"Дэд бүтцийн хөгжил" ХХК Тавантолгойгоос Сайншанд-Чойбалсан чиглэлийн төмөр зам байгуулах ажлын зураг төсөл, ТЭЗҮ, хайгуул болон санхүүжилтийг эрэх асуудлыг хариуцдаг байна. Уг компанийг ОХУ-ын ерөнхий сайд асан В.Путиныг айлчлах үед байгуулж байжээ. Төмөр зам байгуулах хамтарсан ажлын ерөнхий стратеги баталснаас хойш дээрх компани ажилгүй болсон гэнэ. Энэ тухай ОХУ-аас манайд суугаа элчин сайд В.В.Самойленко хэллээ. 2010 оны долдугаар сарын 25-нд "Оросын төмөр зам"-ын ерөнхийлөгч В.М.Якунин манай талд захидал ирүүлж, Тавантолгой-Сайншанд-Чойбалсан чиглэлийн төмөр зам тавьж эхлэх зөвшөөрөл хүссэн байна. Гэвч үүнд хариу өгөөгүй аж. Мөн оны аравдугаар сарын 28-нд В.М.Якунин Монголд ирж холбогдох хүмүүстэй уулзаж, ажлаа тохиролцох шиг болсон гэнэ. Гэвч ажил мөн л урагшлаагүй байна. Элчин сайд В.В.Самойленко энэ мэтчилэн 2010, 2011 оныг үр ашиггүй өнгөрүүлсэн гэж үзэж байгаа аж.