Зуу хүрэхгүй хоногийн дараа эхлэх “Лондон 2012” олимпийн наадмын алтан медалийг Монголын Оюу толгой ордын алтаар хийхээр болсон. Тэгвэл Оюу толгойн алтны хольцтой олимпийн наадмын медалиуд аль хэдийн бэлэн болсон байна. Хэд хоногийн өмнө Лондоны олимпод гардуулах 4700 медалийн дээж болгож заримыг нь Британий музейд тавьжээ. Эдгээр медаль нь тус бүр 400 гр жинтэй, 88 мм-ийн диаметртэй аж. Энэ нь олимпийн наадмын түүхэнд хамгийн том хэмжээтэйд тооцогдож байгаа. Мөн энэ дунд хамгийн их өртөгөөр бүтээгдсэн нь монгол алтны 1,2 хувийн хольцтой алтан медаль болж байгаа юм.
   Орон орны загвар зохион бүтээгчдийн зураг, төслийг гурван жил хэлэлцсний эцэст зохион байгуулагчид Дэвид Ваткинс гэдэг дизайнерийн хувилбарыг сонгосон юм. Медалийн эх хувийг 2012 оны эхээр аль хэдийн гаргасан байсан ч түүхийн утга санаа оруулах эсэх дээр багагүй маргалдаж байжээ.
   Британий музейд одоогоор 70 мянга гаруй медаль хадгалагдаж байдаг бөгөөд хамгийн отгон нь Монголын алтаар хийсэн 2012 оны олимпийн медаль боллоо.