Засгийн газрын хуралдаанаас гаргасан шийдвэрийг танилцуулж байна. Энэ үеэр ХХААХҮ-ийн сайд З.Мэндсайхан мэдээлэл өглөө.

Тэрбээр "Засгийн газрын хуралдаанаар намрын ургац хураалттай холбоотойгоор тодорхой шийдвэрүүдийг гаргалаа. ЭНэ жил улсын хэмжээнд 368,4 мянган га улаан буудай, 19,7 мянган га төмс, 10,9 мянган га хүнсний ногоо, 51,2 мянган га малын тэжээл, 116 мянган га тосны ургамал тариалаад нийтдээ 570,8 мянган гад тариалалт хийгээд байна. Наймдугаар сарын 20 гэхэд ургацын урьдчилсан баланс гарна.

Өнгөрсөн жилийн хаврын тариалалтын үед дизель түлшний үнэ 3380 төгрөг байсан бол өнөөдрийн байдлаар 4030 төгрөг байна. 19,6 хувийн өсөлттэй байна. Ургац хураалтад 20-25 мянган тонн түлш хэрэгтэй болдог. Намрын ургац хураалтад зориулж 10 мянган тонн түлшний хаврын тариалалтын үеийн дизель түлшний үнийн түвшинд байлгахаар Засгийн газрын нөөц сангаас 6,5 тэрбум төгрөгийг гарахаар шийдвэрлэлээ. Энэ татаасыг ургац хураалтын гүйцэтгэлээр нь олгоно.

Ургац хураалтын бэлтгэл ажлыг тогтоолын хүрээнд төлөвлөсөн, тариалсан ургацаа хураан авах үүнд хэрэгцээтэй байгаа хүн хүчний асуудлыг шийдэх талаар шийдвэр гаргасан. Тухайлбал, ургац хураалтад их дээд сургуулийн оюутнуудыг оролцуулах. Оролцсон хугацаагаар нь кредит цагийг тооцох талаар БШУЯ-тай ажлын хэсэг байгуулан ажиллаж байна. Энэ жил 10-15 мянган оюутныг ажиллах хүчнээр бэлтгэхээр шийдвэрлэлээ. Мөн ургац хураалтад замын засварын ажлыг хийж гүйцэтгэх, намрын ургац хураалтад шаардлагатай тоног төхөөрөмж, шатах туслах материалыг хилээр саадгүй нэвтрүүлэх шийдвэрийг холбогдох сайд нарт даалгасан.

МАА-н салбарын хувьд энэ жил зуншлага харьцангуй сайн байгаа. Гэсэн хэдий ч баруун таван аймгийн зуншлага оройтож болсонтой холбоотойгоор малын тарга тэвээрэг сайнгүй байна. Тиймээс зудын эрсдэлээс урьдчилан сэргийлэх чиглэлээр Засгийн газрын тогтоол гарлаа. Үүнтэй холбоотойгоор Шадар сайдаар ахлуулсан ажлын хэсэг ажиллана. Өвөлжилтийн бэлтгэл ажил хангах зөвлөгөөнийг ХХААХҮ-ийн сайдаар ахлуулсан ажлын хэсэг маргааш баруун таван аймагт хийхээр төлөвлөж байна.

Энэ хавар 24 сая толгой төл хүлээн авлаа. Өнөөдрийн байдлаар 91 сая толгой мал бэлчээрлэж байна. 24 сая гэдэг бол хамгийн өндөр төл хүлээн авалт болж байна. Малын зүй бус хорогдол 1,6 сая орчим байдаг бол энэ жил 118 мянган толгой байна. Зүй бус хорогдол буурсан. Эрүүл мэндийн урьдчилан сэргийлэх үйл ажиллагааг Мал эмнэлгийн газраас үе шаттай явуулж байна” гэв.

Д.Батчулуун