Гуравдугаар сарын 15-наас хойш нэг сарын хугацаатай Баянгол дүүрэгт ажилладаг нийтийн хоолны зарим газрын үйл ажиллагааг Мэргэжлийн хяналтын хэлтсээс шалгажээ. Шалгалтад 75 иргэн, аж ахуйн нэгжийн үйл ажиллагааг лабораторийн шинжилгээнд хамруулсан байна. Нийтийн орон сууцны нэгдүгээр давхарт хоолны газрын үйлчилгээ явуулдаг газруудын талаарх гомдол их гардаг аж. Учир нь нийтийн орон сууцны нэгдүгээр давхарын гал тогооны өрөө нь нийтийн хоолны бус өрхөд зориулагдсан байдаг тул оршин суугчдын эрх ашиг, тав тухыг алдагдуулдаг байна. Шалгалтын дүнд дараах зөрчлийг илрүүлжээ.

- Хоол үйлдвэрлэл, үйлчилгээний газруудад дотоодын хяналтын бүртгэл хөтлөлт хангалтгүй, ажиллагсдад амаар үүрэг даалгавар өгдөг, биелэлтэнд хяналт тавьдаггүй, ажилчдын мэргэжлийн ур чадвар, тогтвор суурьшил муу учир үүрэг даалгаврын биелэлт хангалтгүй байна.

- Хоолны дээжийн хэмжээ бага, хийсэн хоолнуудаас бүрэн авдаггүй, дээжийн тэмдэглэлд урд өдрүүдийн дээжийг бичээгүй зөвхөн шалгалт очсон өдрийн тэмдэглэлийг бичдэг, хоолны дээжийг болсон түүхий бүтээгдэхүүнтэй хамт хадгалдаг зөрчлүүд түгээмэл байна.

- Ихэвчлэн курс дамжаа төгссөн хоолны цэс, технологийн картыг бичиж чаддаггүй, хоолноос дээж авч бүртгэл хөтөлж мэддэггүй, ур чадвар муутай тогооч нар ажиллаж байна.

- Шалгалтад хамрагдсан газрууд үйлчлүүлэгчдээс хоолны амт, чанар, үйлчилгээтэй холбоотой асуудлаар санал, дүгнэлтийг тодорхой асуулгаар /давс, чихэр, амт, үзэмж, халуун, хүйтэн, харьцааны соёл, тохижилт г.м/ авдаггүй нь хоолны амт чанар үйлдвэрлэл, үйлчилгээнд нөлөөлж мэргэжлийн ур чадвар сул байгааг харуулж байна.

- Орон сууцанд үйл ажиллагаа явуулж буй хоолны газруудын хоол үйлдвэрлэлийн өрөөний зай талбай бага, технологи урсгал зөрчигдөх зөрчлүүд түгээмэл байна.

- Ихэнх хоолны газруудын хөргөгчний хүрэлцээ муугаас болсон ба түүхий бүтээгдэхүүнийг нэг дор холилдуулдаг, түргэн гэмтэж муудах бүтээгдэхүүнийг тасалгааны хэмд хадгалж байна.

- Шингэрүүлсэн шатдаг хийг буруу байрлуулсан, зааврыг бүрэн эзэмшээгүй, санамжийг ажилчдад бүрэн танилцуулж, зааварчилгаа өгөөгүй зөрчил гарсаар байна.

- Шалгалтанд хамрагдсан ажилчдын 41.2 хувь нь эрүүл мэндийн урьдчилан сэргийлэх үзлэгт хамрагдаагүй, тогооч нарын 21.2 хувь нь мэргэжлийн бус тогооч байна.

- Хоолны газруудын аяга, таваг, хоолны хэрэгслийн угаалга, халдваргүйтгэл, ажилчдын ариун цэврийн байдалд үнэлэлт дүгнэлт өгөх зорилгоор 33 хоолны газраас 226 арчдас шинжилгээ авч нян судлалын лабораторид шинжлүүлэхэд 75.2 хувь нь бохирдолтой байлаа.

Илэрсэн зөрчлийг үндэслэн Баянгол дүүргийн 20 гаруй хоолны газарт 177 заалт бүхий 27 улсын байцаагчийн албан шаардлагаар хугацаатай үүрэг даалгавар өгчээ. Бид арвижах ХХК, Наашаа цаашаа ХХК, Дэвжих интернэшнль ХХК, Сод жигүүр ХХК, Ачуус ХХК зэрэг долоон аж ахуйн нэгжид 650.0 мянган, захирал Э.Хадхүү, У.Энхжаргал, Б.Март, Д.Юмжирдулам нарын 17 албан тушаалтанд 1 330 000, иргэн Ю.Айлтгүй, Н.Энхтүвшин, Б.Мөнгөнчимэг. М.Лхамдорж, Б.Алтан-Очир, Нармандах, Оюунчимэг нарын 16 иргэнд 620 000 нийт 2.6 сая төгрөгийн торгуулийг холбогдох хууль тогтоомжийн дагуу ноогдуулж барагдууллаа.