ТӨБЗГ-ын дарга Б.Цэнгэл, Дарханы Төмөрлөгийн үйлдвэрийн захирал А.Ариунболд нар QSC компани, Засгийн газрыг шүүхэд өгч байгаа талаар мэдээлэл хийж байна. Энэ талаар ТӨБЗГ-ын дарга Б.Цэнгэл дэлгэрэнгүй мэдээлэл өглөө.

Тэрбээр “Дарханы төмөрлөгийн үйлдвэртэй холбоотой асуудлаар "Кю Эс Си" ХХК-аас гаргасан нэхэмжлэлийн дагуу Захиргааны хэргийн шүүхээс энэ нэхэмжлэлийн хувийг бидэнд гардуулж өглөө. Үүнийг гардаж аваад байж байна. Монгол улсын засгийн газрын шийдвэрээр "Кю эс си" ХХК-тай байгуулсан гэрээг цуцлах шийдвэр гаргасан. Дархан төмөрлөгийн үйлдвэрийг төрд буцаан шилжүүлэх арга хэмжээг үе шаттай авсан. Үүний дагуу Сангийн сайдаар ахлуулсан ажлын хэсэг ажиллаж, төрийн төлөөлөгчийг сонгож байсныг олон нийт санаж байгаа байх. "Кю Эс Си" ХХК концессын гэрээг цуцлах тухай 148-р тогтоолыг хүчингүй болгуулах, төрийн өмчийн бодлого зохицуулалтын газрын гаргасан шийдвэрүүдийг тус тус хүчингүй болгуулах тухай нэхэмжлэл гаргасан.

Энэхүү нэхэмжлэлийн дагуу шүүхэд зургаадугаар сарын эхээр хариу тайлбараа гаргаж өгнө. Мөн засгийн газраас миний бие болон тус үйлдэр дээр захирлын үүрэг гүйцэтгэж байгаа А.Ариунболд захирал бид хоёрыг томилсон. Бид мөн эрхээ хамгаалуулах үүднээс баримтуудыг дэлгэж, шүүхэд сөрөг нэхэмжлэл гаргана.

Ноцтой баримтууд бий. Сангийн сайд болон холбогдох байгууллагууд хамтарсан санхүүгийн шалгалт өнөөдөр явагдаж байгаа. Энэ шалгалтын дүн ирэх долоо хоногт дуусна. Үүний дараа санхүүгийн ноцтой тоо баримтууд бий болно. Бид концессын гэрээний тодорхой заалтыг үндэслэж шийдвэрээ гаргасан. "Кю Эс Си" ХХК дарханы төмөрлөгийн үйлдвэрт техникийн шинэчлэл хийх, сайжруулах зэрэг олон сайхан зүйл ярьж энэхүү гэрээг авсан. Гэрээний гол заалтыг хэрэгжүүлээгүй. Зөвхөн хүдрээр нь экспортолж шууд орлого олох зорилгыг урьтал болгосон. Бид санхүүгийн нөхцөл байдал маш хүнд үйлдвэр хүлээж авсан. 610 тэрбум төгрөгийн өртэй тэр компанийг хүлээлгэж өгсөн” гэв.

Д.Батчулуун