Боловсролын Ерөнхий Газар, Боловсролын Үнэлгээний Төвөөс "Элсэлтийн ерөнхий шалгалт-2022"-ын оноог эхний байдлаар нэгтгэж, өмнөх онуудын үр дүнтэй харьцуулсан талаар мэдээлж байна. Энэ талаар Боловсролын үнэлгээний төвийн дарга Д.Ганбат танилцууллаа.

Тэрбээр "ЭЕШ-д энэ жил 36,253 шалгуулагч бүртгүүлснээс 2,872 нь шалгалтад оролцоогүй. Тэдний ихэнх нь өмнөх оны төгсөгчид байна. Нэгтгэж үзвэл ЭЕШ-ын ирц 92 хувьтай байв. Газар зүй, түүхийн хичээлд хамгийн бага ирцтэй байлаа.

Мөн энэ жил 220 шалгуулагч 800 оноо авсан. Тухайлбал, Орос хэлийн хичээл дээр 67 шалгуулагч, математикийн хичээл дээр 31 шалгуулагч 800 оноо авчээ. Математикийн 800 оноо авсан шалгуулагчдаас 10 шалгуулагч нь 100-н оноогоо бүтэн авсан байна. Нийт шалгуулагчийн 7333 нь 480 оноо давсан бол 1355 шалгуулагч 400 оноо даваагүй байна.

Энэ жилийн хувьд Монгол хэл, бичгийн шалгалтыг хоёр удаа зохион байгуулсан. Монгол хэл бичгийн шалгалтын босго оноо даваагүй 1180 шалгуулагч байна. Тухайлбал, Баян-Өлгий аймгаас хамгийн олон буюу 450 шалгуулагч босго оноонд хүрээгүй байна. Монгол хэл, бичгийн шалгалтын босго оноо даваагүй шалгуулагч нарт боломж олгон, наймдугаар сард дахин шалгалт авна” гэв.

Д.Батчулуун