Өмнөговь аймгийн нутаг дахь Овоот толгойн ордыг эзэмшдэг “Саутгоби Сэндс” компаний хувьцааг авснаараа багагүй хэл аманд өртөөд байгаа Хятадын "Чалко" компани алдагдалд орж эхэлжээ. Хятадын үндэсний томоохон хөнгөн цагаан металл үйлдвэрлэгч “Чалко” компаний санхүүгийн тайланг сөхөхөд энэ оны эхний улирлын байдлаар алдагдалтай ажилласан тоо гарчээ. Энэ нь дэлхийн зах зээл дээрх металын ханшийн уналт, шахахууны үнийн өсөлттэй холбоотой гэж bloomberg.com сайт мэдээлсэн байна.

   “Чалко” 2012 оны эхээр 331.2 сая юаны орлого олсон бөгөөд энэ нь 173 сая ам.долларын алдагдалтай ажилласан гэсэн үг аж. Лондонгийн металын бирж дээр хөнгөн цагааны үнэ оны эхээр аажмаар буурсаар өмнөх оныхтой харьцуулахад 12 хувиар буурсан байна. “Чалко” компаний гүйцэтгэх захирал Xiong Weiping-гийн таамаглаж байгаагаар уул уурхайн салбарын үйлдвэрлэл нь дан ганц металлаас хамааралтай байхаа больж төмрийн хүдэр, нүүрс гэх зэргээр төрөлжиж байгаа тул хөнгөн цагаанаас олох орлого дагаад буурч байгаа аж. Тийм ч учраас хөнгөн цагааны магнат энэ компани Монголын нүүрсний бизнес рүү хөл тавихаар оролдож эхэлсэн гэж ажиглагчид үзэж байна.  Хонгконгод төвтэй "BOC International Holdings" ХХК-ий шинжээч "Чалко" компаний алдагдал нь үнээс шууд хамааралтай үйлдвэрлэлийн хэмжээний зохисгүй харьцаа гэж мэдэгдсэн юм.

  Өнөөдрийн байдлаар Хонгконгийн хөрөнгийн бирж дээр “Чалко” компаний хувьцаа 0,5 хувиар буурч 3,77 хонгконг долларын ханштай байна.  Өнгөрсөн 12 сарын турш тогтмол бууралттай байсан хувьцаа нь зах зээлд гаргаж байсан анхны үнээсээ даруй 49 хувиар буурсан үзүүлэлт гарчээ. “Чалко” компани  1,26 тэрбум долларын зах зээлийн үнэлгээтэй байсныг Bloomberg-ийн статистикаас харж болохоор байна.
   Бээжин хотод төвтэй тус компани Шанхайн хөрөнгийн бирж дээр хувьцаагаа гаргаж байгаагаа өнөөдөр мэдэгдсэн юм. Одоогоор компаний 19 хувьтай тэнцэхүйц 33.6 тэрбум юаны арилжаа хийгээд байгаа аж.