Ерөнхийлөгч Ц.Элбэгдорж өнөөдөр иргэдтэй уулзаж байна. Тэрбээр уулзалтын үеэр үг хэлэхдээ хариуцлага, шүүх эрх мэдэл, авлигын тухай онцолж байлаа. Ерөнхийлөгч Авлигатай Тэмцэх Газар үнэхээр хүнд ажил хийж байгаа гэдгийг дурдаад ерөнхийлөгч байх хугацаандаа авлигыг багасгана гэв. Тэрбээр “Халаасны хулгайч хүртэл өөрөө хулгай хийхээ больсон. Нэг байгууллага дээр авлигач дарга хүрээд ирвэл тэр нь байгууллага даяар халддаг. Улсын хэмжээний авлигач гарч ирэх юм бол улс даяар халддаг. Хэний үед авлига цэцэглэж, хэний үед авлигачид айж байна? Хэний үед авлигал ихэсч, хэний үед авлигал багасав? Авлигалын эзэн нь дандаа үгүйсгэж, бусдаар үгүйсгүүлж явдаг. Авлигыг илрүүлнэ гэдэг амар биш. Хамгийн гол нь энд мөнгөний хүч байна. Мөнгө хэний ч түрийвчинд орж, хэнийг ч өөрийн нөлөөлөлдөө оруулж болдог л байхгүй юу.
Хариуцлага хүлээлгэж чадахгүй юм аа гэхэд айлгаж байх хэрэгтэй. Авлигал Монголын сайхан орныг муухай харагдуулдаг. Ардчилал эрх чөлөөний дайсан бол авлига гэж би боддог. Авлигтай тэмцэх бол миний амлалт биш, миний араншин. Монголын төрд хийх миний хамгийн чухал зорилго, зорилгынхоо төлөө явна. Хамгийн шударга гэж боддог хүн авлигачыг өмөөрөхөөр би гайхдаг. Албан тушаал, мөнгө, анд нөхөд, нутаг ус, хамаатан садны холбоо хүчтэйг би мэднэ. Тийм хүчний өмнө өвдөг сөхөрдөг бол яах гэж надаас шударга ёс нэхээд байгаа юм бэ?
Төрд байхдаа хууль, шударга ёсыг уландаа гишгэдэг байсан этгээд төрөөс холдоод шударга болохгүй ээ. Төрд байхдаа авлигалыг цэцэглүүлдэг байсан этгээд төрөөс холдоод авлигыг үзэн яддаг болохгүй. Хүн бүтээсэн юмаа нурааж чаддагүй. Тэр тусмаа авлигалын сүлжээг нурааж чадахгүй. Төрөөс холдсон хүний үг нь өөрчлөгдсөн байлаа ч уг зан нь өөрчлөгддөггүй” гэв.
