Өнөөдөр “Газрын од” ХХК-ийн зүгээс Авто тээврийн үндэсний төвийн хууль бус үйл ажиллагааны талаар мэдээлэл хийсэн. Энэ мэдээллийн талаар тодруулахаар Авто тээврийн үндэсний төвийн Зорчигч тээврийн хэлтсийн дарга Г.Дуламсүрэнтэй ярилцлаа.

-Танд энэ өдрийн мэнд хүргэе. Өнөөдөр "Газрын од" ХХК хэвлэлийн хурал зарласан. АТҮТ тус компанитай ямар харилцаа үүссэн бэ? Энэ талаар мэдээлэл өгөөч?

-АТҮТ нь хот хоорондын зорчигч тээврийн үйлчилгээ эрхэлдэг байгууллагуудтай тээвэрлэлтийн гэрээ байгуулж ажилладаг. “Газрын од” ХХК нь Улаанбаатар- Баян-Өлгий аймгийн чиглэлд үйл ажиллагаа явуулдаг бөгөөд тус компанитай 18 жил хамтарч ажилласан. Гол асуудал юунд үүссэн бэ гэвэл энэ оны нэгдүгээр улиралд хийсэн хяналтын шалгалтаар гэрээний биелэлт хангалтгүй гэж дүгнэгдсэн. Гэтэл тус компанийн зүгээс үүнийг хүлээн зөвшөөрөөгүй. Иймд зургаадугаар сарын 8-13-ны дотор өмнөх шалгалтаар илэрсэн зөрчлийг арилгах чиглэл өгсөн боловч зөрчил арилаагүй байсан тул өнөөдрөөс буюу зургаадугаар сарын 16-ны өдрөөс тээвэрлэлтийн үйл ажиллагааг зогсоосон.

-АТҮТ хот хоорондын хэдэн байгууллагатай гэрээгээр ажилладаг вэ? Өөр ийм асуудал үүссэн газар бий юу?

-Нийтийн зорчигч тээврийн үйлчилгээнд 61 аж ахуйн нэгжтэй хамтарч ажилладаг. Улаанбаатар-Баян-Өлгий чиглэлийн тээвэрт "Цэнгэл транс", "Газрын од" ХХК, "Аман автотранс", "Аумин" ХХК гэх дөрвөн компани үйл ажиллагаа явуулдаг.

-Оны эхний улиралын шалгалтаар зөрчил илэрсэн гэсэн. Ямар зөрчил илэрсэн бэ?

-Гол тээвэрлэлтийн үйл ажиллагаа явуулахад тавигдах шаардлагууд байдаг. Үүнд хамгийн түрүүнд боловсон хүчин, хүний нөөцийн асуудал байдаг. Гэтэл тус компани Баян-Өлгий талдаа тээврийн мэргэжлийн инженер техникийн ажилтан буюу шалгах механикчийг томилж ажиллаагүй байсан. Тээвэрлэлт эхлэхийн өмнө стандартын дагуу шалгах механик заавал шалгаж гаргах ёстой. Тиймээс тээвэрлэлтийн өмнөх үе болон тээвэрлэлтийн үеийн аюулгүй байдал алдагдсан гэж дүгнээд мэргэжлийн боловсон хүчин томилох шаардлага тавьсан. Зөрчил арилгах шаардлага тавьхад мэргэжлийн хүн томилсон эсэхэд эргэлзээ үүссэн. Учир нь гурван өдрийн зайтай хоёр өөр тушаалаар нэг хүнийг томилсон бөгөөд тухайн хүн нь жолоочийн бүртгэлд байдаг нь тогтоогдсон. Хоёрдугаарт, ажилчидтайгаа хөдөлмөрийн гэрээ байгуулаагүй зөрчил илэрсэн. Тухайн компани 56 жолооч бүртгэлтэй. Үндсэн 26 жолоочтойгоо хөдөлмөрийн гэрээ байгуулаад туслах, ээлжийн 30 жолоочтой хөдөлмөрийн гэрээ байгуулаагүй байсан. Гуравдугаарт, дулаан ил зогсоолтой байх, засвар үйлчилгээг мэргэжлийн байгууллагаар хийлгэнэ гэсэн шаардлага бий. Гэтэл тус компанитай гэрээ хийсэн хэдий ч үйл ажиллагаа явуулаагүй зэргээс шалтгаалж тухайн компани нь ажилчдын аюулгүй байдлыг хангаж ажиллаагүй гэсэн дүгнэлтэд хүрсэн.

-“Газрын од” ХХК-ийн зүгээс “манай компани ямар нэг асуудал байхгүй. Төрийн өмчит компанийн зүгээс дарамт шахалт үзүүлж байна. Зам тээврийн яамны сайд байсан хүний хамааралтай, Баян-Өлгий аймгийн засаг дарга Д.Бауыржаны хамаарал бүхий хоёр компанийг оруулж ирсэн гэдэг асуудал ярьсан. Энэ үнэн үү? яагаад ийм асуудал яригдах болсон бэ?

-Тухайн компанийг хэний хамаарлын байгууллага болох талаар мэдэх зүйл алга. Үйлчилгээнд явж байгаа компанийг хэдэн автобус, ажилчинтай байх талаар нөхцөл шаардлага байхгүй. Гол нь тээвэрлэлт гүйцэтгэхэд дээрх дурьдагдпсан хэд хэдэн шаардлага тавьдаг.

-Тус компанитай 18 жил үйл ажиллагаа явуулсан гэсэн. Энэ хугацаанд өөр асуудал, зөрчил үүссэн тохиолдол бий юу?

-Өмнө нь ийм тохиолдол гарч байгаагүй. Цар тахлын нөхцөл байдалтай хоёр жилийн хугацаанд хяналт шалгалтын нөхцлийг сулруулсан. Энэ үед цаасан дээр бичсэн тайлангаар дүгнэж байсантай зэрэгцээд бидэнд цаас л бүрдүүлж өгдөг байжээ. Ингээд шалгаад үзэхэд үүнээс өмнөх үйл ажиллагаанд ч тэр хуурамч материал бүрдүүлж өгдөг байсныг тогтоосон.

- Баярлалаа.

Т.Мөнхжаргал