Улаанбаатар хотын түгжрэлийг бууруулах ажлын хүрээнд цөөнгүй төсөл хөтөлбөрийг нийслэлийн төсвөөс санхүүжүүлэн хэрэгжүүлж байгаа билээ. Үүний хүрээнд Яармагийн гүүр буюу Наадамчдын авто замаас Энхтайваны өргөн чөлөө хүртэл 780 метр урт гүүр барих 78,9 тэрбум төгрөгийн төсөвт өртөг бүхий тендерийг Нийслэлийн худалдан авах ажиллагааны газраас 2022 онд зарласан юм. Энэ тендерт 5 компани өрсөлдсөнөөс “Мотор сервис” ХХК шалгарчээ.

Харин 1,6 жилийн хугацаанд 4 хэсэг бүхий 780 метр урт гүүр барьж хүлээлгэж өгөх ёстой тус компани өнөөдрийн байдлаар 483 метр урт гүүр барьсан бөгөөд дундаас нь 150 метр урт гүүр ор сураггүй алга болчихсон нь хачирхалтай. Энэхүү зам, гүүрийн барилгын ажилд хяналт тавьж ажиллах ёстой Нийслэлийн замын хөгжлийн газрынхан ч бүхэл бүтэн 150 метр урт гүүр хаашаа алга болчихсоныг тайлбарлаж чадахгүй сууж байна. 150 метр урт гүүрийн төсөвт өртөг нь 17,7 тэрбум төгрөг бөгөөд энэ их мөнгө хэний гараар хаашаа орчихсоныг хариулах хүн байтугай харьяалах эзэн олдохгүй байгаа аж.

Нийслэлийн замын хөгжлийн газрын дарга Б.Одбаяр хоёр трасс давхцсан учраас энэ гүүр хийгдээгүй гэсэн утгагүй тайлбар хэлж сууна. Иймд Нийслэлийн дотоод аудитын албанаас дээрх бүтээн байгуулалттай холбоотой ажилд хяналт шалгалт оруулахад нэлээд олон зөрчил илэрсэн аж. Уг бүтээн байгуулалтын гэрээ болон санхүүжилтийг ажил үүргийн хуваарийн дагуу Нийслэлийн замын хөгжлийн газрын Зам барилга, инженерийн байгууламжийн хэлтсийн дарга Т.Батбилэг, мэргэжилтэн Ч.Батсайхан, нөгөө талаас “Мотор сервис” ХХК-ийн захирал Д.Доржбат нарт холбогдох ноцтой зөрчил илэрчээ. Онц их хэмжээний мөнгө буюу 741,7 сая төгрөгийг төсвөөс давхардуулан олгосон нь аудитын дүгнэлтээр тогтоогдсон байхад өнөөдрийг хүртэл эдгээр нөхдөд хариуцлага тооцохгүй яваа нь харамсалтай. Гэтэл бүр ч илүү ноцтой баримтууд илэрсээр байна. Нийслэлийн Замын хөгжлийн газрын Зам барилга, инженерийн байгууламжийн хэлтсийн дарга Т.Батбилэг нь хуурамч дипломтой болох нь илчлэгджээ. Тэрээр ШУТИС-ийг 2008 онд цахилгааны инженер мэргэжлээр бакалаврын зэрэгтэй суралцаж төгссөн хэмээн D200828037 дугаар бүхий бакалаврын дипломыг төрийн албанд ажилд орохдоо хавсаргаж өгчээ.

Харин энэхүү дипломын дугаараар ШУТИС-ийн төгсөгчдийн нэгдсэн сангаас мэдээллийг нь шалгахад Түмэн-Өлзий овогтой Өрнөх нь гидрогеологи мэргэжлээр суралцаж төгссөн болох нь батлагдаж байна. Энэ талаар ч Т.Өрнөхтэй манай сэтгүүлч холбогдож асуухад “Миний дипломын дугаар мөн байна, цагдаагийн байгууллагаас энэ талаар тодруулж асуусан, хуурамч дипломын асуудлыг цагдаагийнбайгууллага нь шийдээд өгөх байх” гэж хариулсан юм. Түүнчлэн ШУТИС-ийн Сургалтын бодлого, хөтөлбөрийн албаны дарга Д.Эрдэнэтуяа 2024 оны 09 дүгээр сарын 16-ны өдөр Замын хөгжлийн газарт илгээсэн албан бичигтээ “Төмөрхүүгийн Батбилэг нь D200828037 дугаартай бакалаврын диплом нь тус их сургуулийн төгсөгчдийн нэгдсэнд санд бүртгэлгүй болно” хэмээн тодорхойлж өгсөөр байтал хуурамч дипломтой хулхи нөхрийг өнөөдрийг хүртэл ажлаас нь чөлөөлөхгүй байгаагийн цаана хэн гэгч албан тушаалтан хамгаалж байгаа нь сонирхол татаж байна. Удирдлага дор нь ажиллаж буй этгээд хуурамч дипломтой эсэхийг Замын хөгжлийн газрын дарга Б.Одбаяраас тодруулахад “Төрийн албаны зөвлөлөөр шалгагдаад ороод ирсэн хүнийг би яаж мэдэх юм, тэр олон хүний дипломыг би хуурамч эсэхийг би мэдэхгүй” гэж хэгжүүрхсэн билээ. Гэтэл түүнд 2024 оны 9 дүгээр сард ШУТИС-иас албан тоот ирсэн байсан бөгөөд мэдэхийн дээдээр мэдэж байсан нь гарцаагүй. Хуурамч дипломтой Т.Батбилэг болон хулхи хамтрагчаа хаацайлж суудаг Б.Одбаяр нарт хуулийн хариуцлага хэзээ тооцох вэ?