МАХН-ын дарга Н.Энхбаярыг суллахаар намын Ерөнхий нарийн бичгийн дарга Н.Удвал, Улс төрийн холбооны удирдлагууд болох М.Энхсайхан, Б.Жаргалсайхан нарын хүмүүс Төв аймгийн Цагдан хорих төвийг зорьсон талаар тус намын Олон нийттэй харилцах албанаас мэдээлсэн. Учир нь түүнийг цагдан хорих 14 хоногийн хугацаа нь маргааш дуусгавар болж байгаа юм.Гэвч АТГ-ын Тамгын газрын дарга Ч.Өнөрбаяр “Өнөөдөр Н.Энхбаярыг яллагдагчаар татна. Тэгэхээр үргэлжлүүлэн хорино гэсэн үг” гэв.
Харин Н.Энхбаярын өмгөөлөгч О.Баасанхүү: “Өнөөдөр 18.30 цагаас өмнө Сүхбаатар дүүргийн шүүхээс Н.Энхбаярыг үргэлжлүүлэн хорих уу, суллах уу гэсэн шийдвэрээ гаргах ёстой. Хэрвээ яллагдагчаар татаж үргэлжлүүлэн хорино гэвэл надад албан тоот явуулах ёстой. Харин одоогоор тийм албан тоот ирээгүй байгаагаас үзэхэд яллагдагчаар татаагүй бололтой” гэлээ.
Б.Чимэг
