Монгол наадам бол Монголчуудын бахархалт түүх, өөрсдийн бүтээсэн гайхамшигт соёл, ёс заншлын илэрхийлэл билээ. Тиймдээ ч дэлгэсэн тэрлэг шиг тал нутгийн дэнж хотойлгосон наадмыг Монгол хүн бүр тэмдэглэн, өргөн дэлгэр наадаж байна. Ийнхүү манай сурвалжлах баг төв цэнгэлдэх хүрээлэнгээс наадамчин олны сэтгэгдлийг сонслоо.  

н.Сайхан: Анхны наадамдаа зориулж шинэ дээл худалдаж авсан

Намайг н.Сайхан гэдэг. Би долоон настай. Энэ жил анх удаа наадам үзэж байна. Наадамд зориулж шинэ дээл худалдаж авсан. Наадмын бүх зүйл их таалагдаж байна. 

Ш.Виктор: Ардын хувьсгалын 100-н жилийн ойн, түүхт баяр наадамд  оролцсондоо баяртай байна

- Сайхан наадаж байна уу? Та маш сайхан харагдаж байна. Энгэр дээрх гавьяа шагналаа танилцуулаач?

- Энэ жилийн наадам өргөн дэлгэр сайхан болж байна. Ардын хувьсгалын 100-н жилийн ойн, түүхт баяр наадамд  оролцсондоо баяртай байна. Өнөөдөр ард түмнээ хүндэтгээд жагсаалын хувцастай ирсэн. Би цагдаагийн байгуулагад 42 ажилласан юм. Олон улсын интервалын шугамаар Бруней улсад анхны төлөөлөгчөөр явж байлаа. Монголын ард түмэн, улс нийгмийнхээ өмнө үүрэг гүйцэтгэсэн олон сайхан гавьяат үйлстэн цагдаагийн байгуулагад  олон бий. Би тэдний нэгэн адил цэргийн гавьяаны улаан тугийн одон, алтан гадас одон, бусад ойн медалиар шагнагдсан.

-Завхан аймгийн ойн медаль харагдаж байна. Та Завхан аймгийнх юм уу?

-Тийм ээ. Би Завхан аймгийн Алдархаан сумын уугуул хүн. Одоо Улаанбаатар хотод амьдардаг.

-Баярлалаа. Та сайхан наадаарай.

-Та бүхэн ч мөн сайхан наадаарай. Энэ дашрамд Монголын ард түмэн болон цагдаагийн байгууллагын хамт олондоо маш их баярлаж буйгаа хэлмээр байна. Та бүхэндээ урт насалж, удаан жаргахыг хүсэн ерөөе.  

н.Баяраа: Бид хоёр жил болгон ижилхэн хувцасаар гоёдог.

Баяр наадам үнэхээр сайхан болж байна. Сэтгэл их хангалуун байна. Найзтайгаа хамт наадам үзэх гээд Налайхаас зорьж ирлээ. Энэ наадмаар найзтайгаа хамт ижил хувцсаар гоёсон. Бид хоёр жил болгон ижилхэн хувцасаар гоёдог. Монголын ард түмэн минь сайхан наадаарай. Эрүүл энхийг хүсье.