Ардын хувьсгалын 100, 101 жилийн ойн баяр наадмаар 50 нас хүрсэн аваргууддаа Монгол төр хүндэтгэл үзүүлсэн юм. Хүндэтгэл үзүүлэхдээ түрүү бөхийн бэлэг гардуулан гарыг нь цайлгав. Энэ бэлгэнд юу байдаг нь наадамчин олонд сонин байсан бөгөөд аварга цолтой бүх бөх энэ бэлгийг авсан.

Дархан аварга Б.Бат-Эрдэнэ цахим хуудсаараа дамжуулан бэлгээ дэлгэн харуулахад дотор нь цай, ёотон, сархад, 3 кг чихэр, хоёр өнгийн дээлийн торго байв. 

Найман гишүүн төгөлдөр цай 5840 төгрөг 

Соёмбо архи 1л 67430 төгрөг 

Сувдан сахар 4560 төгрөг 

Барбарис чихэр 1кг нь 6720 төгрөг 

Молочная чихэр 1кг нь 10860 төгрөг 

Рошейн йогуртини 1кг чихэр 8740 төгрөгөөр Оргил худалдааны төвд зарагдаж байна. 

Дээрх эд зүйлс болох дээлийн өнгө, ёотон зэргээр гар цайлгадаг уламжлал 1960 оноос эхтэй. Тухайн үед эд зүйл, идээ ундаа хомс байсан учир эдгээрийг өгдөг байсан гэдэг. Өдгөө энэ уламжлал улирч, хэдийнэ 60 жил өнгөрсөн. Юу гэхээр Монгол төр  аль 1960 оны сэтгэлгээнээсээ салж чадахгүй гэж харж болохоор байна. Энэ ужгирсан уламжлалт сэтгэлгээг өөрчлөх цаг ирсэн.

Энэ бэлгийг орлуулах олон амттанг манай дотоодын үйлдвэрлэгчид хийж бүтээж байгаа. Чихэр, шоколадыг ядах нь ээ дотоодын үйлдвэрийнх байж болох байв. “Алтан говь”, “Саяан” гээд хэнд ч бэлэглэсэн нүүр улайхгүй, амт чанар, баглаа боодол сайтай чихэр шоколад үйлдвэрлэдэг үндэсний үйлдвэрлэгчид байж л байна. 1960 ондоо гацсан уламжлал нэртэй Монгол төрийн сэтгэлгээгээ халж, орчин үедээ дотоодын үйлдвэрлэлээ дэмжих цаг болжээ. 

Д.Батчулуун