Увс аймгийн Наранбулаг сумын харьяат БНМАУ-ын алдарт сайн малчин, Бөөрийн Иргэл агсны хөшөө цогцолборын нээлт боллоо. Наранбулаг сумын түүхт 70 жилийн ойд зориулан бүтээсэн тус цогцолборын нээлтэд аварга Х.Баянмөнх, УИХ-н гишүүн О. Цогтгэрэл, Аймгийн Засаг дарга Ч.Чимэд, Улсын арслан Б.Ганбат нар хүндэтгэл үзүүлжээ. 

Бөөрийн Иргэл нь БНМАУ-ын алдарт сайн малчин Дөрвөдийн баруун гарын аймгийн Үнэн Зоригт хошууны /одоогийн Наранбулаг сумын/ нутагт 1904 онд төржээ. Тэрээр багаасаа мал маллан өссөн ч Улаангомын хүрээнд шавилан сууж байгаад 1930 онд хийдийг орхин хар болж хөдөө гарч мал малласан ажээ.

МАХН-ын Төв Хороо, Сайд нарын Зөвлөлийн 1944 оны 92/60 дугаар тогтоолоор мал сүргээ өсгөж 1000 толгойд хүргэсэн малчдыг хөхүүлэн шагнаж байх тухай тогтоол гарсан юм. Уг тогтоолын дагуу 1945 оны 11 дүгээр сарын 30 өдрийн 82 дугаар тогтоолоор мал сүргээ 1000 толгойд хүргэж өсгөсөн 97 малчинд уг шагналыг олгоход Увс аймгаас 31 малчин хамрагдсаны дотор Б. Иргэл орж 5 хошуу малын мөнгөн дүрс бүхий чимэглэл, мөнгөн хуц, мөнгөн бүслүүртэй агар зандан хувин, эрээн майхнаар шагнагджээ.

Уг шагналыг авах үед Б. Иргэл тэмээ 117, адуу 36, үхэр 10, хонь 2060, ямаа 111 бүгд 1334 толго малтай байсан нь дээрх шагнал авсан малчдын дотор хамгийн олон малтай нь байжээ.