Монгол Улсын БСШУЯ, Хятад улсын Соёлын яам хамтран "Өнөөгийн Монгол" үзэсгэлэнг энэ сарын 27-ны өдөр Бээжин хотын Хуанчэн урлагийн музейд нээжээ. Үзэсгэлэнгийн нээлтэд  БСШУЯ-ны Төрийн нарийн бичгийн дарга Д.Далайжаргал, Монгол улсаас Хятад улсад суугаа онц бөгөөд бүрэн эрхт элчин сайд Ц.Сүхбаатар, Үндэсний уран зургийн галерейн захирал А.Чадраабал,

Хятад улсын Соёлын яамны Гадаадтай соёлоор харилцах газрын орлогч дарга Ли Хун, Хятадын гадаадын соёл урлагийн арга хэмжээ зохион байгуулах газрын орлогч захирал Вань Жиюань нарын албаны хүмүүс оролцсон байна.

     Энэ үеэр БСШУЯ-ны Төрийн нарийн бичгийн дарга Д.Далайжаргал “Энэ удаагийн үзэсгэлэнгийн уран зургийн бүтээл нь Монголын уран зургийн галерейн үндсэн сан хөмрөг, урчуудын эвлэлийн шинэ бүтээлчдийн бүтээлээс бүрдсэн бөгөөд энэ нь дүрслэх урлагийн орчин цагийн чиг хандлагыг харуулсан уран баримал болон уран зургийн хамтарсан бүтээлүүд юм. Монгол Улсын БСШУЯ болон Хятад улсын соёлын яам хамтран анх удаагаа ийнхүү үзэсгэлэнг гаргаж байгаа. "Өнөөгийн Монгол" орчин үеийн уран зургийн үзэсгэлэн та бүхний сэтгэлд нийцнэ гэдэгт итгэлтэй байна” гэжээ.

  Хятад улсын Соёлын яамны Гадаадтай соёлоор харилцах газрын орлогч дарга Ли Хун “Энэ жил манай хоёр орон "Соёлын сар" -ын арга хэмжээг харилцан зохион байгуулж байна. Энэ сард Бээжин хотноо зохион байгуулагдсан "Монголын соёлын сар"-ын арга хэмжээнд Монгол Хятадын засгийн газар өндөр анхаарал хандуулж байгаа бөгөөд энэхүү арга хэмжээ нь хоёр орны ард түмний найрсаг харилцаа, харилцан ойлголцлыг нэмэгдүүлэх чухал орчныг бүрдүүлж байна. Соёлын сарын нээлтийн арга хэмжээний үеэр болсон Монголын соёл урлагийн чуулгын гайхамшигтай тоглолт нь Хятадын ард түмэнд Монголын соёл, урлагийн баялаг нөөцийг ойртуулан мэдрүүлсэн. Өнөөдрийн зургийн үзэсгэлэн уран бүтээлчдийн онцгой мэдрэмжээр хийсэн бүтээлүүдээр дамжуулан, Монголын онцлогт урлагийн гайхамшгийг дахин танилцуулах болно. Энэхүү үзэсгэлэн Хятадын ард түмний талархлыг хүлээнэ гэдэгт итгэлтэй байна” гэжээ.

   “Монгол Улсын уран зургийн боловсролын төвшин маш өндөр, цаг үетэйгээ зэргэцэн хөгжиж, дэлхийн уран зургийн тэргүүний эгнээнд байгааг эдгээр бүтээлээс би олж харлаа” гэж Хятадын гадаадын соёл урлагийн арга хэмжээ зохион байгуулах газрын орлогч захирал, зураач Вань Жиюань хэлсэн байна.

"Өнөөгийн Монгол " үзэсгэлэн нь "Монголын соёлын сар"-ын арга хэмжээний чухал хэсэг бөгөөд ирэх сарын 5-ны өдөр хүртэл үргэлжилнэ. Тус үзэсгэлэнд 50 гэрэл зураг, 40 уран зураг болон гурван уран баримал бий аж. Эдгээр уран бүтээл нь харилцан адилгүй арга барил болон өнцгөөс Монгол улсын олон салбарын хөгжил цэцэглэл, боловсрол, соёл урлаг, түүх соёлын дурсгал, нүүдэлчдийн зан заншил, Монголын уудам хөх тэнгэр, цэлгэр тал, говь хангайн үзэсгэлэнт байгалийг яруу тансаг илэрхийлсэн байна. Уран зураг, уран баримлын бүтээлүүд нь Монголын урчуудын зохион бүтээх өвөрмөц ур чадвар болон өндөр төвшнийг харуулжээ.

    Дашрамд дурдахад, "Хятадын соёлын сар” арга хэмжээ ирэх наймдугаар сард манай улсад болох юм.