Хүүхдийг болзошгүй эрсдэлээс хамгаалах ажлыг Засгийн газрын зохицуулагч таван агентлаг нэгдэн хэрэгжүүлэхээр болсон. Энэ талаар Гэр бүл, хүүхэд, залуучуудын хөгжлийн газар, ЦЕГ, НЭМҮТ, МХЕГ, ОБЕГ-аас мэдээлэл хийлээ.

ГБХЗХГ-ын Хүүхдийн эрхийн хэрэгжилтийн газрын дарга Г.Саранхүү: 860 өрхийн 2.800 орчим хүүхдэд зөвлөн туслах үйлчилгээ үзүүлнэ

"Нэгдүгээрт хүүхэд" нөлөөллийн арга хэмжээний хүрээнд тухайн хорооны хамтарсан багтай хамтран хэрэгжүүлэхээр хоёр бүлгийн 24 ажлыг төлөвлөсөн. Хороо, ӨЭМТ-өөс зөвлөн туслах үйлчилгээгээр хангаж ажиллана. Нэгдсэн арга хэмжээний хүрээнд дүүрэг, хорооны эрсдэлийн программд бүртгэлтэй хүүхдүүдээс таван хүүхдийг сонгож, зөвлөн туслах үйлчилгээ үзүүлнэ. Ингэснээр цаашдаа 860 орчим өрхийн 2.800 орчим хүүхдэд зөвлөн туслах үйлчилгээ үзүүлэхээр төлөвлөж байна.

“Нэгдүгээрт хүүхэд” ажлын хүрээнд  70.4 сая төгрөгийн санхүүжилтийг төсөвлөсөн.

Өнгөрсөн 2021 онд манай улсад 142.442 осол гэмтлийн шинэ тохиолдол бүртгэгджээ.Осол гэмтлийн шинэ тохиолдолд 0-4 насныхны эзлэх хувь өндөр байгаа бөгөөд гэр бүлийн хүчирхийлэл 9.7 хувийг эзэлж байна. Нас баралтын шалтгаанаар авч үзвэл дөрөвдүгээрт буюу 6.9 хувь нь хүчирхийлэлийн шалтгаантай байна.Тиймээс сурагчдын зуны амралт эхэлсэн энэ үед эрсдэлээс урьдчилан сэргийлэх ажлыг ОБЕГ, НЭМҮГ-тай хамтран осол гэмтлээс хамгаалах чиглэлээр ажлыг зохион байгуулж байна.

 НЭМҮТ-ийн өвчнөөс урьдчилан сэргийлэх албаны дарга С.Гэрэлмаа: Хүүхдийн хамгийн аюулгүй орчин гэр байх ёстой

Эхлээд эцэг, эхчүүдэд ажлын байраар дамжуулан эрүүл мэндийн боловсрол олгох сургалтыг эхлүүлэх ёстой. Хоёрдугаарт, хүүхдийн хамгийн аюулгүй орчин гэр байх ёстой. Осол гэмтлийн тэргүүлэх шалтгаан буюу 50 орчим хувь нь гэртээ унаж гэмтсэн бол түүний дараа зам тээврийн шалтгаант осол эзэлдэг. Иймд эцэг эхчүүд хүүхдийнхээ аюулгүй орчныг бүрдүүлэхэд анхаарах ёстой” гэв.

Т.Мөнхжаргал