Ерөнхийлөгч Ц.Элбэгдорж өчигдөр нийслэлийн иргэдтэй уулздаг уламжлал ёсоор Төрийн  ордонд уулзлаа. Нийслэлийн Засаг даргын Тамгын газраас зохион байгуулсан уг уулзалтад  хотын удирдлагууд манай улсад суугаа зарим орны Элчин сайд, олон улсын байгууллагын төлөөллөгчид оролцлоо. Ерөнхийлөгч авлига, шударга ёсны талаар илтгэл тавьж, иргэдийн  асуултад хариулсан юм.

- УИХ-ын сонгуулийн хуулийн талаар ямар бодолтой байгаа вэ. Цахим үнэмлэхийн асуудал гацлаа. Та шударга сонгууль болно гэдэгт итгэж байна уу?

- Сонгуулийн хуульд оруулсан бүх заалтаа хэрэгжүүлж чадвал шударга сонгууль болно.  Зарим зүйлд нь саад учирч байгаа юм билээ. Тэр саадаа Үндэсний аюулгүй байдлын  зөвлөлөөр хэлэлцүүлэх хүсэлт тавьсан. Гэхдээ тэрийг нь хэлэлцэхгүй. Засгийн газар, СЕХ-ны төвшинд асуудлаа шийдвэрлэх хэрэгтэй. ҮАБЗ гэж асуудлыг өөрсдөөсөө холдуулах хэрэггүй. Сонгууль шударга явах боломж байна. Хуулийн хувьд УИХ-ын сонгуулийн хууль сайн болсон гэж үзэж байгаа.

 Цэц тойрогт өрсөлдөж ялагдсан ч 28-аас дээш хувийн санал авсан нэр  дэвшигч УИХ-д орж ирэх боломжтой гэсэн заалтыг Үндсэн хууль зөрчсөн гэж үзсэн. Цэцийн  энэ дүгнэлтийг УИХ хүлээж аваагүй. Цэц удахгүй их суудлын хуралдаанаа хийж асуудлыг  дахин хэлэлцэнэ. Өмнөх дүгнэлтээ хэвээр үлдээвэл намын нэрээр сонгогдох гишүүдийн тоо нэмэгдэнэ. Үүнд буруу зүйл байхгүй. УИХ дахь намын бүлгүүд тохиролцоод НИТХ-ын  сонгуулийг УИХ-ын сонгуультай хамт явуулахаар болж байх шиг байна. Ингэснээр иргэд саналаа өгөхөд хугацаа их шаардагдаг байх. Тиймээс сонгуулиа маш сайн зохион байгуулах  хэрэгтэй.

- Та мөрийн хөтөлбөртөө авлигатай тэмцэнэ, шударга ёс тогтоох тухай тусгасан. Мөрийн хөтөлбөрт тусгасан зорилтынхоо дагуу МАХН-ын дарга Н.Энхбаярыг барьж байгаа юм уу?

- Н.Энхбаярыг Монгол Улсын Ерөнхийлөгч байсан хүн гэдгээр нь би хүндэлдэг. Гэхдээ тэр хүн хуулиа  хэрэгжүүлэх ёстой. Би тэр хүнийг хүндэтгэхээсээ илүү хуулиа хэрэгжүүлэхийг шаардана. Түүнийг хуулийн  дагуу баривчилсан гэж ойлгож байгаа. Түүнээс биш мөрийн хөтөлбөрийнхөө дагуу хүн баривчилна гэж юу байхав.

- МАХН-ын дарга Н.Энхбаярыг баривчлах ажиллагааг та харсан уу?

- Харсан. Хуулийнхнаас энэ чинь юу болж байгаа юм бэ гэж асуусан. Миний асуултад бид ажлаа хийж  байна аа л гэж хариулсан.

- С.Зориг агсны 50 насны ой саяхан боллоо. Тэр аллагын хэргийг илрүүлэх талаар ямар арга хэмжээ  авч байгаа вэ?

- Ерөнхийлөгч болсноосоо хойш энэ хэргийн эзнийг олох талаар ажилласан. ҮАБЗ-өөр хэлэлцэж  зөвлөмж гаргасан. Мэдээж энэ зөвлөмж нууцын зэрэглэлтэй. Зөвхөн гэр бүлийнхэн нь танилцах  боломжтой. Ер нь энэ хэргийг илрүүлэхэд шаардлагатай бүх шийдвэрийг гаргасан.

- Хавтгайруулан олгож байгаа халамжийн талаар ямар бодолтой явдаг вэ?

- Таван чиглэлээр халамж олгодог байх хэрэгтэй. Хамгийн түрүүнд ахмад настан, хөгжлийн бэрхшээлтэй иргэдэд халамж олгох хэрэгтэй. Мөн хүүхдийн мөнгийг дахин олгох нь зүйтэй. Энэ  зургадугаар сараас хавтгайрсан халамж зогсоно. Харин түүнээс цааш хүүхдийн мөнгийг олгож эхлэх  хэрэгтэй. Мөн улс орныхоо ирээдүй болсон оюутнуудын халамжийг зогсоохгүй. Түүнчлэн залуу эхч үүдэд халамж олгодог болох хэрэгтэй.