Дэлхийн олон оронд энэ онд шинэ Засгийн газар, шинэ ерөнхийлөгчөө сонгож байна.
БНСУ-ын парламентын сонгууль энэ сарын 11-нд болсон. Олон улсын
ажиглагчид эрх баригч Ханнара нам болон сөрөг хүчний Ардчилсан Эвсэл нам
санал хураалтын дүнгээр зуузай холбож байна гэж үзэж байсан.
Парламентын сонгуулийн дүн яаж гарахаас одоогийн ерөнхийлөгч Ли
Мён-Бакийн рейтинг ихээхэн шалтгаалах байсан юм. Учир нь 2012 оны
арванхоёрдугаар сарын 8-нд БНСУ-ын ерөнхийлөгчийн сонгууль болно. Дөрвөн жилийн өмнөх парламентын сонгуулиар Ханнара нам 165 суудал авч, үнэмлэхүй ялалт байгуулсан юм. БНСУ-ын 2012 оны парламентын сонгуулийн дүн гарахад 300 суудлаас эрх баригч нам 152 суудал авсан бол сөрөг хүчин болох Ардчилсан эвсэл нам 127 суудал авснаар шинэ Засгийн газар бүрдсэн.
Тус улсад сүүлийн 20 жилийн хугацаанд анх удаагаа парламентын сонгууль нь ерөнхийлөгчийн сонгуультай нэг жилд давхцаж байгаа юм. БНСУ-ын ерөнхийлөгчийн сонгуульд 11 хүн нэр дэвшиж байгаагаас Сэйнери намын дарга Пак Геюн Хей олон нийтийн сонирхлыг татаж байна. Учир нь тэрбээр эдгээр нэр дэвшигч дундаа цорын ганц эмэгтэй нь юм.
Пак Геюн Хей нь Өмнөд Солонгосын түүхэн дэх анхны эмэгтэй нэр дэвшигч болж байна. Тэрбээр 1952 оны хоёрдугаар сарын 2-нд төрсөн. Түүний улс төрийн гараа нь 2004 онд эхэлсэн юм. Одоогоор сонгуулийн компанит ажлаа хамгийн хүчтэй явуулж буй нэр дэвшигч гэхэд болно. Тус улсын эртний уламжлалаас шалтгаалан эмэгтэйчүүдийн нийгэм дэх үүрэг оролцоо нь харьцангуй сул байсан бол тэрээр энэ байдлыг эвдэж БНСУ-ын бүх эмэгтэй сонгогчдыг өөрийнхөө талд "урвуулахаар" ажиллаж байна. Тэрээр өөрийн компанит ажлын баг бүрэлдээхүүнээ эмэгтэйчүүдээр бүрдүүлээд байна. Түүнийг дэмжигчид олон нийтийн газраар Victory буюу "V", ялалт хэмээх уриалга тараажээ.
БНСУ-ын удирдагчдад дэлхий итгэж байгаа бололтой. НҮБ-ын ерөнхий нарийн бичгийн дарга, Дэлхийн банкны ерөнхийлөгчөөр тус улсын лидерүүд сонгогдсон. Тэгвэл ирэх арванхоёрдугаар сард болох ерөнхийлөгчийн сонгуулиар хэн ялалт байгуулах нь олон улсын анхаарлын төвд байгаад зогсохгүй тухайн бүс нутгийн улс төр, эдийн засгийн бодлогод өөрчлөлт оруулж болзошгүй гэж олон улсын ажиглагчид үзэж байна.
