэхдээ ийм зүйл болоогүй, зургаан цаг хэн ч надаас мэдүүлэг аваагүй. Би өөрөө очоод мэдүүлэг, гомдлоо өгье гэхэд мөрдөн байцаах албаны дарга Баттөмөр “Чи гомдол гаргаж яах гэж байгаа юм, чамд ямар шаардлагатай юм” гээд халгаагүй. Иймд өөр байцаагчид мэдүүлгээ өгөх гэж байгаа минь энэ” гэв.

Монголын Сэтгүүлчдийн нэгдсэн хэвлэлийн ерөнхийлөгчийн түр орлон гүйцэтгэгч З.Боргилмоо "Сэтгүүлчийг мэргэжлийн, хууль ёсны үйл ажиллагааг цагдаагийн албан хаагчид хүчээр саатуулж биед нь халдаж байгаа, баримтыг устгаж байгаа анхны тохиолдол биш юм. Жилийн өмнө энэ асуудлаар Хууль зүйн сайд Х.Нямбаатар, ЦЕГ-ын дарга Болд нарт хандаж байсан. Өчигдрийн хувьд сэтгүүлчийг сурвалжилга хийж байсан газраас холдуулаад, мэдээлэл дамжуулж байсан төхөөрөмжийг таслан зогсоогоод, гар утас камер хэрэгслийг хураан авсан. Үүнд сэтгүүлч, оператор хоёр хүний асуудал яригдаж байна. Гар утсыг нь аваад, удаан хугацаагаар саатуулсан. Энэ хоорондоо олон нийтэд шууд дамжуулж байсан мэдээллийг устгасан байна. Сэтгүүлчийн дамжуулсан мэдээллийг цагдаагийн албан хаагч устгана гэдэг бол хууль бус зүйл. Энэ нь сэтгүүл зүйн үйл ажиллагаа, мэдээллийн агуулгад халдсан зүйл. Мэдээллийн агуулгыг цензурдаж эхэлж байгаа хэрэг. Хэвлэл мэдээллийн эрх чөлөөний тухай хууль болон эрүүгийн хуулийг зөрчсөн байна. Жилийн өмнө сэтгүүлчдийг түлхэж, хүч хэрэглэсэн ийм явдал болж байсан. Хуулийн байгууллагад ханддаг ч цагдаагийн байгууллага хуулийн дагуу манай албан хаагчид ажлаа хийсэн байна гэж үздэг. Төрийн нэрийн өмнөөс ажилладаг хүчний байгууллага сэтгүүл зүйн үйл ажиллагаанд халдана гэдэг бол иргэний мэдэх эрх, хэвлэлийн эрх чөлөөний эсрэг халдана гэдэг бол ноцтой асуудал. Хэвлэн нийтлэх эрх чөлөө гэдэг бол Үндсэн хуулиар тунхаглагдсан эрх чөлөө байдаг юм. Нэг биш удаагийн үйл явдал учир ЦЕГ-ын дарга нар дүгнэлт хийх болсон" гэв. 

Д.Батчулуун