МАХН-ын дарга Н.Энхбаяр авилгалын хэргээр Төв аймгийн урьдчилан хорих төвд цагдан саатуулагдаад 13 хонож байна. Түүнийг Сүхбаатар дүүргийн шүүхээс 14 хоног хорих захирамж гаргасан. Уг баривчилгааг АТГ-аас мэдүүлэг байцаалт авахаар болсон хэмээн тайлбарласан юм. Гэвч хоригдож байх хугацаанд нь түүнээс нэг ч мэдүүлэг авч чадаагүй. Учир нь Н.Энхбаяр гэр бүлийнхээ эсрэг мэдүүлэг өгөхгүй хэмээн нэг ч байцаалт өгөөгүй аж. Харин өнөөдөр Н.Энхбаяр даргыг суллахаар болсон хэмээн МАХН-аас мэдэгдэв. Энэ дагуу тус намын Ерөнхий нарийн бичгийн дарга Н.Удвалаас тодруулахад, “Анхнаасаа хууль бусаар баривчилсан болохоор суллах нь тодорхой байсан. Эрүүгийн байцаан шийтгэх хуулинд сэжигтнээр татагдсан хүнийг 14 хоногоос илүү хорихыг хориглосон байдаг тул ийнхүү суллахаар болсон. Тэгээд ч Н.Энхбаяр даргыг сэжигтнээр тооцоогүй байж хорьсон. Бид одоо Н.Энхбаяр даргыг тосохоор Төв аймаг явж байна” хэмээв.
Харин Н.Энхбаярын өмгөөлөгч О.Баасанхүү “Би өнөөдөр шүүх хуралтай байсан учраас энэ талаар сайн мэдээгүй байна. Хэрвээ суллах захирамж гарсан байвал нөгөө хоёр өмгөөлөгчид өгсөн байж болно. Би байцаалт өгөхөд нь хамт байх өмгөөлөгч” хэмээн хариулав.
Тэгтэл Сүхбаатар дүүргийн шүүхээс тодруулахад “Н.Энхбаярыг суллах асуудал яригдаагүй байна” гэсэн хариулт өгөв.
Юутай ч түүнийг суллах эсэх нь тодорхойгүй байгаа ч намынх нь гишүүд түүнийг тосно хэмээн Төв аймгийн урьдчилан хорих төв рүү хөдөлсөн юм.
Б.Чимэг
