Парис хотод зохион байгуулагдаж буй ЮНЕСКО-гийн Хүн ба шим мандлын хөтөлбөрийн олон улсын зохицуулах зөвлөлийн 34-р хурлаар Хөвсгөл нуурыг Хүн ба шим мандал хөтөлбөрийн Дэлхийн сүлжээнд бүртгэжээ. Ийнхүү Хөвсгөл нуурын байгалийн цогцолборт газар олон улсад данстай болов. Хөвсгөл нуур орчмын нийт 1.7 сая га газар хамран бүртгэгдсэн юм байна.

Хөвсгөл далайг ЮНЕСКО-ийн дэлхийн сүлжээнд бүртгүүлэх ажлыг эрчимжүүлж, нуурын цэнгэг байдлыг хадгалахад онцгой анхаарах, усны чанарыг байнга судлаж, хянах судалгааны төв байгуулахыг Ерөнхийлөгч У.Хүрэлсүх 2021 оны есдүгээр сард салбарын яаманд чиглэл болгосон байдаг.

Өнгөрсөн хавар Монгол Улсын Ерөнхийлөгчийн санаачилгаар "Хөвсгөл нуураа хамгаалъя" үндэсний чуулган зохион байгуулж, Хөвсгөл нуурыг хамгаалах, нуурын бохирдлыг бууруулах, аялал жуулчлалын бүс болгон хөгжүүлэх, Хөвсгөл нуур судлалыг хөгжүүлэх зэрэг үндэсний хэмжээнд хийх ажлуудыг тодорхой зөвлөмж гаргасан.

Хөвсгөл нуурыг Хүн ба шим мандлын Дэлхийн сүлжээнд бүртгүүлснээр нуурыг хамгаалах ажил олон улсын стандартын дагуу хийгдэх бөгөөд тайлан, мэдээгээ ЮНЕСКО-д хүргүүлж байх юм байна. Уг хөтөлбөр нь 1971 онд үндэс сууриа тавьсан бөгөөд хүн ба хүрээлэн буй орчны хоорондын харилцааг сайжруулахад шинжлэх ухааны үндэслэлийг бий болгох зорилготой олон улсын Засгийн газар хоорондын хөтөлбөр юм байна.

“Хүн ба шим мандал” хөтөлбөрт багтсан газар нутгийг хамгаалахдаа түүний ойр орчимд амьдарч байгаа нутгийн иргэдийн амьжиргааг дэмжих, нийгэм эдийн засаг, соёлын хэрэгцээ шаардлага, онцлогийг нь харгалзан асуудлыг хамтатган шийдвэрлэх зорилготой аж.