Монголын авто тээвэрчдийн нэгдсэн холбооноос Шадар сайд С.Амарсайханд шаардлага хүргүүлж буй талаар мэдээлэл хийлээ.
"Монголын нийгэмд эдийн засгийн хямрал болж байна. Энэ нь хилийн бүсэд болж буй чингэлэг тээвэртэй холбоотой. Хөл хорио цар тахалтай холбогдуулан горим тогтоож, тусгай горимын хүрээнд иргэдэд болон хилийн бүсэл ажиллаж амьдарч буй тээвэрчдийн ажлын байрыг булаах асуудал болсон. Үүнийг шийдэхийн тулд тээвэрчид олон удаагийн тэмцэл хийж, албан бичиг хүргүүлсэн. Гэсэн ч төр засгийн авч хэрэгжүүлж буй шийдэл маш дутуу дулимаг байсан.
Өнгөрсөн хавар тээвэрчдийн тэмцлийн үеэр Зам тээврийн сайд Л.Халтар, Шадар сайд С.Амарсайхан нар ажлын хэсэг байгуулж хамран ажиллана гэсэн боловч тэнд зарим нэг хүмүүсийг ажлын хэсэгт оруулаагүй. Орсон хүмүүс нь голоосоо урваж шарвасан. Тээвэрчдийн түр зөвлөл буруу ажил хийж, хууль бус үйлдэл хил дээр явуулж байна. Удаа дараа сумын Онцгой комисст шаардлага хүргүүлсэн. Үүний хариу ирсэнгүй.
Тиймээс автотээврийн зургаан ТББ, хуулийн этгээд нэгдээд “Соёмбо” авто тээврийн нэгдсэн холбоо байгуулагдсан. Нийгэмд болж буй асуудлыг эмх замбараатай болгохын тулд тээврийн асуудлыг шийдэх хэрэгтэй. Тухайн улс орны хөгжлийн тулгуур бол тээвэр байдаг. Тиймээс өнөөдөр Шадар сайд С.Амарсайханд албан бичиг хүргүүлэхээр нийт тээвэрчдийн нэгдсэн холбооны удирдах зөвлөлийн гишүүд ирсэн байна” гэв.
Д.Батчулуун
