Цар тахлын дараах анхны наадам тэгш ойн давхцалтай өргөн дэлгэр эхэлж байна. Энэ үеэр манай сайтын сурвалжлах баг Төв цэнгэлдэх хүрээлэнгээс мэдээллээ бэлтгэн хүргэж байна.

Морьтон Монголчууд түүхт 100 жилийн ойн үндэсний их баяр наадмаа нээхээр Төв цэнгэлдэх хүрээлэнд хүрэлцэн иржээ. Төрийн дуулал эгшиглэхтэй зэрэгцэж хурсан олон суудлаасаа өндийж зүрхэн тушаа гараа авлаа. Энэ зуурт өмнөх жилийн наадмын битүүхэн гуниг үргэж амьсгаа даран хүлээх наадамчин олны сэтгэлийн баясал уухайн дуу, бөмбөрийн чимээтэй хамт нижигнэж түмэн олны хүсэн хүлээсэн дэлхийд ганцхан Монгол наадам нээлтээ хийлээ. Хурсан олны дунд дэлхийн өнцөг булан бүрээс ирсэн жуулчид Монгол үндэсний хувцасаар гоёсон нь өвөрмөц харагдаж байлаа. Тэд наадмын нээлт үзсэн сэтгэгдэлээ ийн хуваалцав.

Сайн байна уу. Манай гэр бүлийн хувьд хамгийн гайхалтай өдөр болж байна. Монголын наадам үнэхээр гайхалтай. Надад зохион байгуулалт нь үнэхээр таалагдсан. Бид энэ өдөрт зориулж Монгол үндэсний хувцас худалдаж авсан. Монголчууд минь бүгдээрээ сайхан наадаарай.

Намайг Жулиенна гэдэг. Би Германаас ирээд нэг долоо хонож байна, энэ миний анхны наадам. Надад наадам таалагдаж байна, энд маш олон хүмүүс наадмын нээлтийг үзэхээр ирсэн байсан. Надад энэ дээлийг Монгол найз маань бэлэглэсэн учраас би өнөөдөр өмсөж ирсэн.

Сайн уу. Би нэг сарын өмнө Чили улсаас ирсэн. Надад наадмын цэргүүдийн дүрэмт хувцас маш их таалагдсан. Улаан, хөх өнгийн хослолууд маш шинэлэг санагдлаа. Мөн морь унаад давхиж байгаа хэсэг үнэхээр гайхалтай.

Т.Мөнхжаргал