Үндэсний их баяр наадмын шинэчлэн найруулсан хууль, Засгийн газрын тогтоолоор баталсан хурдан морины бүсийн уралдааны хуваарийн талаар мэдээлэл хийж байна. Энэ үеэр Монголын морин спорт уяачдын холбооны тэргүүлэгч гишүүн, хуульч Э.Ганхүлэг мэдээлэл өглөө.

Тэрбээр "Юуны өмнө шинээр батлагдсан хуулийн талаар мэдээлэл өгье. Баяр наадмын тухай хуулийн гуравдугаар хэсэгт морин уралдааны тухай заалт бий. Үүний 21.3 дээр зохицуулалт байгаа. Энэ зохицуулалтад Засгийн газраас баталсан дүрмээр зохицуулна гэсэн байгаа. Засгийн газраас 2022 оны 250 тоот тогтоолоор батлагдсан “Үндэсний хурдан морины уралдааны дүрэм” хэмээх дүрэм батлагдсан.

Энэ дүрэмд хурдан морины уралдах зай,  хурдан морийг шүдлэх, сэрвээ хэмжих зэргийг зохицуулж өгсөн. Сэрвээг лазер хэмжигчээр хэмжинэ хэмээн дүрэмд заасны дагуу энэ жил хэмжиж уралдуулсан. Бүсийн уралдаануудыг энэ дүрмийн дагуу явуулна. Мөн уг дүрэмд азарга соёолон 140см, их нас 141 см, хязаалан 137, шүдлэн 132см, даага 127 см байна гэж заасан.

Тиймээс уяачид маань уг дүрмийн дагуу бүсийн наадам, уралдаан зохион байгуулагдана хэмээн ойлгоорой. Монголын Морин спорт уяачдын холбоо Засгийн газрын тогтоолтой наадмуудыг тухайн  аймгийн засаг даргын тамгын газартай хамтран зохион байгуулдаг. Мөн төв морин спорт уяачдын холбоотойгоо хамтран гурвалсан гэрээ байгуулдаг.

Энэ удаагийн бүсийн наадмууд гурвалсан гэрээ байгуулж, шинээр батлагдсан дүрэм журмынхаа дагуу уралдана. Бүсийн наадмууд хэрүүл маргаангүй, морь хүүхэд мэнд сайхан наадсан сайхан наадам хийгээсэй, зохион байгуулж буй хүмүүс маань үүнд анхаарч ажиллаарай хэмээн хэлэх байна.  

Д.Батчулуун